Read lulogooli Ezekieli 30 Bible Online

Ezekieli 30 - lulogooli bible

Ezekieli 30

¹Na likuva lya Yahova lya duka ku inze kandi, kuvola,

²Ive mwana womundu, profeta, u vole, Mwami Nyasaye a vola ndi: Mu kupe tsikwili, O bayaye ku lidiku yilyor

³Kigira lidiku yilyo li veye ahimbi lidiku lya Yahova li veye ahimbi; li veye lidiku lyamalesi, i la va inyinga yetsihiri.

⁴Na kivavi ki la duka ku Egepeti; nelitsunwa li la va ku Ethiopia, lya yavo aviitwa va gwa mu Egepeti; na va la twulidza ubunyingi bwavandu veve, na imise gyigye gyi la sambulwa.

⁵Ethiopia, na Putu, na Ludu, navandu vosi ava hambana, na Kubu navana vekivala ki veye mu lilagana, va la gwa ku kivavi halala navo.

⁶Yahova a vola: Yavo vosi ava diranga Egepeti va la gwa; nobwegingiri bwobunyali bwibwe bu lika hasi: kutwula ku kitaladzi kya Sevene va la gwa muye ku kivavi, Mwami Nyasaye a vola.

⁷Na va la va ha tswa hagati hevivala vi veye hatswa, na madala gege ga la va hagati ha madala ga kolwa vyanyi.

⁸Na va la manya inze mbeye Yahova, lwa ndiakidza umuliru mu Egepeti, na vosi ava mu konyanga va mali kudiva.

⁹Ku lidiku yilyo avatumwa va la twula imbiri wange mu amato kutihidza Avaethiopia ava ta li neli ganagana: na ha la va nelitsunwa kuvo kuli ku lidiku lya Egepeti; kigira, henza, lidzanga.

¹⁰Mwami Nyasaye a vola ndi: Kandi nda heridza ubunyingi bwavandu va Egepeti, nomukono gwa Ne bukadirezaru, mwami wa Babuloni.

¹¹Uyu navandu veve halala, avatihidzi vetsihiri, va la letwa vingire kwononnya kivala; na va la somola vivavi vyavo va lwane na Egepeti, na va lizulitsa kivala aviitwa.

¹²Na nda kaminya migera, nokugulidza kivala ki ve mu makono gavandu vadamano; nda kola kivala hatswa, na vosi ava veye mukyo na makono ga vageni: inze, Yahova mmali kuvola likuva yili.

¹³Mwami Nyasaye a vola ndi: Nda dividza vifwananyi vyavo, na nda heridza vifwananyi vya vutswa mu Nofu; a la vula kunyoleka munene u twulanga mu kivala kya Egepeti: nda vika ubutii mu kivala kya Egepeti.

¹⁴Na nda kola Pathrosi kuva hatswa, na ndiakidza umuliru mu Zoan, nokukola likalaga mu No.

¹⁵Na nda tsuka ubutima bwange mu Sini, impinga ya Egepeti, na nda twulidza ubunyingi bwavandu va No.

¹⁶Na ndiakidza muliru mu Egepeti, Sini i la va mu litsunwa linene, na No li la donnywa vidonye; na Nofu li la va navadambidzi mu inyinga yombasu.

¹⁷Avasoleli va Aven na Pibesethu va la gwa ku kivavi: na madala yaga ga la tsia mbutugwa.

¹⁸Ha Tahafenesi kandi ubulavu bu la gwa kisundi, lwa ndi vunannya tsinira tsya Egepeti, nobwegingiri bwobunyali bwibwe bu la hera muye: mu makuva gege, lilesi li la mu ku nika, na avakana veve va la tsia mu butugwa.

¹⁹Ni ndiyo ndi kalaga mu Egepeti: na va la manya inze mbeye Yahova.

²⁰Kandi ga duka mu muhiga gwe likumi na mulala, ku mweli gwokutanga, ku lidiku lya gatano na gaviri lyomweli, likuva lya Yahova lya duka ku inze, kuvola,

²¹Ive mwana womundu, mmali kuvunannya mukono gwa Farao mwami wa Egepeti; henza, gu vuli kubohererwa, nokuvikwa ku tsinyasi tsyokuhonnya, gu vuli kunazwa nekitambaya, gu duke kuva netsingulu tsyokugumira kivavi.

²²Kigira yaga Mwami Nyasaye a vola: Henza, inze mbeye musigu ku Farao mwami wa Egepeti, nda vuna nnya amakono gege, agetsingulu, nogwa li ni gwa vunannywa; nda kola kivavi kunozoka mmukono gwigwe.

²³Na nda salannya Avaegepeti hagati hetsihiri, nokuvasalannya mu vivala ihale ne inale.

²⁴Na nda vika tsingulu ku makono gomwami wa Babuloni, nda vika kivavi kyange mmukono gwigwe: navutswa amakono ga Farao nda ga vunannya, naye a la kenya imbiri wewe, likenya lyomundu watiywi ulugoma lwokwiita.

²⁵Nda dira amakono gomwami wa Babuloni; na amakono ga Farao ga la tonya hasi; na va la manya inze mbeye Yahova, lwa mbika kivavi kyange mmakono gomwami wa Babuloni, naye a la ki nyira ku kivala kya Egepeti.

²⁶Nda salannya Avaegepeti hagati he tsihiri, nokuvasalannya mu vivala ihale ne ihale; na va la manya inze mbeye Yahova.