Read lulogooli Hosea 7 Bible Online

Hosea 7 - lulogooli bible

Hosea 7

¹Lwa nyanza kuhonnya Israeli, hene yaho ubudamano bwa Efiraim bu lang'aminyeywi, na ububi bwa Samaria; kigira va kola ububehi, nomwivi yingiranga mugati, nekiduma kyavanuli vononnyanga kyova.

²Na va vula kuganagana mmyoyo gyavo inze nzidzulitsanga ubudamano bwavo bwosi: kalunu likola lyavo avene li va kumbiridza tsimbega tsyosi; li veye imbiri wetsimoni tsyange.

³Va yanzidzanga mwami nobudamano bwavo, na va yanzidzanga avanene namakuva gavo gobubehi.

⁴Yavo vosi va veye avaheyi; va gwiye kuli amahiga ga vikeywi mu muliru na uyu u luganga ubukima; uyu a lekanga kwigereridza muliru, kutwula ku liduvula ubusie kuduka lwa ma mera ga vimbidza.

⁵Ku lidiku lyomwami wetu avanene vekola avalwaye nobululu bwewaini; ya nyira mukono gwigwe halala na valegi.

⁶Kigira va lungekidza myoyo gyavo kuli amahiga, lwa va gonekanga: mulugi wavo a gonanga ubudiku bwosi; mmugamba yaakanga kuli muliru.

⁷Yavo vosi va nyoye muliru kuli mahiga, na va miri avakalagi vavo; avami vavo vosi va gwiye: si ha veye nomulala hagati havo waniranga inze.

⁸Efiraim yetsuganna halala navandu vetsihiri; Efiraim a veye ubukima bwolubaie bu ta girunkanywa.

⁹Avageni va miri tsingulu tsitsye, naye si a manya: yee, tsimbudze tsi loleki kuye yiyi na yiyi, naye si a manya.

¹⁰Na uluyai lwa Israeli lu lolekidzanga imbiri wetsimoni tsitsye: navutswa va kikiri kwirana ku Yahova Nyasaye wavo, kandi si va mwenyanga, ku yaga gosi.

¹¹Efiraim u gwiye kuli likuulu lisiru, li ta li nelimanya: vaniranga Egepeti, va tsitsanga Asuria.

¹²Lwa va tsia, nda tega mutego kuvo; na nda va gwihidza hasi kuli manyonyi gombwerefu; nda va ha mageli kuli livugana lyavo lya hulira.

¹³O bayaye ku yavo kigira va leka inze ni va tsia kugendagenda; ubudivi bu ve kuvo kigira va hyola ku inze: kali inze ni nda yanza kuvahonnya, navutswa va vola bubehi ku inze.

¹⁴Na si vanira inze nemyoyo gyavo, navutswa va hanzuka nemyoyo gyobululu ku vitali vyavo: navutswa vevugannya avene kigira ubuswage newaini; na va tinguha inze.

¹⁵Kali inze ni nda vegidza nokuvavika tsingulu mu makono gavo, navutswa va saavira budamano ku inze.

¹⁶Virana, navutswa si ga li ku uyu u veye igulu; va gwiye kuli ubuta bu ta li nobusoga; avanene vavo va la gwa nekivavi kigira ubululu bwetsinimi tsyavo: inkuva yiyi i la va kihenyahenye kyavo mu kivala kya Egepeti.