Read lulogooli Danyeli 9 Bible Online

Danyeli 9 - lulogooli bible

Danyeli 9

¹Mu muhiga gwokutanga gwa Dario mwana wa Ahasueru, wa li ku kisukululwi kya Avamedi, wamehidzwa ku bwami bwa Vakalidei

²mu muhiga gwokutanga gwelyameha lilye, inze, Danyeli, nda manya ku vitabu hesabu yemihiga ya makuva ga Yahova aga duka ku Jeremia muprofeti, ku litwekidza lyelyoneka lyelidala lya Yerusalemi, gyi veye mihiga makumi gatano na gaviri.

³Na nda yekidza tsimoni tsyange ku Mwami Nyasaye, kwenya mu lisaala, nomu lihomba, mu lihonga lilia, nomu tsingubo tsyeligunia, nomu ligoke.

⁴Na nda saala Yahova Nyasaye wange, nokweyama ubwoni, nokuvola, O Mwami, Nyasaye munene nowokutihidza, u gumiranga lilagana, netsimbabasi navo ava mu yanzanga nokugumira malago gege,

⁵kwinye kwoni, nokukyaminya amakuva, nokukola ubudamano, nokwebaala, kuduka ku goveye kutwula ku megidzo gogo, na amalago gogo;

⁶kandi si kwa hulira avatumiki vovo avaprofeti, ava volera avami vetu, na avanene vetu, na avaguga vetu, na avandu vosi vekivala, mu lieta lilyo.

⁷O Mwami, ubulungi bu veye bubwo, navutswa ubweluliri bwommoni bu veye bwetu, kuli ga veye lero; ku avandu ve Buyuda, noku avamenya mu Yerusalemi, noku Vaisraeli vosi, ava veye himbi na ava veye ihale, mu vivala vyosi ava ive wa ku kunga kuduka muvyo, kigira mahyolo gavo ga va hyola ku ive.

⁸O Mwami, ubweluliri bwomoni bu veye bwetu, nobwa avami vetu, nobwa vanene vetu, nobwa avaguga vetu, kigira kwoni ku ive.

⁹Tsimbabasi nelisameha vi veye vyo Mwami wetu Nyasaye; kigira kwinye ku mwebaala:

¹⁰kandi si ku huliye mwoyo gwa Yahova Nyasaye wetu, kugenda mu malago gege, ga ya ku vikira mu makuva gavatumiki veve avaprofeti.

¹¹Yee, Vaisraeli vosi vononnyi malago gogo, nokugovera, va vule kuhulira mwoyo gugwo: kigira yaga lilaamwa li tsyukeywi ku kwinye, na lisuha lya ng'odwa mu malago ga Musa mutumiki wa Nyasaye; kigira kwoni kuye.

¹²Kundi amakuva gege ga ya kola ku kwinye, noku avakalagi vetu ava ku kalagira u ga singeridzi, mu lileta ku kwinye kivi kinene; kigira isi welilgulu lyosi ga vuli kukolwa kuli ga koleywi Yerusalemi.

¹³Kuli ga ng'owa mu malago ga Musa, kivi yiki kyosi ki duki ku kwinye: navutswa si ku saala liverererwa lya Yahova Nyasaye wetu, kweganire kuleka ubudamano bwetu, nokuva nelimanya mu ageligali gogo.

¹⁴Kigira yaga Yahova ya linda kivi, nokukileta ku kwinye; kigira Yahova Nyasaye wetu a veye wobulungi mu miyinzi gyigye gyosi gya a kolanga, na kwinye si ku huliye mwoyo gwigwe.

¹⁵Na kalunu, O Mwami wetu, Nyasaye wa twulidza avandu vovo mu kivala kya Egepeti nomukono gwetsingulu, nokwenyolera ubukumi, kuli bu veye lero; kwinye kwoni, kandi ku koli ubudamano.

¹⁶O Mwami, kuli ubulungi bubwo bwosi nku saalanga ligali, u leke ubutima bubwo nelivihirirwa lilyo vi girunkanywe kutwula ku lidala lilyo Yerusalemi, kigulu kikyo kitakatifu; kigira ku bwoni bwetu, noku mahyolo gavaguga vetu, Yerusalemi na avandu vovo va gwiye amanyego ku vosi ava menya ku tsindulu tsyetu tsyosi.

¹⁷Kalunu kigira yaga, O Nyasaye wetu, u hu lire lisaala lyomutumekiri wowo, nelihomba lilye, u kole mumoni mumwo kwaaka ku hatakatifu hoho honeka, kandi kigira Mwami.

¹⁸O Nyasaye wange, u tegidze ugutu gugwo, u hulire; u kunule tsimoni tsitsyo, u henze ubwoneku bwetu, na lidala li langwa ku lieta lilyo: kigira si ku sunda masaava getu imbiri wowo kigira ubulungi bwetu avene, navutswa kigira tsimbabasi tsitsyo tsinene.

¹⁹O Mwami, u hulire; O Mwami, u sarnehe; O Mwami, u hulire nokukola; u ta lindagira, kigira ive mwene, O Nyasaye wange, kigira lidala lilyo na avandu vovo va langangwa ku lieta lilyo.

²⁰Inyinga nda li mu livola, nomu lisaala, nomu lyeyama ubwoni bwange nobwoni bwa avandu vange Israeli, nokusunda lisaala lyange imbiri wa Yahova Nyasaye wange kigira kigulu kitakatifu kya Nyasaye wange;

²¹yee, inyinga nda li ni mbola mu lisaala, mundu Gabirieli wa nda lola mu malola matsyambiri, a bulukidzwe bwangu, ya ndira himbi inyinga yokuvuyidza ubwali bwa mgolova.

²²Ya mmannya, na a volerana ninze, na a vola, O Danyeli, inze kalunu nzidzi kukuha ubugeeri na limanya.

²³Inyinga yokutanga lisaala lilyo, munwa gwa haanwa, na inze nzidzi kukuvolera kigira ive u yanzeywi ligali: kigira yaga u ganagane inkuva, nokuhulira malola.

²⁴Masidza makumi gatano na gaviri ga lageywi ku avandu vovo noku lidala litakatifu lilvo, kutwekidza mahyolo, nokuheridza ubwoni, nokukola kyokukunika ubwoni, nokuleta ubulungi bwemihiga nemihiga, nokuvika muhuri ku malola noku buprofeti, noku vaka maguta hatakatifu hokuvita.

²⁵Kunangwa u manye nokuhulira, kutwula inyinga yelihaana munwa kwirannya ubuhya, nokwombaka Yerusalemi, kuduka ku uyu u vakeywi, Munene, ga la va masidza gatano na gaviri, kandi masizda makumi gatano na lilala na tsisuvi tsiviri: li lombakwa kandi, halala netsinzira tsyalyo, nelugaga lwalyo, mu tsinyinga tsyekivi.

²⁶Kandi inyima wa masidza makumi gatano nelilala na tsisuvi tsiviri, uyu u vakeywi a la temannywa, na a la va bugira kindu: na avandu vomunene u liidza va lononnya lidala na hatakatifu; na kiheri kyalyo ki la va halala na amadzi manene, na kuduka ku kiheri ha la va nelihe; likola hatswa li saavirwa.

²⁷Na a la kola lilagana lidinyu na vanyingi ku inyinga yelisidza lilala: na ku inyinga yenusu yelisidza a la heridza isadaka na kihaanwa; na uyu u kolanga hatswa a ladza ku tsimbaha tsye livihiriridza; kuduka ku kiheri ligali, na yikyo kya saavirwa, ubutima bu la tsukwa ku yava va hatswa.