Read lulogooli Danyeli 2 Bible Online

Danyeli 2 - lulogooli bible

Danyeli 2

¹Ku muhiga gwa kaviri gwelyameha lya Nebukadinezaru, Nebukadinezaru ya lota maloto; na roho gwigwe gwa henda, kandi tsindolo tsitsye tsya mu leka.

²Hene yaho mwami ya haana munwa kulanga avakumu, na avasegetiri, na avagongoyi, na Vakalidei, va volere mwami amaloto gege. Kunangwa vadza ni va singira imbiri womwami.

³Na mwami ya va volera, Ndoti liloto, na roho gwange gu henda kumanya liloto zana.

⁴Hene yaho Avakalidei va volera mwami nolulimi lwa Kisiria, O mwami, u menye mihiga nemihiga; u volere avatumekiri vovo liloto zana, na kwinye ku la ku mannya livuula lyalyo.

⁵Mwami ya tivula na a volera Avakalidei, Likuva zana li twula ku inze; ni mu va ni mu ta mmannya liloto ne livuula lyalyo, mu la temanywa vidonye, kandi tsinyumba tsyenyu tsi la kolwa isina.

⁶Navutswa ni mba ni mu mbolera liloto ne livuula lyalyo, mu la nyola ku inze vihaanwa na madanyi, nelidzominywa linene: kunangwa mu mmannye liloto nelivuula lyalyo.

⁷Navo va tivula hali kaviri ni va vola, Mwami u mannye kwinye, avatumekiri vovo, liloto, na kwinye ku la mannya livuula lyalyo.

⁸Mwami ya tivula na a vola, Manya ligali mwinye mwenya kunyola ubwiyangu, kigira mu lola likuva lvene li twuli ku inze.

⁹Navutswa ni mu va ni mu vula kummannva liloto, gu veye ho munwa mulala ku mwinye; kigira rnu lombi amakuva gobubehi na gobudamano kuvola imbiri wange, kuduka inyinga i luhe i girunkane: kunangwa mu mbolere liloto, na inze nda manya mu nyala kummannya livuula lyalyo.

¹⁰Avakalidei va tivula imbiri womwami, na va vola Si ha li nomundu mu lirova u nyala kuvuula likuva lyomwami, kigira si ha li nomwami, kinga munene, kinga munyampara, wa teva likuva kuli yili ku mukumu, kinga ku musegetiri, kinga ku Mukalidei.

¹¹Nalyo li veye likuva li ta li lya kazozo lyomwami yenyanga, kandi si ha li no wundi u nyala kuvuula likuva yili imbiri womwami, ni va ta li vanya saye, avelimenya lyavo si li veye na avombiri.

¹²Kigira yaga mwami ya vihirirwa na a va nobutima ligali, na a haana munwa avandu avobugeeri vosi va Babuloni va dividzwe.

¹³Kunangwa munwa yigu gwa landa, na avandu avageeri va li kwiitwa; kandi venya Danyeli navakye veve viitwe.

¹⁴Hene yaho Danyeli ya tivula nobugeeri nobuhokya ku Arioku munyampara wavalindi vomwami, wa li na a twuli kutsia kwiita avandu vobugeeri va Babuloni;

¹⁵ya tivula na a volera Arioku munyampara womwami, Kigira ki munwa gwomwami gu veye nobwangu ndi? Ma Arioku ya vuulira Danyeli likuva zana.

¹⁶Na Danyeli yingira, ni yenya mwami a mu lage inyinga, a duke kuvuulira mwami livuula zana.

¹⁷Hene yaho Danyeli ya tsia ha inyumba yeye, na a volera Hanania, Mishaeli, na Azaria, avakye veve likuva zana:

¹⁸va saale ku Nyasaye womigulu, tsimbabasi ku likuva yili li viseywi, Danyeli na avakye veve va vule kudividzwa halala na avandi avandu avageeri va Babuloni.

¹⁹Ku nangwa likuva li viseywi zana lya vuulwa ku Danyeli mu malola gobu diku. Hene yaho Danyeli ya santidza Nyasaye womigulu.

²⁰Danyeli ya tivula na a vola, Lieta lya Nyasaye li gasidzwe imihiga nemihiga; kigira ubugeeri netsingulu ni vivye.

²¹Na a girunkannyanga tsinyinga ne imihiga; a twulidzanga avami, nokuvika avami; a hedzanga avageeri ubugeeri, na limanya kuvo ava veye nelihulira;

²²a vuulanga ivindu vi veye mu luliva nomu liviswa; a manyanga vi veye mu kisundi, na ubulavu bu menyanga halala naye.

²³Nsantidzanga, nokukwidzominya, ive Nyasaye wavaguga vange, wa mpa ubugeeri netsingulu, na kalunu u mali kumannya inze likuva lya kwa teva ku ive; kigira u ku vuuliye likuva lyomwami.

²⁴Kunangwa Danyeli ya tsia kwingira wa Arioku, womwami ya vika kudividza avandu avobugeeri va Babuloni; ya tsia na a mu volera ndi: U ta dividza avandu avobugeeri va Babuloni; u ndukidze imbiri womwami, na inze nda vuulira mwami livuula zana.

²⁵Hene yaho Arioku ya hila Danyeli bwangu kuduka imbiri womwami, na a mu volera ndi, Inze nyoye mundu ku avana vobuhambe bwa Yuda, uyu a la vuulira mwami livuula zana.

²⁶Mwami ya tivula na a volera Danyeli, welieta lindi lya li Beliteshazaru, Ive u nyala kumbuulira liloto lya nda lota, halala na livuula lyalyo?

²⁷Danyeli ya tivula imbiri womwami, na a vola, Likuva lyo mwami yenya avageeri, na avasegetiri, na vakumu, na avang'oli vosi, si va nyala kuvuulira mwami;

²⁸navutswa ha veye ho na Nyasaye migulu u vuulanga vi viseywi, uyu u mannyi mwami Nebukadinezaru, makuva aga li va ho mu madiku gekiheri. Liloto lilyo, na malola gomutwe gugwo ku kitali kikyo, ga veye yaga:

²⁹Ku ive, O mwami, tsiganagani tsitsyo tsingira mu mwoyo gugwo ku kitali kikyo, ni ki, ki la duka inyinga yekiheri; na uyu u vuulanga agaviseywi u vuuliye ive aga li kolwa.

³⁰Na vutswa ku inze, agaviseywi si ga vuuleywi ku inze kigira ubugeeri bwa mbeye nabwo kuvita avandi ava veye mwoyo, navutswa li veye livuula ii dukidzwe ku mwami, kandi ive u duke kumanya tsiganagani tsyomwoyo gugwo.

³¹Ive, O mwami, wa lola, na, henza, kifwananyi kinene. Kifwananyi yiki, kya li nobunene, na ubung'ereng'anu bwakyo bwa li bulahi, kya singira imbiri wowo; na liloleka lyakyo lya li nobutihidzi.

³²Ku kifwananyi yiki, mutwe gwakyo gwa li gwethahabu indahi, na kiritu kyakyo na makono gakyo ga li gefetha, na inda yakyo na matango gakyo ga li gomugasa,

³³na virenge vyakyo vya li vyekivya, na tsinduvatiru tsyakyo tsya li tsyekivya kidieli kilala, na kindi kya li ubudohi.

³⁴Ive wa lola kuduka ligina lya twulidzwa bugira makono, lya duya kifwananyi ku virenge vyakyo vya li nekivya nobudohi, nokuvidonyannya vidonye.

³⁵Hene yaho kivya, nobudohi, nomugasa, nefetha, na ithahabu, vya donyannywa halala, nokugwa kuli mukudzi gwo uloze gwekimei; na imbuudza ya vi hila, kuduka vi ta li na hokuva: na ligina lya duya kifwananyi lya gwa kigulu kinene, nokwizula lirova lyosi.

³⁶Yili ni liloto; na kwinye ku la vuulira mwami livuula lyalyo.

³⁷Ive, O mwami, u veye mwami wa vami, wa Nyasaye womigulu ya ku ha ubwami, ubunene, na tsingulu, na lidzominywa;

³⁸kandi hosi ha avana va vandu va menyanga, na tsinyama tsyomwigendanyama, na manyonyi gombwerefu, u viki mmkono gugwo, kandi u kwamehidzi ku vyosi: ive u veye mutwe gwethahabu.

³⁹Kandi inyima wowo bu la duka ubwami bundi uboke ku ive; na ubwami bwa kavaka bwomugasa, bu lameha ku lirova lyosi.

⁴⁰Na ubwa mi bwa kane bu la va netsingulu kuli kivya, kigira kivya ki donyannyanga nokuguuta vyosi; kandi kuli kivya ki shonolanga yivi vyosi, bu la donyannya nokushonola.

⁴¹Kandi kuli ive wa lola tsinduvatiru na vino vyakyo, vya li vyobudohi bwomulongi, kandi vyekivya, ubwami yibwo bu la va bwelyavukana; navutswa mubwo tsi la va mu tsingulu tsyekivya, kuli wa lola kivya ki tsugannyeywi nobudohi budotidziywi.

⁴²Kandi kuli vino vyevirenge vya li vyekivya, nevyo budohi, na ndiyo ubwami bu la va netsingulu nobusasuguku.

⁴³Kandi kuli ive wa lola kivya ki tsugannyeywi nobudohi ubdotidzwi, va letsukannya nevisukululwi vyavandu; navutswa si va li hambana mba, kuli kivya si ki nyala kuhambana nobudohi.

⁴⁴Kandi mu madiku ga avami yavo Nyasaye womigulu a la singeridza ubwami bu li vula kudiva mihiga nemihiga, na ubwami bwabwo si bu li lekwa kuva bwehiri yindi; navutswa bu la donyannya nokuheridza ubwami yibwo bwosi, na bwene bu la singira mihiga nemihiga.

⁴⁵Kuli ive wa lola ligina lya twulidzwa ku kigulu bugira makono, na lya donyannya kivya, nomugasa, nobudohi, nefetha, nethahabu; Nyasaye munene u mannyi mwami amakuva gevindu vi li va ho mu madiku gadzanga: na liloto li veye lyeligali, na livuula li veye lyeligali.

⁴⁶Ma mwami Nebukadinezaru ya gwa mammama, nokusigamira Danyeli, na ya haana munwa va mu letere ikihaanwa ne vi funyanga mwayu.

⁴⁷Na mwami ya tivula na a volera Danyeli, na a mu volera, Ligali, Nyasaye wowo a veye Nyasaye wa vanyasaye, na umwami wa avami, na muvuuli wevindu vya viswa, kigira wa nyala kumbuulira liviswa yili.

⁴⁸Ma mwami ya kola Danyeli kuva munene, na a mu ha madanyi manyingi, nokumwamehidza ku iprovinse ya Babuloni, nokuva munene ku avandu avageeri va Babuloni.

⁴⁹Na Danyeli ya saava mwami, na ya vika Shadaraka, na Meshaka, na Abedinego, va ve ku makuva ga iprovinse ya Babuloni: navutswa Danyeli mwe ne ya li mu kiribwa kyomwami.