Read lulogooli Ezekieli 35 Bible Online

Ezekieli 35 - lulogooli bible

Ezekieli 35

¹Kandi likuva lya Yahova lya duka ku inze, kuvola,

²Ive mwana womundu, dinyeridza mmoni mumwo ku kigulu kya Seiru, u profete kukyo,

³u ki volere, Mwami Nyasaye a ku volera; Henza, mbeye musigu ku ive, O kigulu kya Seiru, nda nyira mukono gwange ku ive, na nda ku kola kuva hatswa neligenya.

⁴Nda kola madala gogo ga ve vya nyi, na ive u la va hatswa; na u la manya inze mbeye Yahova.

⁵Kigira ive wa li nobusigu bwa kazozo na wa vika avandu va Israeli ku tsingulu tsyekivavi mu inyinga yekivi kyavo, mu inyinga yobudamano bwa li nekiheri;

⁶kigira yaga, kuli inze mbeye mwoyo, Mwami Nyasaye a vola, nda ku lombera masahi, na masahi ga la ku londerera: kigira ive u vuli ku dunyira masahi, masahi ga la ku londerera.

⁷Kunangwa nda kola kigulu kya Seiru kuva kyokuge nya nokuva hatswa; na nda dividza kukyo uyu u vitanga, na uyu wirananga.

⁸Na ndizulitsa vigulu vyakyo aviitwa: mu tugulu tutwo nomu mavona gogo nomu migerera gyigyo gyamadzi gyosi, va la gwa yavo aviitwa nekivavi.

⁹Na nda kola ive kuva hatswa kazozo, madala gogo ga vula kuva nomumenyi; na mu la manya inze mbeye Yahova.

¹⁰Kigira wa vola, Tsihiri yitsi tsiviri na vivala yivi viviri vi la va vyange, na ku la vi gumira; kali Yahova na a veye ho:

¹¹kigira yaga, kuli mbeye mwoyo, Mwami Nyasaye a vola, Inze nda kola kuli ubutima bubwo, na imbodoka yoyo ya wa lolekidza mu budunyi bubwo kuvo; na nda kunula mwoyo gwange hagati havo, lwa ndi ku kalagira.

¹²Na ive u la manya inze, Yahova, mbuliye amanyego gogo gosi aga u volanga ku vigulu vya Israeli, na u vola, Vya lekwa hatswa, ku hebeywi ku duke kuvilia.

¹³Mwinye mwiidzominyi avene ku inze neminwa gyenyu, nokumeda makuva genyu ku inze: nga huliye.

¹⁴Mwami Nyasaye a vola ndi: Lwa lirova lyosi li sangala, inze nda kola ive kuva hatswa.

¹⁵Kuli wa sangala ku miyandu gyenyumba ya Israeli, kigira gya li hatswa, ni ndiyo ndi kolera ive: u la va hatswa, O kigulu kya Seiru, na Edom kyosi, yee kyosi: va la manya inze mbeve Yahova.