Read lulogooli Ezekieli 38 Bible Online

Ezekieli 38 - lulogooli bible

Ezekieli 38

¹Likuva lya Yahova lya duka ku inze, kuvola,

²Ive mwana womundu, henzidza mumoni mumwo ku luvega lwa Goga, mu kivala kya Magoga, munene wa Roshu, na Me sheki, na Tubali, u profete kuye,

³nokuvola, Mwami Nyasaye a volera ive: Henza, mbeye ku ive musigu, ive Goga, munene wa Roshu, na Mesheki, na Tubali;

⁴na nda ku girunkannya, nokuvika tsinzago mu tsisaya tsitsyo, na nda ku leta kyova, nelihe lilyo lyosi, tsiparasi na va ninanga ku tsiparasi, vosi vavo vivika vyuma, li veye lihe linene ligali va veye netsikuti netsingavo, vosi vavo va tumekira vivavi:

⁵Persia, Kushi, na Putu halala navo, vosi va veye netsingavo netsigudwa tsyekivya:

⁶Gomeri, neviduma vivye vyosi; inyumba ya Togarima ku luvega lwa kasikasini, na viduma vivye vyosi; va veye avandu vanyingi halala nive.

⁷Kunangwa wetegeke, yee wetegeke, ive na amahe gogo gosi aga vunga ku ive, na ive u ve mulindi wavo.

⁸Inyima wa madiku manyingi va ladza ku ive; mu mihiga gyekiheri u lingira mu kivala kiranywa kutwula ku kivavi, kya vungidzwa kutwula ku avandu vanyingi, ku vigulu vya Israeli, vya li vyanyi vya kazozo; navutswa kya letwa kutwula mu avandu, na va la menya nemirembe, yavo vosi.

⁹Na ive u lanegira, u la duka kuli kihi, u la va kuli lilesi kukunika kivala, ive, na viduma vivyo vyosi, na avandu vanyingi halala nive.

¹⁰Mwami Nyasaye a vola ndi: Ga la duka mu lidiku yili, tsiganagani tsi lingira mwoyo gugwo, na ive u la saavira lisaavira lidamano:

¹¹na u la vola, Ndanegira ku kivala kyotu dala tu ta li netsingaga; nda tsia ku yava ava veye mu busosi, avamenya nemirembe, vosi va menya bugira tsingaga, na ava ta veye nemiluguyu kinga viribwa;

¹²kuvugula vilanye nevyokuhima; kugirunkannya mukono gugwo ku vyanyi aha menyangwa kalunu navandu, noku avandu ava vungidzwa halala kutwula mu tsi hiri, ava nyola tsing'ombe neviju, ava menyanga hagati helirova.

¹³Sheba, na Dedan, na vakiranyi va Tarshishi, halala neving'ang'a vivye visoleli vyosi, va la ku teva, Ive uudzi kuvugula vilanye? U vungidzi lihe lilyo kuvugula vyokuhima? Kuvugula ifetha nethahabu u tsie navyo, kuvugula tsing'ombe neviju u tsie navyo, kuvugula vilanye vinene?

¹⁴Kigira yaga, ive mwana womundu, profeta, u volere Goga, Mwarni Nyasaye a vola ndi: Mu lidiku yilyo lwa avandu vange Israeli va menya nemirembe, si u la manya makuva yaga?

¹⁵Na ive u ladza kutwula hango hoho ku tsimbega tsyekiheri kya kasikasini, ive, navandu vanyingi halala nive, avokunina ku tsiparasi, vosi kiduma kinene, lihe lyobunyali ligali;

¹⁶u lanegira uudze ku ava ndu vange Israeli kulwana navo, kuli lilesi kukunika kivala; ga la va mu madiku gekiheri nda leta ive uudze kulwana nekivala kyange, tsihiri tsi duke kumanya inze, lwa ntakaswa mu ive, O Goga, imbiri wetsimoni tsyavo.

¹⁷Mwami Nyasaye a vola ndi: Ni ive wa nda vola amakuva gogo mu madiku ga kale neminwa gyavatumekiri vange ava profeti va Israeli ava profeta ku madiku yago mihiga minyingi nda leta ive uudze kulwana navo?

¹⁸Ga la va ku lidiku yilyo Goga, lwa yanegira kwingira mkivala kya Israeli, Mwami Nyasaye a vola ubutima bwange bu la nina ku inze mu amolo gange.

¹⁹Kigira mu likendeka lyange nomu muliru gwo butima bwange mboye, Ligali mu lidiku yilyo ha la va nelidegera linene mu kivala kya Israeli;

²⁰kuduka tsisudzi tsi veye mu inyanza, namanyonyi gombwerefu, netsinyama tsyomwigendanyama, na vi molanga ku lirova vyosi, navandu vosi ava veye mmoni mwekivala, va la degera imbiri wommoni mwange, nevigulu vi la tsomwa hasi, na vyanegiru vi la gwa, namadigi sa lilala li la gwa hasi.

²¹Na nda langa kivavi kidze mu vigulu vyange vyosi ku uyu, Mwami Nyasaye a vola: mundu sa mulala kivavi kikye ki la va ku avamwavo veve.

²²Nda kola likalaga kuye nobulwaye namasahi; nda kupidza imbula kuye, noku viduma vivye, noku avandu vanvingi ava veye halala naye, nda kupidza imbula yo kwizula, nembula yamagina amanene nomuliru, nekibiridi.

²³Na ndii dzominya inze mwene, nokwetakasa inze mwene, ndemannya inze mwene mmanyekane imbiri wetsimoni tsyetsihiri tsinyingi; navo va la manya inze mbeye Yahova.