Read lulogooli Ezekieli 47 Bible Online

Ezekieli 47 - lulogooli bible

Ezekieli 47

¹Na ya nzirannya kuduka ku kiliangu kyenyumba; na, henza, amadzi ga twula isi womukingi gwenyumba ku luvega lwevugwe (kigira imbiri wenyumba ya henza ku luvega lwevugwe); namadzi ga li ni ga twulanga isi, ku luvega lwomukono mulungi lwenyumba, ku luvega lwobwali lu henza kusini.

²Ma ya ndeta kyova ku inzira yekiribwa kyoluvega lwa kasikasini, na ya mbodonkannyira ku inzira yekyova kuduka ku kiribwa kyekyova, ku inzira yekiribu a ki henza ivugwe; na, henza, amadzi ga li ni ga twulanga ku luvega lwomukono mulungi.

³Mundu uyu lwa ya tsia ku lulwevuzwe, na ya li nomugoye gwokugera mmukono gwigwe, ya gera ligera lvamakono eifu, na ya mbitidza hagati ha madzi, amadzi ga duka ku vidze Jedzege vyevirenge vyange.

⁴Kandi ya gera elfu, na ya mbitidza hagati ha madzi, namadzi ga duka ku masigamo. Kandi ya gera elfu, na ya mbitidza hagati ha madzi, amadzi ga duka ku kikenge.

⁵Lwenyima ya gera kandi elfu; nagwo gwa li mugera agwa nda vula kunyala kwambuka; kigira amadzi ga kira ligali, amadzi agomundu a nyala kwerema mugo, mugera gu ta nyala kwambukwa nevirenge.

⁶Na ya mbolera, Ive mwana womundu, u loli inkuva yiyi? Ma ya ndeta, nokunzirannya kandi ku luginga lwomugera.

⁷Lwa nda li ni nzirani henza, ku uluginga lwomugera gya li ho misala minyingi ku luvega yilu nengereka.

⁸Ma ya mbolera, Amadzi yaga aga twulanga kutsia ku luvega lwekivala kyevugwe, ga lika kutsia ku kyangalangwi; na ga la tsia ku luvega lwenyanza; ga twulanga ha zana ga la tsia mu inyanza; namadzi genyanza ga la honywa.

⁹Na ga la duka ndi, vilembe vyosi vi veye mwoyo, vyaala ho, hosi hemigera gyi li duka, vi la hona; kandi ha la va netsisudzi tsinyingi; kigira amadzi yaga ga duka yo, namadzi genyanza ga la honywa, halala na vilombe vyosi hosi homugera gu duka.

¹⁰Na ga la duka, avaluvi va la singira ku luginga lwagwo; kutwula ha Engedi kuduka Enegilaim ha la va hokuvagala miluvo gyavaluvi; tsisudzi tsi la va ku tsing'ano tsyatsyo, kuli tsisudzi tsyenyanza inene, tsinyingi ligali.

¹¹Navutswa hobudohi bu veye, nevidende vyagwo, ha la vula kuhonywa; ha la lekwa kuva ahomunyu.

¹²Na ahimbi ku mugera ku luginga lwagwo, ku luvega yilu na engereka, misala gyosi gyevyokulia gyi la mera, gyamatu gagyo ga vula kuniala, kandi amakuyu gagyo ga vula kugeha: gyi lama amakuyu mahya umweli sa mulala, kigira amadzi gagwo ga twula hatakatifu; namakuyu gagyo ga la va vyokulia, namatu gagyo ga la va agokuhonnya.

¹³Mwami Nyasaye a vola ndi: Yilu lu la va ulwako, lwa mu li gavulira ku kivala ki duka kuva miyandu kuli tsihiri likumi na tsiviri tsya Israeli: Yosefa a la va nevidieli viviri.

¹⁴Na mwinye mu la ki nyola kuva miyandu, mulala kuli wundi; kigira ndisuha kukyo kukihaana ku vaguga venyu: nekivala yiki ki la va ku mwinye kuva miyandu gyenyu.

¹⁵Lwako lwekivala yikyo lu la va yilu: Ku luvega lwa kasikasini, kutwula ku inyanza inene, ku inzira ya Hethilon, kuduka ha bwingiriru bwa Zedadi;

¹⁶Hamathu, na Berotha, na Sibiraim, li veye hagati holwako lwa Damasko nolwako lwa Hamathu; Hazerihatikon, li veye ahimbi nolwako lwa Hauran.

¹⁷Na ulwako kutwula ha inyanza, lu la va Hazar enan ku lwako lwa Damasko, na kasikasini ku luvega lwa kasikasini lu veye lwako lwa Hamathu. Yilu lu veye ku luvega lwa kasikasini.

¹⁸Na ku luvega lwevugwe, hagati ha Hauran na Damasko na Gileadi na kivala kya Israeli, lu la va mugera gwa Yordani; mu la gera kutwula ku lwako lwoluvega lwa kasikasini, kuduka ku inyanza yevugwe. Yilu lu veye luvega lwevugwe.

¹⁹No luvega lwa kusini kuhenza kusini lu la va kutwula Tamaru kuduka ku madzi ga Meribokadesh, kuduka ku mugera gwa Egepeti, kuduka ku inya nza inene. Yilu lu veye luvega lwa kusini kuhenza kusini.

²⁰Noku luvega lwa madioli lu la va inyanza inene, kutwula ku lwako lwa kusini kuduka kuhenza ku bwingiriru bwa Hamathu. Yilu lu veye luvega lwe madioli.

²¹Ni ndiyo mu legavulira avene kivala yiki kuli tsihiri tsya Israeli.

²²Na ga la duka, mu la ki gavula ne ikura kuva imiyandu hagati henyu avene, na hagati ha avageni ava menyanga hagati henyu, ava livulira avana hagati henyu; va la va ku mwinye kuli avivule venyu hagati ha avana va Israeli; va la va nemiyandu halala na mwinye hagati hetsihiri tsya Israeli.

²³Na ga la duka, ihiri yomugeni a menya hagati hayo, mu la mu ha ha zana miyandu gyigye, Mwami Nyasaye a vola.