Read lulogooli Livalidza 15 Bible Online

Livalidza 15 - lulogooli bible

Livalidza 15

¹Na Yahova ya volera Musa, na a vola,

²U volere avana va Israeli, nokuvavolera, Lwa mu duki mu kivala kyobu nenyi bwenyu, bwa mmu ha,

³ni mwenya kuhaana ku Yahova kihaanwa kyomuliru, kihaanwa kyokusambwa, kinga kihaanwa kyokwiitwa kudukidza lilagana, kinga ni ki veye kihaanwa kyobuyanzi, kinga mu madiku manene genyu gamalia genyu, kulombera Yahova mwayu mulahi, kihaanwa kyetsing'ombe kinga kyamagondi;

⁴ma uyu u sunda himbi kihaanwa kikye, a haane ku Yahova kihaanwa kyobusie ki duka kidieli kyelikumi kya efa yobusie bunyuki bwa tsukanywa nerobo ya ihin ya maguta:

⁵na iwaini yekihaanwa kyokunwa, na irobo ya ihin, u la leta halala na kihaanwa kyokusambwa, kinga yekihaanwa kyokwiitirwa, yevimeme se kilala.

⁶Kinga kyeligondi likole, la lomba kihaanwa kyobusie kyevidieli viviri vyelikumi vya efa yobusie bunyuki bwa tsukanywa na kidieli kilala kyevibaka kya ihin ya maguta.

⁷Na yekihaanwa kyokunwa u la leta kidieli kilala kyevibaka kya ihin yewaini, kuva mwayu mulahi ku Yahova.

⁸Na lwa u lomba igiriki kuva kihaanwa kyokusambwa, kinga kuva kihaanwa kyokwiitwa kudukidza lilagana, kinga kuva vihaanwa vyemirembe ku Yahova;

⁹ma a la leta halala negiriki, kihaanwa kyobusie kyevidieli vivaka vyelikumi vya efa yobusie bunyuki bwa tsukanywa na inusu ya ihin ya maguta:

¹⁰kandi u la leta yekihaanwa kyokunwa, inusu ya ihin yewaini, kuva kihaanwa kyokulombwa no muliru, kuva mwayu mulahi ku Yahova.

¹¹Na ga la kolwa ndi ku tsigiriki sa indala, noku magondi makole sa lilala noku vimeme vikole vyamagondi sa kilala, noku vimeme vyetsimbuli sa kilala.

¹²Kuli livalidza lya mu la lomba, mu la kola ndiyo sa kilala kuli livalidzwa lyavyo.

¹³Vosi avivulwa ku mwinye va la kola vindu yivi vyosi kuli miima yigyi, mu lihaana kihaanwa kyokuhaanwa nomuliru, kuva mwayu mulahi ku Yahova.

¹⁴Kandu mugeni u menya ku mwinye, kinga mundu ku vosi u veye hagati henyu mu visukululwi vyenyu, ni yenya kuhaana kihaanwa kya lombwa nomuliru, kyomwayu mulahi ku Yahova; kuli mwinye mu kolanga, a la kola ndiyo.

¹⁵Mu livugana li la va mulyo, lilaga lilala ku mwinye noku mugeni u menyanga halala na mwinye, li veye lilaga lyokuhindira mihiga gyosi mu visukululwi vyenyu: kuli mwinye mu veye, mugeni a la va ndiyo imbiri wa Yahova.

¹⁶Li la va lilaga lilala na mwinna mulala ku mwinye, noku mugeni u menyanga halala nemwinye.

¹⁷Na Yahova ya volera Musa, na a vola,

¹⁸U volere avana va Israeli, nokuvavolera, Lwa mu duka mu kivala kya mrnu hila mu,

¹⁹ga la va, lwa mu lia ku ubukima bwekivala, mu la leta ku Yahova kihaanwa kyokudigululwa.

²⁰Ku ubukima bwenyu ubuhya bwokutanga mu la leta ubukima kuva kihaanwa kyokudigululwa: kuli mu kolanga kihaanwa kyokudigululwa kyolodze, mu la ki digulula ndiyo.

²¹Ku ubukuma bwenyu ubuhya bwokutanga mu la ha Yahova kihaanwa kyokudigululwa mu visukululwi vyenyu vyosi.

²²Lwa mu li hyola, nokuvula kugumira amalago yaga gosi, ga Yahova ya volera Musa,

²³kali yaga gosi ga Yahova ya laga, na a ga leta nomunwa gwa Musa, kutwula ku lidiku lya Yahova ya leta malago, nokutsia imbiri mu visukululwi vyenyu

²⁴hene yaho ni ga va ni ga kolwa bugira limanya, na bugira limanya lya livugana, hene yaho livugana lyosi li la leta igiriki isoleri kuva kihaanwa kyokusambwa, kuva mwayu mulahi ku Yahova, halala nekihaanwa kyayo kyobusie nekihaanwa kyakyo kyokunwa, kuli miima, na imbuli ikole indala kuva kihaanwa kyobwoni.

²⁵Na musalisi a la lomba kyokukunika ubwoni bwelivugana lyosi lya avana va Israeli, na va la samefwa; kigira lya li lihyolo, navo va leti kihaanwa kyavo, kihaanwa ki lombwa nomuliru ku Yahova, na kihaanwa kyavo kyobwoni imbiri wa Yahova, kigira lihyolo lyavo:

²⁶na livugana lyosi lya avana va Israeli va la samefwa, na mugeni u menyanga hagati havo; kigira ku makuva ga avandu yava vosi lihyolo lya koleka bugira limanywa.

²⁷Kandi mundu mulala na a va na a kola uhwoni bugira kumanya, hene yaho a la leta imbuli isuveni yomuhiga mulala kuva kihaanwa kyobwoni.

²⁸Na musalisi a la lomba kyokukunika ubwoni bwomwoyo gwa hyola, lwa a kola ubwoni bugira kumanya, imbiri ua Yahova, kumulombera kyokukunika ubwoni; naye a la samefwa.

²⁹Mu la va nelilaga lilala lya uvu u kolanga kindu bugira kumanya, lya uyu wivulwa ku mwinye hagati ha avana va Israeli, kandi lya uyu mugeni u menyanga hagati havo.

³⁰Navutswa mundu u kolanga kindu ku vyosi na a saavira, na a va na a veye mwivuli ku mwinye, kinga mugeni, wa zana a nyeganga Yahova; na mundu uyu a la heridzwa kutwula hagati ha avandu veve.

³¹Kigira ya lega likuva lya Yahova, na yononya lilaga lilye, mundu uyu a la heridzwa ligali; ubudamano bwibwe bu la va kuye mwene.

³²Na lwa avana va Israeli va li mu kyangalangwi, va lola mundu na a tenyanga tsinku ku lidiku lya lisabato.

³³Navo ava mu lola mu litenya, va mu leta ku Musa na Haruni, noku livugana lyosi.

³⁴Navo va mu vika mu ubuhambe, kigira ga li ni ga kikiri kuvolwa aga kolwa kuye.

³⁵Na Yahova ya volera Musa, Mundu uyu ligali a liitwa: livugana lyosi li la mu lasa magina kyova wa hokusosa.

³⁶Na livugana lyosi lya mu hila kyova wa hokusosa, na va mu lasa magina kuduka ya kudza; kuli Yahova ya laga Musa.

³⁷Na Yahova ya volera Musa, na a vola,

³⁸U volere avana va Israeli, nokuvalaga, velombere ubuyusi ku tsindulu tsyetsingubo tsyavo mu visukululwi vyavo vyosi, kandi va vike ku buyusi bwosi ku tsindulu tsyosi, mugoye gweblue:

³⁹na bu la va ku mwinye buyusi, mu bu henze nokwidzulitsa malago gosi ga Yahova, nokugakola; na mu vule kugendagenda kulonda myoyo gyenyu avene, na tsimoni tsyenyu avene, vindu vya mwa li ni mu londanga ku matsyambiri kukola ubuheyi:

⁴⁰mwinye mwidzulitse nokukola malago gange gosi, nokuva avatakatifu ku Nyasaye wenyu.

⁴¹Inze mbeye Yahova Nyasaye wenyu, wa mu leta kutwula mu kivala kya Egepeti, kuva Nyasaye wenyu: inze mbeye Yahova Nyasaye wenyu.