Read lulogooli Hosea 1 Bible Online

Hosea 1 - lulogooli bible

Hosea 1

¹Likuva lya Yahova lya duka ku Hosea mwana wa Beeri, mmadiku ga Uzia, Jotham, Ahazu na Hezekia, avami va Buyuda, nomu madiku ga Jeroboam mwana wa Joashu, mwami wa Israeli.

²Lwa Yahova ya tanga kuvola nomunwa gwa Hosea, Yahova ya volera Hosea, Tsia, u kwe mukali muheyi navana vobuheyi; kigira kivala ki kolanga ubuheyi ubunene, ku lileka Yahova.

³Ma ya tsia na a kwa Gomeri mukana wa Dibilaim; naye ya vereka na yivula mwana muyai.

⁴Na Yahova ya mu volera, U mu gulike lieta lilye Jezireeli; kigira i kikiri inyinga inkekeke, nda vanza kisalya amasahi ga Jezireeli ku inyumba ya Jehu, na nda heridza ubwami bwenyumba ya Israeli.

⁵Na ga la duka ku lidiku zana, nda vunannyira ubuta bwa Israeli mu livona Iva Jezireeli.

⁶Na umukali uyu ya vereka kandi, ni yivula mwana mukana. Na Yahova ya mu volera, U mu gulike lieta lilye Loruhama; kigira si nda vererera inyumba ya Israeli kandi mba, mbule kuvasameha ligali.

⁷Navutswa nda vererera inyumba ya Yuda, nda va honnya ku Yahova Nyasaye wavo, na si nda va honnya nobuta, kinga nekivavi, kinga nobulwani, kinga netsiparasi, kinga navanina ku tsiparasi.

⁸Kunangwa mukali uyu lwa ya luguhidza Loruhama, ya vereka kandi, ni yivula mwana muyai.

⁹Yahova ya vola, U mu gulike lieta lilye Loammi; kigira mwinye si mu veye avandu vange mba, na inze si nda va Nyasaye wenyu mba.

¹⁰Navutswa livalidzwa lyavana va Israeli li la duka kuva kuli muyeke gwomunyanza, gu ta nyala kugerwa kinga kuvalidzwa; kandi ga la va, ha makuva yaga ga volwa, Mwinye si mu veye avandu vange, va la volerwa ho, Mwinye mu veye avana va Nya saye welivamwoyo.

¹¹Na avana va Yuda na avana va Israeli va la vungidzwa halala, na va levikira avene mutwe mulala, na va lanegira kutwula mkivala yikyo, kigira lidiku lya Jezireeli li la va linene.