Read lulogooli Jona 1 Bible Online

Jona 1 - lulogooli bible

Jona 1

¹Likuva lya Yahova lya duka ku Jona mwana wa Amitai, kumuvolera

²Vuka, u tsie Nineve, lidala iinene, u hanzuke kulyo; kigira ubudamano bwalyo bwanegiye imbiri wange.

³Navutswa Jona ya vuka kwiruka kutsia Tarshishi kutwula imbiri wa Yahova; na ya sulunguta kutsia Yopa, na a lola yo liato li tsitsanga Tarshishi: ma ya tunga mitungu gyalyo, na a tsia mulyo, a tsie Tarshishi halala navo kutwula imbiri wa Yahova.

⁴Navutswa Yahova ya leta kihudzudzi kinene ku inyanza, kandi kya duka kuva kihi kinene ku inyanza, kuduka liato lya li himbi kwononnywa.

⁵Ma averemi va li nobutii, navo sa mulala yanira munyasaye wewe; na va ta mu inyanza vindu vya li mu liato, li ve lyangu kuvo. Navutswa Jona ya li na a mali kwika, nokutsia musi mweliato; na a gona tsindolo tsinene.

⁶Kunangwa munene weliato ya tsia kuye, na a mu volera, U veye naki ive, u gonanga? Vuka, wanire Nyasaye wowo, mbula ga la va Nyasaye a la kwidzulira, ku ta diva mba.

⁷Navo va volerana sa mulala nowakye, Gendi ku kole ikura, ku duke kumanya ubudamano yibu bu duki ku kwinye kigira ibwaha. Ma va kupa ikura, na ikura ya gwira Jona.

⁸Hene yaho va mu volera, Mwadza, u ku volere, ubudamano yibu bu duki ku kwinye kigira ibwaha; miyinzi gyigyo gyi veye ki? Na ive u twula haliha? U veye mundu wekivala ki? U veye mundu wehiri ki?

⁹Naye ya va volera, Inze mbeye Muhebraina; na ntidza Yahova, Nyasaye womigulu, wa lomba inyanza na lirova Iyumu.

¹⁰Hene yaho avandu yava va tia muno, na va mu volera, Inkuva ki yiyi ya u koli? Kigira avandu va manya yiruka kutwula imbiri wa Yahova, kigira ya li na a va voleye.

¹¹Hene yaho va mu teva, Ku la ku kolera ndi, inyanza i duke kukuleng'erera? Kigira inyanza ya li ni i medeka lihinulanywa.

¹²Naye ya va volera, Mu mbugule na mu nte mu inyanza; na ndiyo inyanza i la mu leng'erera: kigira inze mmanya ga veye kigira inze, kihi yiki kinene ki veye ku mwinye.

¹³Navutswa avandu yavo va luga liato netsingulu kulileta ku luginga; navutswa si va nyala: kigira inyanza ya medeka lihinulanywa kuvo.

¹⁴Kunangwa vanira Yahova, ni va vola, Ku ku saala, O Yahova, ku ku saala, kwinye ku ta diva kigira livamwoyo lyomundu uyu, kandi u ta vika ku kwinye amasahi ga ta li nekindu; kigira ive, O Yahova, u koli kuli u yanza.

¹⁵Kunangwa va vugula Jona, ni va mu ta mu inyanza; na inyanza ya leka kuhinulanywa.

¹⁶Ma avandu yavo va tia Yahova ligali; na va letera Yahova kihaanwa, ni va lagana.

¹⁷Na Yahova ya tegekidza isudzi inene kumira Jona; na Jona ya li mu munda mwesudzi madiku gavaka mbasu nobudiku.