Read lulogooli Amosi 2 Bible Online

Amosi 2 - lulogooli bible

Amosi 2

¹Yahova a vola ndi: Kigira mahyolo gavaka ga Moabu, yee, kigira gane, si nda girunkannyira lihebwa mageli lyalyo; kigira ya samba vigumba vyomwami wa Edom kuduka kuva kilongo.

²Navutswa nda leta muliru ku Moabu, na gu la samba tsinyumba tsyobwami tsya Keriothu; na Moabu a la kudza nomuliviti, noluku, nomwoyo gweki siliva;

³na nda twulidza mukalagi kutwula hagati havo, na ndiita avanene vavo vosi halala naye, Yahova a vola.

⁴Yahova a vola ndi: Kigira mahyolo gavaka ga Yuda, yee, kigira gane, si nda girunkannyira nnebwa mageli lyalyo; kigira vambakana malago ga Yahova, na va vula kugumira miima gyigye, nobubehi bwavo bwa va letera mahyolo, bwavadada vavo va londa.

⁵Navutswa nda leta muliru ku Yuda na gu la samba tsinyumba tsyobwami tsya Yerusalemi.

⁶Yahova a vola ndi: Kigira mahyolo gavaka ga Israeli, yee, kigira gane, si nda girunkannyira lihebwa mageli lyalyo; kigira va gulidza avalungi kunyola ifetha, navadaka kunyola vilatu

⁷yavo ava heraniranga ulugukyi lwelirova lu veye ku mitwe gyavadaka, nokukyaminya inzira yomuhooma: na muyai na dada wewe vingira kuva nomkana mulala, kuvika budamano ku lieta lyange litakatifu:

⁸navo va gona hasi himbi nobwali bwosi ku tsingubo tsya vikwa kihambiriru; navo va nweranga mu inyumba ya Nyasaye wavo, iwaini ya yava ava tungidzwa mitungu.

⁹Navutswa ndononnya Vaamori imbiri wavo, avobutambi bwavo bu veye kuli bwomusala gwo mutaragwa, na ya li netsingulu kuli musala mudinyu, kuli muduguyu; navutswa ndononnya makuyu gavo igulu, nevitinya vyavo hasi.

¹⁰Kandi nda mwanegeridza kutwula Egepeti, na nda mwimirira mihiga makumi gane mwigendanyama, mu duke kugumira kivala kya Vaamori.

¹¹Na nda vukidza avaprofeti ku avana vovo noku vasoleli vovo Vanazari. Si ga va ndiyo ligali, O mwinye avana va Israeli? Yahova a vola.

¹²Navutswa mwa nwehidza Vanazari iwaini, na mwa laga avaprofeti, ni mu vola, Mu ta profeta mba.

¹³Henza, nda mu mina mu hokumenya henyu kuli ligari lizuye miganda li minanga.

¹⁴Na hokwiruka ha la gota ku yavo avetsimbiru; kandi wetsingulu si a la meda tsingulu tsitsye; kandi wobuluviriri si a lehonnya mwene;

¹⁵kandi wobuta si a la singira, kandi wetsimbiru si a lehonnya; kandi u ninanga iparasi si a lehonnya;

¹⁶na uyu wobuluviriri hagati ha vetsingulu a liruka kyahonyo mu lidiku yilyo, Yahova a vola.