Read lulogooli Livalidza 10 Bible Online

Livalidza 10 - lulogooli bible

Livalidza 10

¹Kandi Yahova ya volera Musa, na a vola,

²Welombere visiliva vyefetha; u la vi lomba nemiyinzi gyomutuli: na u la vi tumikira ku lilangira livugana, noku lisamulidza arandu ku hokusosa.

³Na lwa va vi kupa, livugana lyosi lyevungidza ku ive ha kiliango kyelihema lyokuvuganira mu.

⁴Na lwa va kupa kisaliva kilala, hene yaho avanene, ava veye mitwe gyetsielfu tsya Israeli va levungidza ku ive.

⁵Na lwa va kupa mwoyo gwokuvukidza, amahema ga veye ku luvega lwevugwe ga la samula.

⁶Na lwa mu kupa mwoyo gwokuvukidza hali kaviri amahema ga veye ku luvega lwa kusini ga la samula: va la kupa mwoyo gwokuvukidza ku tsing'endo tsyavo.

⁷Navutswa livugana lwa li la vungidzwa halala mu la kupa navutswa mu ta kupa mwoyo gwokuvukidza.

⁸Na avana va Haruni, avasalisi, va la kupa visaliva; na vi la va ku mwinye lilaga lyemihiga nemihiga mu visukululwi vyenyu vyosi.

⁹Na lwa mu tsia mu bulwani mu kivala kyenyu ku avasigu venyu ava mu dambidza, hene yaho mu la kupa mwoyo gwelivukidza nevisiliva; na mu lidzulitswa imbiri wa Yahova Nyasaye wenyu, na mu la honywa ku avasigu venyu.

¹⁰Kandi mu madiku gelisangala lyenyu, na mu madiku manene genyu ga lagwa, na mu litanga lyemyeli gyenyu, mu la kupa visiliva ku vihaanwa vyenyu vyokusambwa nokuvihaanwa vyenyu vyemirembe, navyo vi la va ku mwinye kyokwidzulitsa imbiri wa Nyasaye wenyu: inze mbeye Yahova Nyasaye wenyu.

¹¹Na ga duka mu muhiga gwa kaviri, mu mweli gwa kaviri, ku likudiku lya makumi gaviri, lilesi lya gingwa kutwula igulu welihema lyelilolekidza.

¹²Na avana va Israeli va samula kutsia imbiri ku tsing'endo tsyavo kutwula mu kyangalangwi kya Sinai; na lilesi lya singira mu kyangalangwi kya Parani.

¹³Na va tanga ulugendo lwavo kuli lilaga lya Yahova mu munwa gwa Musa.

¹⁴Na mu litanga ibendera ya mahema ga avana va Yuda, ya samula kuli amahe gavo: na Nahashoni mwana wa Aminadabu ya li munene ku lihe lilye.

¹⁵Na ku lihe lyehiri ya avana va Isakari munene ya li Nethaneli mwana wa Zuaru.

¹⁶Na ku lihe lyehiri ya avana va Zebuloni munene ya li Eliabu mwana wa Helon.

¹⁷Na lihema likidzwa; na avana va Gerishon na avana va Merari, ava ginga lihema va samula kutsia imbiri.

¹⁸Na ibendera ya amahema ga Rubeni ya samula kutsia imbiri kuli amahe gavo: na igulu ku lihe lilye munene ya li Elizuru mwana wa Shedeuru.

¹⁹Na ku lihe lyehiri ya avana va Simeoni munene ya li Shelumieli mwana wa Zurishadai.

²⁰Na ku lihe lyehiri ya avana va Gadi munene ya li Eliasafu mwana wa Deueli.

²¹Na Avakohathu va samula, va ginga hatakatifu: na avandi va singeridza lihema imbiri wa yavo va kikiri kuduka.

²²Na ibendera ya mahema ga avana va Efiraim ya samula kutsia imbiri kuli amahe gavo: na ku lihe lilye munene ya li Elishama mwana wa Amihudu.

²³Na ku lihe lyehiri ya avana va Manase munene ya li Gamalieli mwana wa Pedazaru.

²⁴Na ku lihe lyehiri ya avana va Benjamini munene ya li Abidani mwana wa Gideoni.

²⁵Na ibendera ya mahema ga avana va Dan, ga li inyima wa mahema gosi, ya samula kuli amahe gavo: na ku lihe lilye munene ya li Ahiezeru mwana wa Amishadai.

²⁶Na ku lihe lyehiri ya avana va Asheri munene ya li Pagieli mwana wa Okarani.

²⁷Na ku lihe lyehiri ya avana va Nafitali munene ya li Ahira mwana wa Enani.

²⁸Tsya li ndiyo, tsing'endo tsya avana va Israeli kuli amahe gavo; na va samula.

²⁹Na Musa ya volera Hobabu, mwana wa Reueli Mumidiani, navizala wa Musa, Kwinye ku gendanga kutsia ha Yahova ya vola makuva gaho ndi, Nda mu ha yaho: u tsie halala na kwinye, na ku la ku kolera bulahi; kigira Yahova ya vola bulahi ku Israeli.

³⁰Naye ya mu volera Inze si ntsia mba; navutswa ndirana mu kivala kyange kyene, noku aviko vange mwene.

³¹Naye ya mu volera, U ta ku leka mba, mwadza; kigira ive u manya kuli ku la menya mu kyangalangwi, na ive u la va ku kwinye mu bugono bwetsimoni.

³²Ga la va, nu u va nu u tsia halala na kwinye, yee, ga la va, ku bulahi bwosi bwa Yahova a la ku kolera, na kwinye ku la ku kolera ndiyo.

³³Navo va samula kutwula mu kigulu kya Yahova ulugendo lwa madiku gavaka; na lisanduku lyelilagana lya Yahova lyemira imbiri wavo ulugendo lwa madiku gavaka kuvenyira hokusosa.

³⁴Na lilesi lya Yahova lya li igulu kuvo mbasu, lwa va samula kutsia imbiri kutwula mu hokusosa.

³⁵Na ga duka, lwa lisanduku lya samula, Musa ya vola, U vuke, O Yahova, avasigu vovo va salane; na viruke imbiri wowo ava ku dunyiranga.

³⁶Kandi lwa lva singira, ya vola, O Yahova, wirane ku tsielfu makumi getsielfu tsya Israeli.