Read lulogooli Ezekieli 5 Bible Online

Ezekieli 5 - lulogooli bible

Ezekieli 5

¹Na ive, mwana womundu, vugula kivavi kyogi; wenyolire kuli U vugulanga lugembe lwombegi, u lu vitidze ku mutwe gugwo noku tsinderu tsitsyo: kandi u vugule tsiratili kugera, nokugavula lisu zana.

²Kidieli kyevivaka u ki sambe mmuliru hagati helidala, lwa madiku geliku mbiridzwa ga dukidzwa; kidieli kyevivaka kindi u la vugula, na u la ki tema nekivavi kulivodonkannya tsimbega tsyosi; na kidieli kyevivaka kindi u la ki ta imbuudza i duke kukidumula, na nda somola kivavi kuvalonda.

³Na u vugule ku lisu yilyo likekeke, u li bohe ku lukigiti lwevitweya vivyo.

⁴Kandi vugula lyene yilyo u li te mu muliru, u li sambe mu muliru; Iisu yilyo muliru gu la twula ku nokwingira mu inyumba yosi ya Israeli.

⁵Mwami Nyasaye a vola: Yili ni Yerusalemi; nda li vika hagati hetsihiri, nevivala vya li kumbiridza yiyi neyiyi.

⁶Naye yebaali ku likalaga lyange ku likola budamano kuvita tsihiri, noku amalago gange kuvita vivala vya li kumbiridza; kigira va sula likalaga lyange, noku makuva gamalago gange, si va genda mugo mba.

⁷Kigira yaga Mwami Nya saye a vola: Kigira mwinye mwa kola kivihiri kuvita tsihiri tsyakumbiridza mwinye, na si mwa genda mu malago gange, kandi si mwa gumira likalaga lyange, kandi si mwa londa miima gyetsihiri tsya kumbiridza mwinye;

⁸kigira yaga Mwami Nyasaye a vola: Henza, inze, kali inze mbeye musigu ku ive; na nda kola likalaga hagati hoho imbiri wetsihiri.

⁹Na nda kola mu ive aga nkikiri kukola, kandi si ndi kola kandi ku lugano lwago mba, kigira kivihiri kikyo.

¹⁰Kigira yaga avadada va la lia avana vavo hagati hoho, navana va la lia avadada vavo na nda kola likalaga mu ive; nelitigaia ku ive lyosi nda li salannya ku tsimbuudza tsyosi.

¹¹Kunangwa, kuli mbeye mwoyo Mwami Nyasaye a vola, ligali, kigira ive wononnya ha butakatifu hange nevindu vyosi vyokuvihiriridza nekivihiri kikyo kyosi, kigira yaga nda ku gehidza; imoni yange si i la ku vera tsimbabasi mba, na inze si nda ku vererera mba.

¹²Kidieli kikyo kyevivaka ki la kudza nobulwaye na va la heridzwa hagati hoho nenzala; nekidieli kyevivaka ki la gwa nekivavi ku tsimbega tsitsyo, neki dieli kyevivaka nda ki salannya ku tsimbuudza tsyosi, na nda somola kivavi ki va londe.

¹³Ni ndiyo ubutima bwange bu la dukidzwa, na nda malira ubutima bwange kuvo, na nda leminywa mwoyo: navo va la manya inze, Yahova, mbola mu likendeka lyange lwa ndi twekidza ubutima bwange kuvo.

¹⁴Kandi nda kola ive kuva hatswa namanyego mu tsihiri tsya kumbiridza ive, imbiri wetsimoni tsya yavo vosi ava vitanga.

¹⁵Ni ndiyo yaga ga la va amanyego neki henyahenye, nemegidzo, neligenya, ku tsihiri tsya kumbiridza ive, lwa ndi kalaga hagati hoho mu butima nomu livihirirwa, nomu ligondokera lyomuliru (inze, Yahova mmali kuvola yaga);

¹⁶lwa ndi tuma kuvo mibano midamano gyenzala, gyi veye ku lidividza, gya ndi leta kumudividza. Na nda meda inzala ku mwinye, nokuvunannya umudigiru gwobukima;

¹⁷nda leta ku ive inzala netsinyama tsindulu, natsyo tsi liita avana vovo; nobulwaye namasahi vi la vita hagati hoho; nda leta kivavi ku ive: Inze, Yahova, mmali kuvola yaga.