Read lulogooli Livalidza 14 Bible Online

Livalidza 14 - lulogooli bible

Livalidza 14

¹Na livugana lyosi lya ginga myoyo gyavo ni va lira; na avandu va lira ubudiku yibwo.

²Na avana va Israeli vosi va monya Musa na Haruni: na livugana lyosi lya va volera, Nkano kwa kudzera mu kivala kya Egepeti kinga, nkano kwa kudzera mu kyangalangwi yiki

³Na kigira ki Yahova a ku leta mu kivala yiki kugwa ku kivavi? Avakali vetu na avana vetu vadoto va la gwa kilanye: kunangwa si bu li bulahi ku kwinye kwirana Egepeti?

⁴Na va volerana avene na avene, Kwisingeridzire mwimiriri, kwirane Egepeti.

⁵Hene yaho Musa na Haruni va gwa mammama imbiri welivugana lyosi lya avana va Israeli.

⁶Na Joshua mwana wa Nuni, na Kalebu mwana wa Jeiune, ava li ku avaluta kivala, va tandula tsingubo tsyavo:

⁷na va volera livugana lyosi lya avana va Israeli, nokuvola, Kivala kya kwa vita hagati hakyo kukiluta, ki veye kivala kilahi muno.

⁸Yahova na a va na a ku yanza, a la ku vika mu kivala yiki, nokukuha yiki; kivala ki gangulukanga amaveere nobwuki.

⁹Navutswa mu ta hing'ana na Yahova, kandi mu ta tia avandu vekivala; kigira va veye ubukima bwetu: na kiriri kyokukinga kyavo kya twulidzwa kuvo, na Yahova a veye halala na kwinye: mu ta va tia mba.

¹⁰Navutswa li vugana lyosi lya vola, Va laswe na magina. Na ubukumi bwa Yahova bwa loleka mu lihema lyokuvuganira mu imbiri wa avana va Israeli vosi.

¹¹Na Yahova ya teva Musa, Avandu yava va la ndega kuduka inyinga ki? Na va la vula kusuuvira inze kuduka inyinga ki, kali ni nkoli vilolekidzu vyosi hagati havo?

¹²Nda va kuya neplegi, nokuvatwulidza ku miyandu, na nda kola ive kuva ihiri inene ne yetsingulu kuvita yavo.

¹³Na Musa ya volera Yahova, Lwa Avaegepeti va la hulira; kigira wa leta avandu yava netsingulu tsitsyo kutwula hagati havo;

¹⁴navo va la volera avandu vekivala yiki: va huliye ive Yahova u veye hagati ha avandu yava; kigira ive Yahova u lolangwa imoni na imoni, na lilesi lilyo li singiranga kuvo, na ive wimiriranga imbiri wavo mu munara gwelilesi mbasu, na mu munara gwomuliru mu budiku.

¹⁵Kunangwa nu u va nu u viita avandu yava kuli mundu mulala, hene yaho tsihiri tsi huliye makuva gelidzominywa lilyo va lilwadza nokuvola,

¹⁶Kigira Yahova si ya nvala kudukidza avandu yava mu kivala kya ya visuhira, kunangwa u viitiye mu kyangalangwi.

¹⁷Mwadza, kalunu, tsingulu tsya Yahova tsi ve tsinene, kuli ga wa vola, nokuvola,

¹⁸Yahova a veye wa galaha ku butima, na wobunyingi bwetsimbabasi, na wokusameha ubwoni na mahyolo; naye si a la kola uyu uekindu kuye kuva bugira kindu ku liva lyosi, u vikanga ubwoni bwavaguga ku avana vavo kuduka likula lya gavaka kandi lya gane.

¹⁹Mwadza, u samehe ubwonl bwa avandu yava, kuli ubunene bwetsimbabasi tsitsyo, kuli u samehi avandu yava, kutwula Egepeti, kuduka lero ndi.

²⁰Na Yahova ya vola, Mba samehi kuli likuva lilyo:

²¹Navutswa kuli mbeve mwovo, na kuli lirova lyosi li lizula ubukumi bwa Yahova;

²²kigira avandu yava vosi ava loli ubukumi bwange, na vilolekidzu, vya nda kola mu Egepeti na mu kyangalangwi, navutswa va ngeridzi hali likumi yili, kandi va vuli kuhulira mwoyo gwange;

²³ligali si va la lola kivala kya ndisuhira avaguga vavo, kandi mu yavo ava leganga inze si a la va ho mulala u la ki lola:

²⁴navutswa mutumekiri wange Kalebu, kigira ya li na roho wundi muye, na a nonda nobudukiru, uyu nda mu leta nokumuvika mu kivala kya yingira mu; na visukululwi vivye vi la ki gumira.

²⁵Na Avaamaleki na Avakanani va menya mu mivona: mugamba mu girunkane mu tsie mu kyangalangwi ku inzira i tsitsanga ku Inyanza Inzakanyu.

²⁶Kandi Yahova va volera Musa na Haruni, na a vola,

²⁷Inze ndekudzera ku livugana lidamano yili, li monyanga, kuduka inyinga ki? Mbuliye limonya lya avana va Israeli lya va monyanga ku inze.

²⁸Mu va volere makuva yaga, Yahova a vola Kuli inze mbeye mwoyo, ligali kuli mwinye mwa vola mu amatu gange, nda mu kolera ndiyo:

²⁹imibiri mikudzu gyenyu gyi la gwa mu kyangalangwi yiki; navo vosi ava validzwa ku mwinye, kuli livalidzwa lyenyu lyosi, kutwula ku avemihiga makumi gaviri nokuvita, ava monya ku inze,

³⁰ligali si mu lingira mu kivala kya ndisuhira nda mu mennya mu, na a ta li Kalebu mwana wa Jefune, na Joshua mwana wa Nuni.

³¹Navutswa avana venyu, ava mwa vola va la va vilanye, nda va leta kwingira mu, navo va la manya kivala kya mwinye mwa sula.

³²Navutswa ku makuva genyu, imibiri mikudzu gyenyu gyi la gwa mu kyangalangwi y iki.

³³Na avana venyu va la va avavavi mu kyangalangwi mihiga makumi gane, na va la ginga musigo gwobuheyi bwenyu, kuduka mibiri mikudzu gyenyu gyi la diva mu kyangalangwi.

³⁴Kuli livalidza lyamadiku ga va luta kivala, kali madiku makumi gane, lidiku lilala li volangwa kuva muhiga, mu la ginga ubudamano bwenyu, mihiga makumi gane, na mu la manya lyononya lyelilagana lyange.

³⁵Inze, Yahova mbola, Ligali yaga nda kola ku livugana lidamano yili lyosi li vugani kuhing'ana na inze: va la divira mu kyangalangwi yiki na va la kudzera yo.

³⁶Na avandu yavo ava Musa ya tuma kuluta kivala, avirana na va kola livugana lyosi kumumonya, ku lileta makuva madamano ku kivala,

³⁷kali avandu yava ava leta makuva madamano ku kivala, yava va kudza ku iplegi imbiri wa Yahova.

³⁸Navutswa Joshua, mwana wa Nuni, na Kalebu, mwana wa Jefune, va tigala mwoyo mu yava ava tsia kuluta kivala.

³⁹Na Musa ya volera avana va Israeli vosi, makuva yaga: na avandu va syoma ligali.

⁴⁰Na va vuka mabwebwe na vanegira kuduka ku isonga yekigulu, ni va vola, Henza, kwinye ku veye hano, na ku lanegira kutsia ha Yahova ya ku laga: kigira ku koli ubwoni.

⁴¹Na Musa ya vola, Kigira ki kalunu mwinye mwononya lilaga lya Yahova, kigira inkuva yiyi si i la gasidzwa?

⁴²Mu tanegira, kigira Yahova si a veye hagati henyu; gase mu la kuywa nokutsomwa hasi imbiri wa avasigu venyu.

⁴³Kigira Avaamaleki na Avakanani va veye imbiri wenyu, na mwinye mu la gwa ku kivavi: kigira mu girunkana mgongo, na si mu londa Yahova, kigira yaga Yahova si a la va halala nemwinye.

⁴⁴Navutswa va hindageridza kutsia kuduka ku isonga yekigulu: navutswa lisanduku lyelilagana lya Yahova, na Musa, si ya twula mu hokusosa.

⁴⁵Hene yaho Avaamaleki na Avakanani ava menya mu kigulu, vika, na va va huya nokuvatsoma hasi kuduka Horma.