Read lulogooli Hosea 5 Bible Online

Hosea 5 - lulogooli bible

Hosea 5

¹Mu hulire yaga, O mwinye avasalisi, mu huliridze, O mwinye avenyumba ya Israeli, na mu tegidze amatu, O mwinye avenyumba yomwami; kigira likalaga li veye ku mwinye; kigira mwinye mwa li mutego ha Mizipa, nomuluvu gwa vikwa ha Taboru.

²Na yavo avebaala va yavi hasi ligali kukola ubwiiti; navutswa mbeye wokugondokera yavo vosi.

³Mmanya Efiraim, na Israeli si a viswa ku inze; kigira kalunu, O Efiraim, wekoli wamalaya, Israeli u nyoye budamano.

⁴Likola lyavo si li va leka kuduka va girunkane ku Nyasaye wavo; kigira mwoyo gwa malaya gu veye muvo, na si va manyi Yahova mba.

⁵Na uluyai lwa Israeli lu lolekidzanga imbiri wetsimoni tsitsye: kigira yaga Israeli na Efiraim va likigitala mu budamano bwavo, na Yuda a likigitala halala navo.

⁶Va la tsia halala nevyayo vyavo vyamagondi netsing'ombe kwenya Yahova; navutswa si va la mu nyola mba: wivisi mwene kuvo.

⁷Va koli ubugeeri bwobugadi ku Yahova; vivuye avana vageni: kalunu mweli muhya gu la va mira halala nemilimi gyavo.

⁸Mu kupe kisiliva mu Gibea, mu kupe imbuumi mu Rama: mu kupe kyokutihidza ha Bethaven; ha inyima hoho, O Benjamini.

⁹Efiraim a la gwa ubwoneku mu lidiku lyokugondokerwa: mu tsihiri tsya Israeli mmali kulandidza aga li va ligali lyenyima.

¹⁰Avanene va Yuda va fwanana na yava ava twulidzanga lwako: nda va tsukira ubutima bwange kuli amadzi.

¹¹Efiraim u dambidzeywi, u mineywi mu likalagirwa; kigira ya bugirira kugenda mu amalago gavandu.

¹²Kigira yaga mbeye ku Efiraim kuli tsisere, noku inyumba ya Yuda kuli ubugundu.

¹³Lwa Efiraim a lola ubulwaye bwibwe, ka ndi Yuda lwa a lola litumite lilye, hene yaho Efiraim ya tsia Asuria, na ya tuma avandu ku mwami Jarebu: navutswa si a nyala kuhonnya mwinye, kandi si a nyala kuhonnya litumite lyenyu.

¹⁴Kigira nda va kuli king'ang'a ku Efiraim, na kuli king'ang'a kisoleli ku inyumba ya Yuda: inze, yee, inze mwene nda tandula na nda tsia; nda hila ihale, na si ha veye no nyaia kuhonnya.

¹⁵Nda tsia kwirana hango hange, kuduka lwa veyama mahyolo gavo, nokwenya mmoni mwange: mu kivi kyavo va la nyenya ligali.