Read lulogooli Amosi 1 Bible Online

Amosi 1 - lulogooli bible

Amosi 1

¹Makuva ga Amosi, wa li ku avayi va Tekoa, ga ya lola ku Israeli mmadiku ga Uzia mwami wa Yuda, nomu madiku ga Jeroboam mwana wa Joashu mwami wa Israeli, mihiga gyiviri imbiri welidegera lyelirova.

²Na ya vola, Yahova a la fwuma mu Zioni, na a la kupa lwanga mu Yerusalemi; na vyayiru vyavayi vi la syoma, na isonga ya Karimeli i la niala.

³Yahova a vola ndi: Ku mahyolo gavaka ga Damasko, yee, kuduka ku gane, si nda girunkannyira lihebwa mageli lyalyo; kigira va duvagi Gileadi nemivango gyekivya.

⁴Navutswa nda tuma muliru ku inyumba ya Hazaeli, na gu la samba tsinyumba tsyobwami tsya Benhadadi.

⁵Na nda vunannya muluguyu gwa Damasko, na nda twulidza avamenyi mwivona lya Aven, na uyu u gumiranga impimbo yobwami bwenyumba ya Edeni, navandu va Siria va la tsia mu buhambe kuduka Kiri, Yahova a vola.

⁶Yahova a vola ndi: Kigira mahyolo gavaka ga Gaza, yee, kigira gane, si nda girunkannyira lihebwa mageli lyalyo; kigira va hila avandu vosi kutsia mbuhambe, kuvavika mmakono ga Edom.

⁷Navutswa nda leta muliru ku lidigi lya Gaza, na gu la samba tsinyumba tsyalyo tsyobwami.

⁸Na nda twulidza u menyanga Ashidodi, na uyu u gumiranga impimbo yobwami nda mu twulidza ku Ashikelon; na nda girunkannya mukono gwange gu ve ku Ekiron; na yavo ava tigala ku Vafilisiti va la diva, Mwami Nyasaye a vola.

⁹Yahova a vola ndi: Kigira mahyolo gavaka ga Turo, yee, kigira gane, si nda girunkannyira lihebwa mageli lyalyo; kigira va vika avandu vosi mmukono gwa Edom, na va vula kwidzulitsa lilagana lyavamwavo.

¹⁰Navutswa nda leta muliru ku lidigi lya Turo, na gu la samba tsinyumba tsyalyo tsyobwami.

¹¹Yahova a vola ndi: Kigira mahyolo gavaka ga Edom, yee, kigira gane, si nda girunkannyira lihebwa mageli lyalyo; kigira ya kunga amwavo wewe nekivavi, na a ta tsimbabasi tsyosi, nobutima bwibwe bwa tandula kazozo, na ya li nobutima bwibwe mihiga gyosi.

¹²Navutswa nda leta muliru ku Teman, na gu la samba tsinyumba tsya Bozra tsyobwami.

¹³Yahova ya vola ndi: Kigira mahyolo gavaka gavana va Amon, yee, kigira gane, si nda girunkannyira lihebwa mageli lyalyo; kigira vatannya avakali ava veye inda ava Gileadi, va duke kumeda lwako lwavo.

¹⁴Navutswa nda fwana muliru mu lidigi lya Raba, na gu la samba tsinyumba tsyalyo tsyobwami, halala nokukupa uluku mu lidiku lyobulwani, halala nekihi mu lidiku lyekihudzudzi;

¹⁵nomwami wavo a la tsia mbuhambe, uyu navanene veve halala, Yahova a vola.