Read lulogooli Hosea 2 Bible Online

Hosea 2 - lulogooli bible

Hosea 2

¹Likuva lya Yahova lya duka ku Hosea mwana wa Beeri, mmadiku ga Uzia, Jotham, Ahazu na Hezekia, avami va Buyuda, nomu madiku ga Jeroboam mwana wa Joashu, mwami wa Israeli.

²Mu hing'ane na mama wenyu mu hing'ane; kigira si a veye mukali wange, kandi si mbeye musatsa wewe; a vike ihale ubuheyi bwibwe bu twule imbiri wewe, namakuva gobuheyi a ga twulidze hagati he tsimbere tsitsye;

³gase nda mu navula a ve kyahonyo, na nda mu vika kuli mmadiku ga yivulwa, na nda mu kola kuli kyangalangwi, nokumuvika kuli kivala kyumu, nokumwiita nobuluhu.

⁴Yee, si nda va netsimbabasi ku avana veve; kigira va veye avana vobuheyi;

⁵kigira mama wavo ya kola ubuheyi; uyu wa va vereka ya kola agetsisoni; kigira ya vola, Inze nda londa avayanze vange, ava mbedzanga vyokulia vyange namadzi gange, nobwoya bwamagondi bwange, nekatani yange, namaguta gange, nekyokunwa kyange.

⁶Kunangwa, henza, ndigalira inzira yoyo namafwa, na nda kola lugaga imbiri wewe, a vule kunyola hokuvitira.

⁷Naye a la londerera avayanze veve, navutswa a la vula kuvanyola; na a la venya, navutswa a la vula kuvalola: hene yhho a la vola, Nda tsia nokugaluka ku mu satsa wange wokutanga; kigira inyinga yeyo bwa li bulahi ku inze kuvita kalunu.

⁸Kigira uyu si a manya inze nda mu ha ubuswage, newaini, namagu ta, nokumeda kuye ifetha nethahabu, vya va tumekira Baal.

⁹Kunangwa nda vugula kandi ubuswage bwange ku inyinga yabwo, newaini yange kandi ku inyinga yayo, na nda mu manyula ubwoya bwamagondi bwange, nekatani yange vyokukunika kyahonyo kikye.

¹⁰Na kalunu nda lang'aminya vyetsisoni tsitsye imbiri we tsimoni tsyavayanze veve, na si ha la va na u nyala kumuhonnya ku mukono gwange.

¹¹Kandi nda kola ubusangali bwibwe bwosi bu duke kuhera, namasavo gege agokulonda mweli, na masabato gege, namavugano gege matakatifu.

¹²Na mizabibu gyigye, na mikuyu gyigye, nda gyononnya, gya ya vola mu ma kuva gege, Misala yigyi gyi veye madanyi gange, aga vayanze vange va mpa; na nda gyi kola kuva mulitu, netsinyama tsyombulimu tsi la gyi lia.

¹³Na nda leta kuye amadiku ga Vabaal, va ya sambira kimuli kuvo, lwa yesyaha tsimingiri tsyommatu neviju vivye vyevyuma, nokulonderera avayanze veve, nokwivirira inze, Yahova a vola.

¹⁴Kunangwa, henza, nda mu kwe sa neligoonya, nokumuhila mwigenda nyama, na nda mu volera makuva gokumuleminya mwoyo.

¹⁵Na nda mu ha milimi gyigye gyemizabibu kutwula ha zana, nelivona lya Akori kuva muhango gwelisuuviridza; naye a la tivulira yo, kuli ya kola mu madiku gobusoleli bwibwe, kandi kuli ya kola ku lidiku lya yanegira kutwula mu kivala kya Egepeti.

¹⁶Na ga la va ku lidiku yili Yahova a vola, Ive u la nanga Ishi, na si u la nanga kandi Baal mba.

¹⁷Kigira nda twulidza ameta ga Vabaal mmunwa gwigwe, na si va la talwa ku ameta gavo.

¹⁸Na ku lidiku yilyo nda va kolera lilagana netsinyama tsyomwigendanyama, na manyonyi go mbwerefu, nevindu vi molanga hasi: na nda vunannya ubuta nekivavi nobulwani vi twule mu kivala yikyo, nda va kola va gone hasi nemirembe.

¹⁹Na nda ku kwa nelikwa lyemihiga nemihiga; yee, nda ku kwa mbulungi, nomu likalaga, nomu vikolwa vilahi nomu tsimbabasi.

²⁰Na nda ku kwa mbusuuvirifu; na u la manya Yahova.

²¹Na ga la duka mu lidiku yilyo Nda tivula, Yahova a vola, Nda tivulira ligulu, neligulu li la tivulira lirova;

²²nelirova li la tivulira ubuswage, newaini impya, namaguta na yivi vyosi vi la tivulira Jezireeli.

²³Na nda mu simika mu lirova kigira inze; na nda vererera mukali uyu wa vula kuverererwa; na nda volera yava ava ta li avandu vange, Mwinye mu veye avandu vange; navo va la vola, Ive u veve Nyasaye wange.