Read lulogooli Ezekieli 34 Bible Online

Ezekieli 34 - lulogooli bible

Ezekieli 34

¹A Na likuva lya Yahova lya duka ku inze, kuvola,

²Ivemwana womundu, profeta ku avayi va Israeli profeta, u va volere, kali ku avayi Mwami Nyasaye a vola ndi, O bayaye ku avayi va Israeli aveyayanga avene si ga dukiranga avayi kwaya magondi?

³Mwinye mu litsanga amanetu, na mwevikanga ubwoya, mwiitanga amanetu; navutswa si mwayanga amagondi.

⁴Aga lwalanga si mu ga hedzanga tsingulu, kandi si mu honyanga likenyanga, kandi si mu bohereranga lya vunika kandi si mwirannyanga lya kungwa kandi si mwenyanga lya gota; navutswa mwamehanga kugo netsingulu nobululu.

⁵Nago ga salannywa yiyi na yiyi, kigira si ha li nomwayi; nago ga li vyokulia vyetsinyama tsyosi tsyomwigendanyama, na ga salannywa yiyi na yiyi.

⁶Amagondi gange ga vayavaya mu vigulu vyosi, noku kigulu sa kilala kitambi; yee, magondi gange ga li ni ga salannywa mu mmoni mwosi mwelirova; si ha li nomundu kali mulala kugateva kinga kugenya.

⁷Kigira yaga, mwinye avayi, mu hulire likuva lya Yahova:

⁸Kuli mbeye mwoyo, Mwami Nyasaye a vola, ligali kigira magondi gange ga gwa vilanye, magondi gange ga gwa vyokulia vyetsinyama tsyosi tsyomwigendanyama, kigira si ha li nomwayi, kandi avayi vange si venya amagondi gange, navutswa avayi veyayanga avene, si vayanga amagandi gange:

⁹kigira yaga mwinye avayi mu hulire likuva lya Yahova:

¹⁰Mwami Nyasaye a vola ndi, Henza, mbeye musigu ku avayi; na nda vanza amagondi gange ku makono gavo, na nda lekidza kuvo miyinzi gyokwaya amagondi; kandi avayi va la vula kweyaya avene kandi; nda honnya magondi gange kutwula ku minwa gyavo, ga vule kuva vyokulia vyavo.

¹¹Kigira Mwami Nyasaye a vola ndi: Henza, inze mwene, yee, inze, ndenya magondi gange, nokuganyola.

¹²Kuli mwayi yenyanga kyayo kikye mu lidiku lya ya li hagati ha magondi gege aga salannywa yiyi na yiyi, ni ndiyo ndenya amagondi gange; na nda ga honnya kutwula hosi ha ga salannywa mu lidiku lyamalesi nelyekisundi.

¹³Na nda ga twulidza mu avandu, nokugavungidza ga twule mu vivala yivyo, na nda ga vika mu kivala kyago kyene; na nda gaya mu vigulu vya Israeli, himbi nemigerera gya madzi, na hosi mu kivala kyavandu va menya mu.

¹⁴Nda gaya ubwayi bulahi; na kego kyago ki la va ku vigulu vyobutambi bwa Israeli: ga la gona yo mu kego kilahi, nomu kyayiru kyokukomeridza; ga laya ku vigulu vya Israeli.

¹⁵Inze mwene nda va mwayi wamagondi gange, na nda ga kola ga gone hasi, Mwami Nyasaye a vola.

¹⁶Ndenya lya gota, nokuleta kandi lya kungwa, nokuboherera lya vunika, nokuha tsingulu lya kenya, na manetu na getsingulu nda ga dividza; nda ga lihidza mu likalaga.

¹⁷Noku makuva genyu, O kyayo kyange, Mwami Nyasaye a vola ndi: Henza, nkalaganga hagati heligondi neligondi, ligondi likole nembuli ikole.

¹⁸Mu lolanga ki veye kindu kikekeke ku mwinye kwayirwa lyaywa lilahi, navutswa ga mu dukira ku duvaga kandi nevirenge vyenyu kyayiru kye nyu kya tigala? Nokunwa madzi malahi, na ga mu dukira mwinye kwononnya aga tigala nevirenge vyenyu?

¹⁹Na magondi gange, ga lia vya mwa duvaga nevirenge vyenyu, na ga nwa amadzi ga mwononya nevirenge vyenyu.

²⁰Kigira yaga Mwami Nyasaye a va volera ndi: Henza, yee, inze, nda kalaga hagati hamagondi manetu namagondi mang'afu.

²¹Kigira mwinye mwa luguta netsimbalu na namavega, nokutodza amalwaye netsinziga tsyenyu, kuduka kugasalannya yiyi na yiyi;

²²kunangwa nda honnya kyayo kyange, na si ga la va vilanye kandi mba; na nda kalaga hagati he ligondi neligondi.

²³Na nda singeridza kuvo mwayi mulala, naye a la gaya, uyu a veye mutumekiri wange Daudi, uyu a la gaya, na a la va mwayi wago.

²⁴Na inze, Yahova, nda va Nyasaye wago, na mutumekiri wange Daudi a la va munene hagati hago; inze, Yahova, mmali kuvola likuva yili.

²⁵Na nda kola lilagana lyemirembe halala navo, na nda heridza tsinyama tsindamano tsi vule kuva kandi mu kivala yikyo; va la menya nemirembe mwigendanyama, nokugona mmulitu.

²⁶Na nda va kola, halala na hosi ha kumbiridza kigulu kyange kuva ubugasu; nda leta ulunyirira ku inyinga yalwo; lu la va ho tsinyirira tsyobugasu.

²⁷Na musala gwomulimi gu lama makuyu gagwo, nekivala ki lama limedeka lyakyo, na va la menya nemirembe mu kivala kyavo; na va la manya inze mbeye Yahova, lwa mbunannya miluguyu gyenira yavo, na nda va honnya va twule mmukono gwa yavo ava va tuga.

²⁸Na si va la va vilanye vyetsihiri kandi, kandi tsinyama tsyekivala si tsi la va lia kandi mba; navutswa va la menya nemirembe, na si ha la va no nyala kuvatihidza.

²⁹Na nda va singeridzira vyokumera vyelidzominywa, na inzala si i la va dividza kandi mu kivala, kandi si va la ginga tsisoni tsyavetsihiri ka ndi mba.

³⁰Na va la manya inze, Yahova Nyasaye wavo, mbeye halala navo, kandi inyumba ya Israeli i veye avandu vange, Mwami Nyasaye a vola.

³¹Na mwinye amagondi gange, amagondi gekyayiru kyange, mu veye avandu, na inze mbeye Nyasaye wenyu, Mwami Nyasaye a vola.