Read lulogooli Livalidza 5 Bible Online

Livalidza 5 - lulogooli bible

Livalidza 5

¹Na Yahova ya volera Musa, na a vola,

²U lage avana va Israeli, va twulidze u veye nobugere mu hokusosa, na ku vosi uyu u veye nekisununu, na ku vosi uyu u veye mudamano kigira mukudzu:

³mu la va hila kyova vosi, avasatsa na avakali, mu la va hila kyova wa hokusosa; va vule kwononya hokusosa havo, ha inze menya hagati havo

⁴Na avana va Israeli va kola ndiyo, na va va hila kyova wa hokusosa; kuli Yahova ya volera Musa, avana va: Israeli va kola ndiyo.

⁵Na Yahova ya volera Musa, na a vola,

⁶U volere avana va Israeli, Lwa musatsa kinga mukali va kola ubwoni ku bwosi bwa avandu va kola, kuduka kuhyola ku Yahova, na mundu uyu a la va nelikalagirwa;

⁷hene yaho a leyama ubwoni bwibwe bwa ya kola: na a liranya kigira kyokukalagirwa kikye nobudukanu bwakyo, na a la meda ku kidieli kilala kyevitano kyakyo, nokuha uyu wa ya hyola kuye kuva nekyokukalagirwa.

⁸Navutswa mundu uyu na a vula kuva nomwiko wa himbi a nyala kwiranyirwa kigira kyokukalagirwa, yiki kiranvangwa ku Yahova kigira kyokukalagirwa, ki la va kyomusalisi; kuvita ligondi likole lyokumulombera kyokukunika ubwoni.

⁹Na vihaanwa vyokudigululwa vyosi vyevindu vyosi vitakatifu, vya va haana ku musalisi vi la va vivye.

¹⁰Na vindu vitakatifu ku vyosi vyomundu ku vosi vi la va vivye: ku vyosi vya mundu a haana ku musalisi vi la va vivye.

¹¹Na Yahova ya volera Musa, na a vola,

¹²U volere avana va Israeli, nokuvola, Mukali womundu ku vosi, na a tsia haluvega, nokuhyola kuye,

¹³na musatsa a gona naye mu buheyi, na likuva yili li viseka ku musatsa wewe, na li vula kumanyekana, na mukali ni yononywa, na muloli na a ta li ho kuye, na a ta nyolerwa mu likola;

¹⁴na mwoyo gwelikendeka ni gu mu gumira, naye na a kendeka ku mukali wewe, zana wononywa: kinga mwoyo gwelikendeka ni gu gumira musatsa, na a veye nelikendeka ku mukali wewe, navutswa naye na a vula kwononywa:

¹⁵hene yaho musatsa wewe a la hila mukali wewe kutsia naye ku musalisi, nokumuletera kyokuhaanwa, nakyo ki la va kidieli kilala kyelikumi kya efa kyobusie bweshairi; a ta vika maguta kubwo, kinga kimulikigira ki veye kihaanwa kyobusie kyelikendeka, kihaanwa kyokwidzulitsa, kidzulitsanga ubudamano.

¹⁶Na musalisi a la leta mukali zana himbi, nokumuvika imbiri wa Yahova:

¹⁷na musalisi a la vugula amadzi matakatifu mu kiju kyobudohi; na musalisi a la vugula ulugukyi lu veye hasi mu lihema, Dokuluvika mu amadzi.

¹⁸Na musalisi a la vika mukali imbiri wa Yahova, na a la timbulula lisu lilye, na a la vika kihaanwa kyobusie kyokwidzulitsa mu makono gege, ki veye kihaanwa kyobusie kyelikendeka: na musalisi mu mukono gwigwe, a la va na amadzi malulu ga letanga kilaamo.

¹⁹Na musalisi a la mwisuhidza nokuvolera mukali, Musatsa na a va ni ya vula kugona nive, na ive nu u va ni wa vula kutsia haluvega kukola ubudamano nowundi, mu bugono bwomusatsa wowo, amadzi yaga gobululu aga letanga kilaamo, ga ta ku hamba mba.

²⁰Navutswa nu u va ni wa tsia haluvega ku wundi, mu bugono bwomusatsa wowo, nive nu u va nu wononywa, na musatsa u goni nive u ta li musatsa wowo:

²¹hene yaho musalisi a lesuhidza mukali ku lisuha lyekilaamo, na musalisi a la volera mukali, Yahova a kole ive kuva kilaamo na lisuha hagati ha vandu vovo, lwa Yahova a kola ivadzwa yoyo kukamika, na inda yoyo kuvimba;

²²na amadzi yaga ga letanga kilaamo ga lingira munda mumwo, nokukuvimbidza inda yoyo, na ivadzwa yoyo kukamika. Na mukali a la vola, Amini, Amini.

²³Na musalisi a la ng'oda vilaamo yivi mu kitabu, na a la vyeya na madzi gobululu:

²⁴na a la nwehidza mukali amadzi gobululu ga letanga kilaamo; na amadzi ga letanga kilaamo ga lingira muye nokugwa malulu.

²⁵Na musalisi a la vugula kihaanwa kyobusie kyelikendeka ku mukono gwomukali, na a la ki hungudza imbiri wa Yahova, nokukileta ku bwali:

²⁶na musalisi a la vugula ku kihaanwa kyobusie, uluhe lulala kuva lidzulitsa lyakyo, nokulusamba ku bwali, na inyima a la nwehidza mukali uyu amadzi zana.

²⁷Na lwa a mala kumunwehidza amadzi, hene yaho ga la duka, na va ni yononywa, nokuhyola ku musatsa wewe, amadzi ga letanga kilaamo ga lingira muye, nokugwa malulu, na mbiri gwigwe gu la vimba, na ivadzwa yeye i la kamika: na mukali uyo a la va kilaamo hagati ha avandu veve.

²⁸Navutswa mukali na a va ni ya vula kwononywa, na a veye mulahi; hene yaho a la va mu boholole, na la va inda.

²⁹Yili ni lilaga lyelikendeka, inyinga mukali a tsia haluvega ku wundi mu bugono bwomusatsa wewe, ni yononywa;

³⁰kingainyingamwoyo gwelikendeka gu gumira musatsa, na a kendekera mukali wewe; hene yaho a la vika mukali imbiri wa Yahova, na musalisi a la kola kuye lilaga yili lyosi.

³¹Na musatsa a la va bugira lihyolo, na mukali a la ginga lihyolo lilye.