Read lulogooli Danyeli 6 Bible Online

Danyeli 6 - lulogooli bible

Danyeli 6

¹Ga yanzeka ku Dario a vike ku bwami avagovuna mia na makumi gaviri, ava li mu bwami bwosi;

²noku yava ya vika avimiriri vavaka, na Danyeli ya li mulala kuvo; avanene va lete kuvo makuva, na mwami a vule kunyola ubwoneku.

³Ma Danyeli yidzominywa kuvita avimiriri avakye veve kandi avagovuna, kigira roho mulahi gwa li muye; na mwami ya ganagana kumuvika ku bwami bwosi.

⁴Kunangwa avagovuna na avanene venya kunyola kindu ku Danyeli mu miyinzi gyobwami; navutswa si va nyala kunyola kindu kinga lihyolo, kigira ya li musuuvirifu, kandi lihyolo kinga kikyamu si vya nyoleka kuye.

⁵Kunangwa avandu yava va vola, Si ku la nyola kindu ku Danyeli, ni ki ta li mu makuva gelilaga ga Nyasaye wewe.

⁶Kunangwa avakulundu yava navagovuna va vugana ha lala imbiri womwami, ni va mu volera ndi, Mwami Dario, u hindire mihiga gyosi.

⁷Avimiriri vosi vobwami, na vanyampara, na avanene, na avavoli na vagovona, va volerana avene kusingeridza munwa gwomwami, nokulomba likuva lyelilaga linene, kuvola, Mundu ku vosi yenya kusaala kindu ku munyasaye kinga ku mundu, mu tsinyinga tsyamadiku makumi gavaka, ni ga ta li ku ive, O mwami, a la tebwa mu luhangaywa lweving'ang'a.

⁸Kalunu, O mwami, u singeridze likuva lyelilaga yili, nokuvika lieta ku mang'oda yaga, ga vule kugirunkanywa, kuli lilaga lya Vamedi na Vapersia, gu vula kugirunkana.

⁹Kunangwa mwami Dario ya vika lieta ku mang'oda gelilaga zana.

¹⁰Na lwa Danyeli ya manya mang'oda ga vikeywi lieta, ya tsia mu inyumba yeye (nu u manyi madirisha gege ga li malamu mu inyumba yeye kuhenza ku luvega lwa Yerusalemi); naye y a sigama hali kavaka ku lidiku, na a saala, na a santidza imbiri wa Nyasaye wewe, kuli wa ya kolanga ku matsyambiri.

¹¹Kunangwa avandu yava va vugana halala, ni va nyola Danyeli ya li mu lisaala nomu lihomba imbiri wa Nyasaye wewe.

¹²Ma visunda himbi, nokuvola imbiri womwami ku lilaga lyomwami: Ive si u viki lieta ku mang'oda gelilaga, ku vosi mundu u saala kindu ku munyasaye kinga ku mundu mu tsinyinga tsya madiku makumi gavaka, ni ga ta li ku ive, O mwami, a tebwe mu luhangaywa lweving'ang'a? Mwami ya tivula na a vola, Ga veye geligali, kuli lilaga lya Vamedi na Vapersia, gu vula kugirunkana.

¹³Ma va tivula ni va vola imbiri womwami, Danyeli uyo u veye ku avana velyadikidzwa lya Buyuda, si a hulira ive, O mwami, na lilaga lya wa vika ku lieta, navutswa a kolanga lisaala lilye hali gavaka ku lidiku.

¹⁴Hene yaho mwami, lwa ya hulira makuva yaga, ya verera ligali, na a vika mwoyo gwigwe ku I)anyeli kumuhonnya; na ya nyankana ku limuhonnya kuduka liuva lya yera.

¹⁵Ma avandu yava va vugana imbiri womwami, ni va volera mwami, Ive, O mwami, u manye, li veye lilaga lya Vamedi na Vapersia, ku lilaga kinga munwa gwomwami a singeridza si gu nyala kugirunkanywa.

¹⁶Ma mwami ya haana munwa, ni va leta Danyeli, ni va mu ta mu luhangaywa lweving'ang'a, Ma rnwami ya moloma na volera Danyeli, Nyasaye wowo wa u tumekiranga kazozo, a la ku honnya.

¹⁷Kandi li gina lya letwa, ni li vikwa ku munwa gwoluhangaywa; na mwami ya kupa ku muhuri gwigwe ne gya avanene veve, ku gosi ga Danyeli kali lilala li vule kugirunkanywa.

¹⁸Ma mwami ya tsia mu inyumba yeye yobwami, na a linda ubudiku yibu na a vula kulia, kandi vyosi vi kupangwa si vya letwa imbiri wewe mba: na tsindolo tsitsye tsya mwiruka.

¹⁹Mwami ya singira mugamba tsuri ligali, na a tsia tsimbiru ha luhangaywa lweving'ang'a.

²⁰Na lwa yisunda himbi ha luhangaywa lwa Danyeli ya li mu, ya hanzuka nomwoyo gwobuvereri; mwami ya moloma na a volera Danyeli, O Danyeli, mutumekiri wa Nyasaye u veye mwoyo, Nyasaye wowo, wa u tumekira kazozo, a nyala kukuhonnya u twule mu ving'ang'a?

²¹Ma Danyeli ya volera mwami, O mwami, u hindire mihiga gyosi?

²²Nyasaye wange u tumi ingelosi wewe, u hani minwa gyeving'ang'a, na vi vuli kundira; kigira ndolekanga imbiri wewe bugira kindu; kandi imbiri wowo, O mwami, si nzoni kindu kali kilala.

²³Ma mwami ya sangala ligali, na a haana munwa Danyeli a twulidzwe mu luhangaywa. Kunangwa Danyeli ya twulidzwa mu luhangaywa na si va nyola kuye tsimbala kali indala, kigira ya li ni ya suuvira Nyasaye wewe.

²⁴Kunangwa mwami ya haana munwa, ni va leta avandu yavo, ava yala Danyeli, na va va ta mu luhangaywa lweving'ang'a, avene, na avana vavo, na avakali vavo; na ving'ang'a vya va guuta, ni vi vunannya vigumba vyavo vyosi, ni va kikiri kuduka hasi mu luhangaywa.

²⁵Kunangwa mwami Dario ya ng'odera avandu vosi, avetsihiri tsyosi, na avetsinimi tsyosi, ava menya mu lirova lyosi: Mirembe gyi medeke ku mwinye.

²⁶Inze mbaana munwa, mu bwami bwange bwosi, avandu va degere nokutia imbiri wa Nyasaye wa Danyeli; kigira a veye Nyasaye u veye mwoyo, na a hindi ranga mihiga nemihiga, na ubwami bwibwe nibwo bu li vula kudividzwa; na ubwami bu la menya kuduka ku kiheri:

²⁷a honyanga nokusola, na a kola vilolekidzu, nevyokugenya mu ligulu nomu lirova, wa honnya Danyeli mu tsingulu tsyeving'ang'a.

²⁸Ma Danyeli uyu ya menya bulahi mu lyameha lya Dario, nomu lya Kiru Mupersia.