Read lulogooli Ezekieli 43 Bible Online

Ezekieli 43 - lulogooli bible

Ezekieli 43

¹Lwenyima ya mbila kuduka ku kiribwa, kiribwa ki henza ku luvega lwevugwe.

²Na, henza, ubu kumi bwa Nyasaye wa Israeli bwa loleka ku inzira yevugwe: nomwoyo gwigwe gwa li kuli lihoola lyamadzi manene; nelirova lya ng'ering'ana kigira ubukumi bwibwe.

³Na liloleka lilye lya li kuli liloleka lyamalola ga nda lola, amalola ga nda lola lwa ndadza kwononnya lidala; namalola ga li kuli lilola lya nda lola ahimbi nomugera gwa Kebari; na nda gwa hasi mammama.

⁴Na ubukumi bwa Yahova bwingira mu inyumba ku inzira yekiribwa kyoluvega lwevugwe.

⁵Na Roho ya mbugula, ni ya mbika mmugidzi gwomugati; henza, ubukumi bwa Yahova bwizula inyumba.

⁶Na nda hulira mulala a volera inze nomwoyo gu twulanga mu inyumba; nomusatsa mulala ya singira himbi ninze.

⁷Naye ya mbolera, Ive mwana womundu, hano ha veye ha intebe yange yobwami, na ha tsinduvatiru tsyevirenge vyange, ha inze nda menya hagati ha avana va Israeli mihiga nemihiga. Na inyumba ya Israeli il a vula kwononnya lieta lyange litakatifu kandi, yava, kinga avami vavo, ku makuva gavo ga malaya, noku mibiri mikudzu gyavami vavo mu hadiguluku havo;

⁸ku livika umukingi gwavo ahimbi nomukingi gwange, nekigutu kyavo ahimbi nekigutu kyange, kandi ha li nelidigi lyere hagati hange navo; navo vononnya lieta lyange litakatifu ku kivihiri kyavo kya va kola: kunangwa kigira yaga va heridzi mu butima bwange.

⁹Kunangwa va te ihale makuva gavo ga malaya, nemibiri mikudzu gyavami vavo, gyi ve ihale ninze, na nda menya hagati havo mihiga nemihiga.

¹⁰Ive, mwana womundu, u mannye yavo avenyumba ya Israeli inyumba yiyi, va duke kulola tsisoni kigira ubudamano bwavo: navo va gere livalidzwa lyabwo.

¹¹Ni va va veye netsisoni kigira yaga gosi aga va kola, u va mannye lilombwa lyenyumba, neligondo lyayo, nelitwula kyova lyayo, nobwingiriru bwayo, nelifwanana lyayo lyosi, nemiima gyayo gyosi, nelifwana lyayo lyosi, namalago gayo gosi; u ng'ode yivi imbiri wetsimoni tsyavo, na duke kulinda lifwana lyayo lyosi, nemiima gyayo gyosi, nokuvikola.

¹²Yili ni lilaga lyenyumba: kwisonga ye kigulu, ku lwako lwakyo hosi ha la va hatakatifu ligali. Henza, yili ni lilaga lyenyumba.

¹³Na yivi vi veye vigero vyo bwali neligera lyomukono (mukono gu veye mukono nekigalo): ubwikaliru bwabwo bu la va kigero kyomukono mulala, nobugalamu bwabwo kigero kyomukono mulala, na ululiga lwabwo tsimbega tsyosi lu la va kutwula ku kidete kinene kuduka ku kyanyasi; yibu bu la va bwikaliru bwobwali.

¹⁴Kandi isi wabwo kutwula hasi kuduka ku kikaa kyabwo kya hasi bu la va vigero vyamakono gaviri, nobugalamu bwabwo kigero kyomukono mulala; kandi kutwula ku kikaa kikekeke, kuduka ku kikaa kinene, gu la va vigero vyamakono gane, nobugalamu bwabwo kigero kyomukono mulala.

¹⁵Na ubwali bweigulu bu la va vigero vyamakono gane; nokutwula ku bwali aha fwa nangwa muliru nokutsia igulu tsi la va ho tsinziga tsine.

¹⁶Na ha bwa li aha fwanangwa muliru ha la va nobutambi amakono likumi na gaviri nobugalamu amakono likumi na gaviri, ha la va aha leng'anu mu tsimbega tsyabwo tsine.

¹⁷Na kikaa ki la va nobutambi amakono likumi na gane nobugalamu amakono likumi na gane mu tsimbega tsyabwo tsine; na ululiga lwabwo lu la va kigero kye inusu mukono tsimbega tsyosi; na ubwikaliru bwabwo bu la va mukono mulala tsimbega tsyosi; na vikaa vyabwo vi la henza ivugwe.

¹⁸Naye ya mbolera, Ive mwana womundu, Mwami Nyasaye a vola ndi: Miima gya lagwa gyobwali ku lidiku lya bu li lombwa, kuduka kuhaana vihaanwa vyokusambwa kubwo, nokwuha masahi kubwo.

¹⁹Avasalisi Avalevi avolwivulu lwa Zadoku, ava veye ahimbi ku inze, u la va ha kimoli kigiriki kuva kihaanwa kyobwoni, va duke kutumekira inze, Mwami Nyasaye a vola.

²⁰Na ive u la vugula ku masahi gakyo, nokugavika ku tsinziga tsine tsyabwo, noku tsikona tsine tsya vikaa vyabwo, noku luliga lwabwo tsimbega tsyosi: ni ndiyo u li takasa nokulombera yibu kyokukunika ubwoni.

²¹Kandi u la vugula kimoli kyekihaanwa kyobwoni, na u la ki sambira aha lagwa ahenyumba, ikyova wa hatakatifu.

²²Noku lidiku lya kaviri, u la haana ikole indukiru ukuva kihaanwa kyobwoni; na va la takasa ubwali, kuli va bu takasa nekimoli.

²³Lwa u mali kubutakasa, u la haa na kimoli kigiriki kidukiru, na ligondi likole lyekyayo lidukiru.

²⁴Na u h vi leta ahimbi imbiri wa Yahova, navasalisi va la tsuka umunyu ku vyo, na va la vi haana ukuva kihaanwa kyokusambwa ki ve kya Yahova.

²⁵Mu madiku gatano na gaviri u la lomba lidiku sa lilala ikole indala kuva kihaanwa kyobwoni; kandi va la lomba kimoli kigiriki kilala, na ligondi likole lilala li twula mu kyayo, vidukiru vyosi.

²⁶Va la lombera ubwali kyokunika ubwoni mu madiku gatano na gaviri, nokubutakasa; ni ndiyo va li bu takasa.

²⁷Na lwa va mala kudukidza amadiku yago, ku lidiku lya gatano na gavaka nokutsia imbiri, avasalisi va la lomba vihaanwa vyenyu vyokusambwa ku bwali, na vihaanwa vyenyu vyemirembe; na inze nda bugirira mwinye, Mwami Nyasaye a vola.