Read lulogooli Ezekieli 45 Bible Online

Ezekieli 45 - lulogooli bible

Ezekieli 45

¹Kandi lwa mu li gavula kivala na ikura kuva miyandu, mu la haana ku Yahova kisyuviriru, kidieli kitakatifu kyekivala; ubutambi bwakyo bu la va ubutambi bwevidundu tsielfu makumi gaviri na tsitano, nobugalamu bwakyo bu la va vidundu tsielfu likumi: ki la va kitakatifu mu tsinzako tsyakyo tsi kumbiridza tsimbega tsyosi.

²Mu kivala zana ki la va ho kidieli kya hatakatifu ubutambi bwakyo tsimia tsitano, nobugalamu bwakyo tsimia tsitano, ki la va kileng'anu tsimbega tsyosi kandi ligera lyamakono makumi gatano kuva ubwiyangu kukumbiridza tsimbega tsyosi.

³Noku ligera yilyo u la gera ubutambi ubwetsielfu makumi gaviri na tsitano, nobugalamu bwetsielfu likumi: na hagati hakyo hatakatifu ha la va ho, hatakatifu hobutakatifu.

⁴Yiki ni kidieli kitakatifu kyekivala, ki la va kya vasalisi, avatumekiri va hatakatifu, avesundanga kutumekira Yahova; ha la va ho bugono bwetsinyumba tsyavo, na bugono butakatifu bwa hatakatifu.

⁵Nobutambi bwetsielfu makumi gaviri na tsitano, nobugalamu bwetsielfu likumi, bu la va ku, Valevi, avatumekiri venyumba, bu ve miyandu gyavo avene, ku vigodola makumi gaviri.

⁶Na mu la ng'oda miyandu gyavo gyelidala ubugalamu bwalyo tsielfu tsitano, nobutambi bwalyo tsielfu makumi gaviri na tsitano, ki la kagata ku kidieli kya hatakatifu: ki la va kyenyumba yosi ya Israeli.

⁷Ku vyosi yiki ki la va kyomunene, ki la va ku tsimbega tsyombi tsyekisyuviriru kitakatifu na kyemiyandu gyelidala, imbiri wekisyuviriru kitakatifu na mbiri wemiyandu gyelidala, ku luvega lwema dioli, noku luvega lwevugwe; kandi ubutambi bu leng'ane nekidieli kilala kutwula ku lwako lwemadioli kuduka ku lwako lwevugwe.

⁸Mu kivala ki la va kikye kyemiyandu mu Israeli: kandi avanene vange si va la dambidza avandu vange kandi; navutswa va la ha inyumba ya Israeli kivala kuli tsihiri tsyavo.

⁹Mwami Yahova a vola ndi: Ga mu dukira, mwinye avanene va Israeli: mu twulidze kirage nobunuuli, na mu kole likalaga nobulungi; mu twulidze linyaga lyenyu vindu vyavandu vange, Mwami Yahova a vola.

¹⁰Mu la va netsiratili tsinungi, na efa inungi na isiongo inungi.

¹¹Efa na isiongo vi la va vyeligera lilala, isiongo i duke kuleng'ana nekidieli kilala mu likumi vyomudiema, na efa kidieli kilala mu likumi vyomudiema: neligera lyagwo li la londa mudiema.

¹²Na ishekeli i la va nevigero makumi gaviri; na tsishekeli makumi gaviri, na tsishekeli makumi gaviri na tsitano, na tsishe keli likumi na tsitano, tsi la va imaneh yenyu.

¹³Yiki ki veye kisyuviriru kya mu li haana: kidieli kilala mu vitano na kilala kye efa kyomu mudiema gwengano; kandi mu la haana kidieli kilala mu vitano na kilala kyomu mudiema gweshairi;

¹⁴kandi kidieli kya lagiywi kya maguta kyesiongo yamaguta, kidieli kilala mu likumi kyesiongo yomu ikori, i veye tsisiongo likumi, i veye lulemo (kigira tsisiongo likumi tsi duka lule mo);

¹⁵kandi kimeme kyekyayo, kyomu tsimia tsiviri ki twula ku vyayiru vya Israeli vi samangwa bu lahi namadzi; ki ve kihaanwa kyobusie, na kihaanwa kyokusambwa, na vihaanwa vyemirembe, kuva kyokuvakunikira ubwoni, Mwami Yahova a vola.

¹⁶Na avandu vosi vekivala va la haana ku kisyuviriru yiki ki ve kyomunene mu Israeli.

¹⁷Na ki la va kidieli kyomunene kuhaana vihaanwa vyokusambwa, nevihaanwa vyobusie, nevihaanwa vyokunwa, mu masavo genyu, noku lilonda myeli miliva, nomu madiku gamasabato, mu masavo gosi aga lagwa agenyumba ya Israeli: a la lomba kihaanwa kyobwoni, nekihaanwa kyobusie, nekihaanwa kyokusambwa, ne vihaanwa vyemirembe, kukolera inyumba ya Israeli, kyokukunika ubwoni.

¹⁸Mwami Nyasaye a vola ndi: Mu mueli gwokutanga, ku lidiku lyo kutanga lyomweli, u la vugula kimoli kigiriki kidukiru; na u la takasa hatakatifu.

¹⁹Na musalisi a la vugula ku masahi gekihaanwa kyobwoni, nokugavika ku maliva genyumba, noku tsinziga tsine tsyevikaa vyobwali noku vigutu vyekiribwa kyomugidzi gwomugati.

²⁰Na u la kola ndiyo ku lidiku lya gatano na gaviri lyomweli kuvo sa mulala u hyolanga, neku uyu musiru: ni ndiyo mu li kolera inyumba kyokukunika ubwoni.

²¹Ku mueli gwokutanga, ku lidiku lyelikumi na gane lyomweli, mu la va nelilia lyelipasaka, lilia lyamadiku gatano na gaviri; ubukima bu ta li na mamera bu la lagirwa.

²²Ku lidiku yilyo munene a la haana kimoli kuva kihaanwa kyobwoni kyo mwene ne kya vandu vosi avekivala

²³Kandi mu madiku gatano na gaviri aga lisavo a la lomba kihannwa kyokusambwa ku Yahova, tsigiriki tsitano na tsiviri, namabondi makole gatano na gaviri amadukiru lidiku sa lilala ku madiku gatano na gaviri; na ikole indala lidiku sa lilala kuva kihaanwa kyobwoni.

²⁴Naye a la lomba kihaanwa kyobusie, efa indala ku igiriki, na efa indala ku ligondi likole, na ihin indala yamaguta ku efa indala.

²⁵Ku mueli gwegyitano na gyiviri ku lidiku lyelikumi na gatano lyomweli, mu lisavo, a la kola ndiyo mu madiku gatano na gaviri: kuli ku kihaanwa kyobwoni, na kuli ku kihaanwa kyokusambwa, na kuli ku kihaanwa kyobusie, na kuli ku maguta.