Read lulogooli Ezekieli 36 Bible Online

Ezekieli 36 - lulogooli bible

Ezekieli 36

¹Na ive, mwana womundu, u profetere vigulu vya Israeli, u vole, Mwinye vigulu vya Israeli, mu hulire likuva lya Yahova.

²Mwami Yahova a vola ndi: Kigira musigu u voye ku mwinye, Aha kandi, Hadiguluku ha kale ha veye hetu kugumira;

³kigira yaga u prolete, u vole, Mwami Nyasaye a vola ndi: Kigira, yee, kigira va koli mwinye hatswa, nokumira mwinye tsimbega tsyosi, mu duke kuva miyandu gyetsihiri tsyatigala, na mwa vugulwa mu minwa gya yavo ava volanga, nomu makuva gobudamano bwava ndu;

⁴kigira yaga, mwinye vigulu vya Israeli, mu hulire likuva lya Mwami Nyasaye: Mwami Nyasaye a volera vigulu na tugulu, na migerera gyamadzi na mavona, na ha lekwa hatswa ahere, noku madala aga avandu va leka, aga gwiye vilanye na lilegwa kuva tigala vetsihiri ava kumbiridza tsimbega tsyosi:

⁵kigira yaga Mwami Nyasaye a vola ndi: Ligali mmali kuvola ku litigala lyetsihiri mu muliru gwelikendeka lyange, noku Edom, tsihiri tsyevuguliye tsyene kivala kyange va ve nakyo kuva miyandu gyavo ku buyanzi bwemyoyo gyavo gyosi, nomwoyo gwokulega, kukita kyova ki ve kilanye.

⁶Kigira yaga profeta ku kivala kya Israeli, u volere vigulu na tugulu, na migerera na mavona, u vole, Mwami Nyasaye a vola ndi: Henza, mmali kuvola mu likendeka lyange nombutima bwange, kigira mwinye mwa ginga tsisoni tsyetsihiri

⁷Navutswa Yahova ya mbolera, U ta vola, Inze mbeye mwana; kigira u la tsia ku uyu wa nku hila kuye, na gosi aga nku laga u la ga vola.

⁸Navutswa mwinye, O vigulu vya Israeli, mu la sibuka tsisya tsyenyu, nokuha avandu vange Israeli amakuyu genyu; kigira va veye himbi kuudza.

⁹Kigira, henza, inze mbeye ku luvega lwenyu, na nda giru nkana kuhenza ku mwinye, na mu la limwa nokutagwa;

¹⁰na nda meda avandu ku mwinye, inyumba yosi ya Israeli, yee yosi halala; na madala ga la menywa navandu, na ha li vyanyi mu lombaka kandi;

¹¹na nda meda ku mwinye avandu nemitugu; navo va la medeka nokwivula, na nda kola ha menywe navandu kuli liva lyenyu lyoku matsvambiri, nokukolera mwinye ubulahi kuvita litanga lyenyu lyoku matsyambiri: na mu la manya inze mbeye Yahova.

¹²Yee, nda kola avandu va gende ku mwinye, avandu vange Israeli; na va la ku gumira, na ive u la va mi yandu gyavo, na ive si u liita avana vavo kandi mba.

¹³Mwami Nyasaye a vola ndi: Kigira va volera mwinye, Ive kivala kya lia avandu, na wa li wokwiita avana vehiri yoyo;

¹⁴kigira yaga si u la lia avandu kandi mba, kandi si u liita avana vehiri yoyo kandi mba, Mwami Nyasaye a vola;

¹⁵kandi si nda leka ive kuhulira tsisoni tsyavetsihiri kandi mba, kandi si u la ginga amanyego gavandu kandi mba, kandi si u likigitalidza ihiri yoyo kandi mba, Mwami Nyasaye a vola.

¹⁶Kandi likuva lya Yahova lya duka ku inze, kuvola,

¹⁷Ive mwa na womundu, inyinga inyumba ya Israeli ya menya mu kivala kyavo kyene, va kyononnya nenzira yavo nevikolwa vyavo: inzira yavo imbiri wange ya fwanana nobubi bwomukali inyinga yelitsia mu mweli.

¹⁸Ku nangwa nda tsuka ubutima bwange kuvo kigira amasahi ga va tahidza ku kivala, kandi kigira va kyononnya nevifwananyi vyavo;

¹⁹nda va salannya hagati hetsihiri, na va salannywa hagati hevivala: kuli inzira yavo na kuli vikolwa vyavo nda va kalagira.

²⁰Na lwa va duka ku tsihiri, tsya va tsia ku, vononnya lieta lyange litakatifu: kigira avandu va vola ku makuva gavo, Yava navandu va Yahova, va twula mu kivala kikye.

²¹Navutswa nda vera tsimbabasi lieta lyange litakatifu lyenyumba ya Israeli yononnyira ha gati hetsihiri, tsya va tsia ku.

²²Kigira yaga u volere inyumba ya Israeli, Mwami Nyasaye a vola ndi: Inze si nkoli inkuva yiyi kigira ive, inyumba ya Israeli, navutswa nkoli kigira lieta lyange litakatifu, lya mwononnyira hagati hetsihiri tsya mwa tsia ku.

²³Na nda takasa lieta lyange linene, lyononnywa hagati hetsihiri, lya mwinye mwononnya hagati havo; na vetsihiri va la manya inze mbeye Yahova, Mwami Nyasaye a vola, lwa ndi takaswa mu mwinye imbiri wetsimoni tsyavo.

²⁴Kigira nda vugula mwinye hagati hetsihiri, na nda mu vungidza kutwula mu vivala vyosi, na nda mu leta mu kivala kyenyu avene.

²⁵Na nduha ama dzi malahi ku mwinye, na mu la va avanifu: nda mwogidza ububi bwenyu bwosi, na vifwananyi vyenyu vyosi.

²⁶Kandi nda mu ha mwoyo muhya, na nda vika mu mwinye roho muhya; nda twulidza umwoyo gweligina gu veye mu mubiri gwenyu, na nda mu ha mwoyo gwenyama.

²⁷Na nda vika Roho wange mu mwinye, na nda mu gendidza mu amalago gange, na mu la gumira miima gyange nokugyikola.

²⁸Na mu la menya mu kivala kya nda ha avaguga venyu; na mu la va avandu vange, na inze nda va Nyasaye we nyu.

²⁹Na nda mu honnya ku bubi bwenyu bwosi: na nda langa ubuswage na nda bu meda, na si nda vika inzaia ku mwinye kandi mba.

³⁰Nda meda makuyu gemisala, ne limedeka lyemilimi, mu vule kunyola kandi manyego genzala hagati hetsihiri.

³¹Hene yaho mu lidzulitsa tsinzira tsyenyu tsindamano, nevikolwa vyenyu vi ta li vilahi; na mu ledunyira avene mu tsimoni tsyenyu kigira budamano bwenyu kandi kigira kivihiri kyenyu.

³²Si nda kola yaga kigira mwinye, Mwami Nyasaye a vola, mu manye yaga: mu ve soni na mu timuke inkolo kigira tsinzira tsyenyu, O inyumba ya Israeli.

³³Mwami Nyasa ye a vola ndi: Mu lidiku lya nda takasa mwinye ku ubudamano bwenyu bwosi, nda kola amadala ga menywe kandi navandu, na ha lekwa vyanyi hombakwe kandi.

³⁴Na kivala kya li hatswa ki la limwa kali ni kya li hatswa imbiri wetsimoni tsya vosi ava vita ahimbi nakyo.

³⁵Na va la vola. Kivala yiki kya li hatswa ki gwiye kuli mulimi gwa Edeni; namadala aga li vyanyi na hatswa nokudividzwa, gombakeywi tsingaga nokumenywa navandu.

³⁶Hene yaho tsihiri tsi li tigala himbi ku mwinye tsimbega tsyosi tsi la manya inze Yahova mmali kwombaka kandi ha li vyanyi, nokusimika aha li hatswa: inze, Yahova, mmali kuvola yaga, na nda ga kola.

³⁷Mwami Nyasaye a vola ndi: Kandi kigira inkuva yiyi inyumba ya Israeli i la teva inze, mba kolere: nda va meda navandu kuli kyayo kyamagondi.

³⁸Kuli kyayo kiitangwa kuva kihaanwa, kuli kyayo kya Yerusalemi mu madiku manene galyo aga lagwa, ni ndiyo amadala aga lekwa vyanyi ga lizulitswa vyayo vyavandu; na va la manya inze mbeye Yahova.