Read lulogooli Ezekieli 40 Bible Online

Ezekieli 40 - lulogooli bible

Ezekieli 40

¹Mu muhiga gwa makumi gaviri na gyitano gwelyadikidzwa lyetu, mu litanga lyomuhiga, ku lidiku lyelikumi lyomweli, mu muhiga gwelikumi na gyine kutwula ku likuywa lyelidala, ku lidiku zana yilyo, mukono gwa Yahova gwa li ku inze, na ya mbila nokundeta yo.

²Mu malola ga Nyasaye ya ndeta mu kivala kya Israeli, nokunsingeridza mu kigulu kitambi ligali, ikya li mu nelyombakwa lyelidala ku luvega lwa kusini.

³Na ya ndeta yo; na, henza, ya li ho mundu musatsa, wa lifwana lilye lya li kuli lifwana lyomugasa, naye ya li nomugoye gwekatani mmu kono gwigwe, nekidundu kyokugera; na ya singira mu kiribwa.

⁴Na mundu zana ya mbolera, Ive mwana womundu, henza netsimoni tsitsyo, hulira na amatu gogo, na u vike mwoyo gugwo ku yaga gosi aga ndi ku mannya; kigira ive wa letwa hano nduke kukumannya yaga: wilwadze gosi aga u lola ku inyumba ya Israeli.

⁵Na, henza, lya li ho lidigi kyova wenyumba tsimbega tsyosi, na mmukono gwomundu zana ya li nekidundu kyokugera kyobutambi bwakyo bwa li ligera lyamakono gatano na mulala mukono sa mulala na kigalo: ma ya gera ubuliduhu bwelyombakwa, kidundu kilala; na ubudiguluku bwalyo, kidundu kilala.

⁶Ma ya duka ku kiribwa ki henza ivugwe, nokunina ku vikaa vyakyo: na ya gera mukingi gwekiribwa, ubugalamu bwagwo bwa li kidundu kilala: na mukingi gundi ubugalamu bwagwo bwa li kidundu kilala.

⁷Na vigodola vyo tuyumba twavalindi sa kilala kya li nobutambi bwekidundu kilala, na ubugalamu kidundu kilala; na ubwiyangu bwa li hagati hotuyumba zana bwa li ligera lyamakono gatano; na mukingi gwekiribwa kya li ahimbi nolusimbu lwe kiribwa ku luvega lu henza ku inyu mba gwa li kidundu kilala.

⁸Kandi ya gera lusimbu lwekiribwa ku luvega lu henza ku inyumba, kidundu kilala.

⁹Ma ya gera lusimbu lwekiribwa, ligera lyamakono gatano na gavaka; na vigutu vyakyo, ligera lyamakono gayiri; na lusimbu lwekiribwa lwa henza ku inyumba.

¹⁰Na vigodola vyavalindi vyekiribwa ku luvega lwevugwe vya li vivaka ku luvega yilu, na vivaka ku luvega lundi; vyosi vivaka vya li nekigero kilala: na vigutu vya li nekigero kilala ku luvega yilu noku luvega lundi.

¹¹Na ya gera ubugalamu bwobwiyangu bwekiribwa, ligera lyamakono likumi; na ubuta mbi bwekiribwa, ligera lyamakono likumi na gavaka;

¹²na imbiri wevigodola vyavalindi ha li na lukigiti lwe, ligera lyomukono ku luvega yilu, na lukigiti lwe ligera lyomukono mulala ku luvega yilwo; na vigodola vyavalindi, ligera lyamakono gatano na mulala ku luvega yilu, na ligera lyamakono gatano na mulala ku luvega yilwo.

¹³Na ya gera kiribwa kutwula ku ligama lyekigodola kilala kyavalindi kuduka ku ligama lye kindi, ubugalamu bweligera lyamakono makumi gaviri na gatano; mmuliango gu henzana na muliango.

¹⁴Na ya lomba vigutu vyeligera lyamakono makumi gatano na lilala; na mugidzi gwa duka ku vigutu kukumbiridza kiribwa.

¹⁵Na kutwula ha imbiri hekiribwa ha bwingiriru, ha imbiri holusimbu lwomugati mwekiribwa, ha li nobwiyangu bweligera lyamakono makumi gatano.

¹⁶Na vigodola vyavalindi vya li namadirisha ga hanwa, noku vigutu vyakyo ku luvega lwomugati lwekiribwa tsi mbega tsyosi, noku magwalo gavyo kandi; na madirisha ga li ku luvega lwomugati tsimbega tsyosi; na ha li na makindu ku kigutu sa kilala.

¹⁷Ma ya mbila kuduka mu mugidzi gwekyova; na, henza, vya li ho vigodola na lyaalwa lyamagina, lya lomberwa umugidzi hosi: na vya li ho vigodola makumi gavaka ku lyaalwa lyamagina.

¹⁸Na lyaalwa lya li mbalu mweviribwa, lya leng'ana ubutambi bwalyo nobutambi bwekiribwa, lyaalwa lya hasi.

¹⁹Ma ya gera ubugalamu kutwula ku luvega lwembiri womigidzi lwomugati ku luvega lwekyova, ligera lya makono mia, ku luvega lwevugwe, noku luvega lwa kasikasini.

²⁰Na kiribwa kyomugidzi gwe kyova kyelihenza li veye kasikasini, ya gu gera ubutambi bwagwo na ubugalamu bwagwo.

²¹Na vigodola vyagwo vyavalindi vya li vivaka ku luvega yilu na vivaka ku luvega yilwo; na vigutu vyagwo na magwalo gagwo ga leng'ana nekigero kyekiri bwa kyokutanga: ubutambi bwa li ligera lyamakono makumi gatano, na ubugalamu bwa li ligera lyamakono makumi gaviri na gatano.

²²Madirisha gavyo, na magwalo gavyo, na makindu gavyo, vya leng'ana nekigero kyekiribwa kyelihenza lyakyo li veye ivugwe; na vanegira kukyo ku vikaa vitano na viviri; na magwalo gakyo ga li imbiri wavyo.

²³Na ha li nekiribwa kyomugidzi gwomugati ki henzana nekiribwa kindi, ku luvega lwa kasikasini noku luvega lwevugwe; naye ya gera kutwula ku kiribwa kuduka ku kiribwa, ligera lyamakono mia.

²⁴Na ya ndeta ku luvega lwa kusini; na, henza, kya li ho kiribwa ku luvega lwa kusini: na ya gera vigutu vyakyo na magwalo gakyo kuli ligera yili.

²⁵Na ga li ho madi risha mukyo nomu magwalo gakyo hosi, kuli madirisha yago: ubutambi bwakyo bwa li ligera lyamakono makumi gatano, na ubugalamu bwakyo bwa li ligera lyamakono makumi ga viri na gatano.

²⁶Na ha li ne vikaa vitano na viviri kunina kukyo, na magwalo gakyo ga li imbiri wakyo; na kya li na makindu, lilala ku luvega yilu na lindi ku luvega yilwo, ku vigutu vyakyo.

²⁷Na mugidzi gwomugati gwa li nekiribwa kyagwo ku luvega lwa kusini: naye ya gera kutwula ku kiribwa kilala kuduka ku kiribwa kindi ku luvega lwa kusini ligera lyamakono mia.

²⁸Ma ya ndeta kuduka mmugidzi gwomugati gu veye ahimbi ku kiribwa kya kusini: na a gera kiribwa kya kusini, kuli ligera yili;

²⁹na vigodola vyavalindi vyakyo, na vigutu vyakyo, na magwalo gakyo, kuli ligera yili: na kya li namadirisha mukyo, nomu magwalo gakyo tsimbega tsyosi; butambi bwakyo bwa li ligera lyamakono makumi gatano, na bugalamu bwakyo ligera lyamakono makumi gaviri na gatano.

³⁰Nakyo kya li namagwalo kukumbiridza tsimbega tsyosi, butambi bwago bwa li ligera lyamakono makumi gaviri na gatano, na ubugalamu bwago bwa li ligera lyamakono gatano.

³¹Na magwalo gakyo ga li ku luvega lwo mugidzi gwekyova; na makindu ga li ku vigutu vyakyo: na linina lyakyo lya li nevikaa vitano na vibaka.

³²Na ya ndeta mu mugidzi gwomugati gu henza ku luvega lwevugwe: naye ya gera kiribwa kuli ligera yili;

³³Na vigodola vyavalindi vyakyo, na vigutu vyakyo, na magwalo gakyo, kuli ligera yili: nakyo kya li namadirisha mukyo nomu magwalo gakyo hosi; butambi bwakyo bwa li ligera lyamakono makumi gatano, na bugalamu bwakyo bwa li ligera lyamakono makumi gaviri na gatano.

³⁴Na magwalo gakyo ga henza ku luvega lwomugidzi gwekyova; na makindu ga li ku vigutu vyakyo, ku luvega yilu nomu luvega yilwo: na linina lyakyo lya li nevikaa vitano na vivaka.

³⁵Na ya ndeta kuduka ku kiribwa ki henza ku luvega lwa kasikasini: na ya ki gera kuli ligera yili;

³⁶vigodola vyakyo vyavalindi, na vigutu vyakyo, na magwalo gakyo: nakyo kya li namadirisha mukyo hosi; buta mbi bwakyo bwa li ligera lyamakono makumi gatano, na bugalamu bwakyo ligera lyamakono makumi gaviri na gatano.

³⁷Na vigutu vyakyo vya nenza ku luvega lwomugidzi gwekyova; na makindu ga li ku vigutu vyakyo, ku luvega yilu, noku luvega yilwo: na linina lyakyo lya li nevikaa vitano na vivaka.

³⁸Na kigodola na kiliango kyakyo kya li himbi ne vigutu vyeviribwa; ha zana vogidzira kihaanwa kyokusambwa.

³⁹Na mu lusimbu lwekiribwa tsya li ho tsimeza tsiviri ku luvega yilu, na tsimeza tsiviri ku lundi tsyokwiitira ku kihaanwa kyokusambwa, na kihaanwa kyobwoni, na kihaanwa kyamahvolo.

⁴⁰Kandi ku luvega lwekyova, ku buniniru bwo bwingiriru bwekiribwa ku luvega lwa kasikasini, tsya li ho tsimeza tsiviri; noku luvega lundi lwolusimbu lweki ribwa, tsya li ho tsimeza tsiviri.

⁴¹Tsimeza tsine tsya li ku luvega yilu, na tsimeza tsine tsya li ku luvega lundi ahimbi nekiribwa; tsimeza tsitano na tsivaka tsya viitira ku vihaanwa.

⁴²Na tsya li ho tsimeza tsine tsyekihaanwa kyokusambwa, tsya li tsyamagina ga vadzwa, ubutambi bwatsyo bwa li ligera lyomukono mulala ne inusu, na ubugalamu bwatsyo bwa li ligera lyomukono mulala ne inusu, na budiguluku bwatsyo bwa li ligera lyomukono mulala; ku tsyo va vika mibano gya va tumekira kwiita kihaanwa kyokusambwa na kihaanwa kindi.

⁴³Na tsinzago tsyobutambi bwekigalo kilala, tsya kupirwa mukyo hosi: na tsinyama tsyekihaanwa tsya li ku tsimeza zana.

⁴⁴Kandi ku luvega lwekyova lwekiribwa kyomugati, vya li ho vigodola vya avokwimba avomugidzi gwomugati, gwa li ku luvega lwekiribwa kyoluvega lwa kasikasini; na lihenza lyavyo lya henza kusini; kilala kya li ahimbi nekiribwa kyevugwe lihenza lyakyo lya henza kasikasini.

⁴⁵Naye ya mbolera, Kigodola yiki ki henza ku luvega lwa kusini, ki veye kyavasalisi, ava lindanga inyu mba;

⁴⁶na kigodola kya henzanga ku luvega lwa kasikasini ki veye kyavasalisi, ava lindanga ubwali: yava navana va Zadoku, ava li ku avana va Levi, avesunda himbi ku Yahova kumutumekira.

⁴⁷Naye ya gera mugidzi ubutambi bwagwo bwa li ligera lyamakono mia, na bugalamu bweligera lyamakono mia, gwa li mu leng'anu; na ubwali bwa henza ku inyumba.

⁴⁸Ma ya ndeta kuduka ku lusimbu lwenyumba, na ya gera vigutu vyolusimbu sa kilala, ligera lyamakono gatano ku luvega yilu, na ligera lyamakono gatano ku luvega yilwo: na ubugalamu bwekiribwa bwa li ligera lyamakono gavaka ku luvega yilu, na makono gavaka ku luvega yilwo.

⁴⁹Ubutambi bwolusimbu bwa li ligera lyamakono makumi gaviri, na ubugalamu bwalwo bwa li ligera lyamakono likumi na mulala; ku vikaa vya va niniranga ku: kandi tsya li ho tsitiru ahimbi ku vigutu, indala ku luvega yilu, na yindi ku luvega yilwo.