Read lulogooli Jona 3 Bible Online

Jona 3 - lulogooli bible

Jona 3

¹Kandi likuva lya Yahova lya duka ku Jona hali kaviri, nokuvola,

²Vuka, u tsie Nineve, lidala yilyo linene, na wilwadze kulyo lilwadza lya nku laga.

³Kunangwa Jona ya vuka, na a tsia Nineve, kuli likuva lya Yahova. Lidala lya Nineve lya li lidala linene muno lyolugendo lwa madiku gavaka.

⁴Na Yona ya tanga kwingira mu lidala lugendo lwelidiku lilala, na ya hanzuka, na a vola, Inyima wamadiku makumi gane Nineve li la tung'aminywa.

⁵Na avandu va Nineve va suuvira Nyasaye; ni va landidza lilaga, Lihonga lilia li ve, na vivika magunia, kutwula ku munene kuduka ku mukekeke kuvo.

⁶Na likuva lya duka ku mwami wa Nineve, naye ya twula ku intebe yeye yobwami, na a navula ingubo yeye, ni yevika ligunia, ni yikala mu ligoke.

⁷Na ya haana munwa kulandidza mu lidala lya Nineve nelilaga lyomwami na avanene veve, kuvola, Mundu a ta tsatsama kyokulia kali hakuzuzu, kinga imi tugu, kinga vyayo vyetsing'ombe, kinga vya magondi; vi taya, kinga kunwa amadzi;

⁸navutswa vivika tsingubo tsyamagunia, avandu kandi imitugu, nokwanira Nyasaye ligali netsingulu tsyosi: yee, va girunkane vosi sa mulala, nokuleka inzira yeye indamano, nokuleka kirage ki veye mu makono gege.

⁹Ni bwaha u manya, mbula Nyasaye a la girunkana nokweganira, nokuleka ubutima bwibwe bululu, kwinye ku vule kudividzwa?

¹⁰Na Nyasaye ya lola likola lyavo, kuli va girunkana nokuleka inzira yavo indamano; na Nyasaye yeganira ku kivi kya ya vola a la va kolera; na si ya ki kola mba.