Read lulogooli Livalidza 11 Bible Online

Livalidza 11 - lulogooli bible

Livalidza 11

¹Na avandu va li kuli avamonyi, ni va vola ubudamano mu amatu ga Yahova: na lwa Yahova ya bu hulira, ubutima bwibwe bwaaka na muliru gwa Yahova gwaaka hagati havo, na gwa samba mu tsinzako tsyetsindulu tsya hokusosa.

²Na avandu va lira ku Musa; na Musa ya saala ku Yahova, na muliru gwa sima.

³Na lieta lya ha zana lya langwa Tabera, kigira muliru gwa Yahova gwaaka hagati havo.

⁴Na yavo avasangi ava li hagati havo, va li nelikayirwa linene: na avana va Israeli, navo kandi va lira ni va vola, Ni bwaha u li ku ha inyama ku lie?

⁵Kwidzulitsanga tsisudzi, tsya kwa litsanga vutswa mu Egepeti; na vitango, na mahondo, na vitunguu vinyerere, na vitunguu vyene, na vitunguu sumu:

⁶navutswa kalunu myoyo gyetu gyi niyaye; si ha veye nekindu kali kilala, navutswa imana yiyi kyokuhenza ku.

⁷Na imana zana ya leng'ana nobugutsa bwovolo, na liloleka lyayo lya li kuli ihula.

⁸Na avandu va vodonkana ni va gi vungidza, ni va gi siyera ku tsing'ina, kinga va gi duyira mu vinu, na va gi dekera mu tsinyingu, ni va lomba ubukima: na ubunolu bwayo bwa li kuli maguta mahya.

⁹Na lwa lime lyama mu budiku ku hokusosa, imana ya gwa kulyo.

¹⁰Na Musa ya hulira avandu va liranga mu bwiko bwavo bwosi, sa mulala ha kiliango kyelihema lilye: na ubutima bwa Yahova bwaaka ligali; I na Musa kandi ya vihirirwa.

¹¹Na Musa ya volera Yahova, Kigira ki u koleye mutumekiri wowo ubudamano? Na kigira ki nda vula kunyola tsimbabasi imbiri wetsimoni tsitsyo, kuduka kuvika ku inze musigo gwa avandu yava vosi?

¹²Ninze wa verekidza avandu yava vosi? Ninze wa vivula, ive u duke kumbolera, U va ginge mu kiritu kikyo, kuli dada u leranga mwana u nunanga, kuvadukidza mu kivala kya wisuhira avaguga vavo?

¹³Na nyola haliha inyama yokuha avandu yava vosi? Kigira va lira ku inze, ni va vola, U ku he inyama ku lie.

¹⁴Inze tsyeng'ine si nyala kuginga avandu yava vosi, kigira va veye musigo muliduhu kuvita gwa nyala.

¹⁵Nu u va nu u nkolera ndiyo, u nziite ligali, mwadza, ni mba ni nyoye tsimbabasi imbiri wetsirnoni tsitsyo; mbule kulola ubudamano bwange.

¹⁶Na Yahova ya volera Musa, U vugannye ku inze avandu makumi gatano na gaviri ku avakulundu va Israeli, ava u manya va veye avakulundu va avandu, avanyampara kuvo; na u va lete ku lihema lyokuvuganira mu, va singire yo halala na ive

¹⁷Na inze ndika nokuvolerana nive ha zana: na nda vugula ku Roho u veye ku ive, nokuvika kuvo, navo va Ia ginga musigo gwa avandu halala nive, ive u vule kuguginga weng'ine.

¹⁸Na u volere avandu, Mwetakase avene kwetegeka mugamba, na mu Ia lia inyama; kigira mwa lira mu amatu ga Yahova, nokuvola, Ni bwaha a la ku ha inyama ku lie? Kigira kwa li nobulahi mu Egepeti: kigira yaga Yahova a la mu ha inyama, na mu la lia.

¹⁹Si mu la lia lidiku lilala, kinga madiku gaviri, kinga madiku gatano, kinga madiku likumi, kinga madiku makumi gaviri,

²⁰navutswa mu la lia mweli gwosi, kuduka inyama i twulira mu amolo genyu, na mu la gi lega; kigira mwambakani Yahova u veye hagati henyu, na mu liri imbiri wewe, ni mu vola, Kigira ki kwa twula Egepeti?

²¹Na Musa ya vola, avandu ava mbeye hagati havo, va veye tsielfu tsimia tsitano na indala, ava gendanga nevirenge; na ive u voye, Nda va ha inyama, va duke kulia mweli gwosi.

²²Vyayo vyamagondi na vyetsing'ombe vi litiirwa yava vigutidzwe?

²³Na Yahova ya volera Musa, Mukono gwa Yahova gwimbihidzwa? Kalunu ive u la lola likuva lyange ni li va ni li duka ku ive, naho li la vula kuduka.

²⁴Na Musa ya twula, na a volera avandu makuva ga Yahova: na ya vugannya avandu makumi gatano na gaviri ku avakulundu va avandu, na ya va vika tsimbega tsyosi kukumbiridza Lihema.

²⁵Na Yahova yika mu lilesi, na a mu volera, na a vugula ku Roho wa li ku Musa, na a mu vika ku avakulundu makumi gatano na gaviri: na ga duka, lwa Roho yika kuvo, va profeta, navutswa si va kola ndiyo kandi.

²⁶Navutswa avandu vaviri va tigala mu hokusosa, lieta lya mulala lya li Elidadi, na lieta lya wundi lya li Medadi: na Roho yika kuvo; navo va li ku yavo ava ng'odwa, navutswa si va twula kutsia ku Lihema; navo va profeta mu hokusosa.

²⁷Na musoleli ya nyagula kutsia kuvolera Musa, na a vola, Elidadi na Medadi va profeta mu hokusosa.

²⁸Na Joshua mwana wa Nuni, mutumekiri wa Musa, mulala ku avandu veve avatovole, ya tivula na a vola, O mwami wange, Musa, u va gaye.

²⁹Na Musa ya mu volera, U veye nelikendeka kigira inze? Nkano avandu vosi va Yahova va veye avaprofeti, nkano a vike Roho wewe kuvo

³⁰Na Musa ya tsia kwingira mu hokusosa, mwene na avakulundu va Israeli.

³¹Na imbuudza ya twula ku Yahova, ni i leta tsisindu kutwula ku inyanza, na ya tsi leka kuyera himbi na a hokusosa, kuli lugendo lwelidiku lilala ku luvega vilu, na lugendo lwelidiku lilala ku iuvega lundi, ku tsimbega tsyosi tsya hokusosa, na tsya duka kuli kigero kya makono gaviri igulu wekivala.

³²Na avandu va vuka, na mbasu yigwo gwosi, na ubudiku yibwo bwosi, na gundi mugamba gwosi, na va vungidza tsisindu: uyu wa nyola tsinkekeke kuvita avandi ya nyola ligera lyetsihomeri likumi: navo va tsi vagala tsimbega tsyosi tsya hokusosa tsi ve tsyavo avene.

³³Lwa inyama ya tigala mu amino gavo, na va kikiri kulia, ubutima bwa Yahova bwaaka ku avandu, na Yahova ya kuya avandu nelikuya linene ligali.

³⁴Na lieta lya ha zana lya gulikwa Kibirothu-hatava, kigira va ta ho avandu ava kayirwa.

³⁵Kutwula Kibirothuhatava avandu va samula kutsia Hazerothu: na va menya Hazerothu.