Read lulogooli Livalidza 8 Bible Online

Livalidza 8 - lulogooli bible

Livalidza 8

¹Kandi Yahova ya volera Musa, i na a vola,

²U volere Haruni, nokumuvolera, Lwa u hambidza tsitaya, tsitaya tsitano na tsiviri tsi laaka imbiri wekinara kyetaya.

³Na Haruni ya kola ndiyo; ya hambidza tsitaya tsyakyo tsi duke kuaaka imbiri wekinara kyetaya kuli Y ahova ya laga Musa.

⁴Na miyinzi gyekinara, gyi veye miyinzi gyelituulwa lyethahabu; kutwula ku bwikaliru bwakyo kuduka ku vimuli vyakyo, gya Ii miyinzi gyelitulwa: kuli lugano lwa Yahova ya mannya Musa, ni ndiyo ya lomba kinara kyetaya.

⁵Na Yahova ya volera Musa na a vola,

⁶U twulidze Avalevi hagati ha avana va Israeli, na u va takase.

⁷Na u la va kolera yaga mu litakaswa lyavo: wuhe kuvo amadzi aga takasanga ubwoni, ma va v ege mubiri gwavo gwosi, na vogidze tsingubo tsvavo, nokwetakasa avene.

⁸Ma va haane igiriki isoleli, halala nobusie bwayo bwokuhaana, bu ve bunyuki bwa tsukanywa na maguta; na ive u la vugula igiriki yindi isoleli kuva kihadnwa kyobwoni.

⁹Na u la vungidza Avalevi imbiri welihema lyokuvuganira mu: kandi u la vungidza livugana lyosi lya avana va Israeli:

¹⁰na u la leta Avalevi imbiri wa Yahova. Na avana va lsraeli va la vika makono gavo ku Avalevi:

¹¹na Haruni a la haana Avalevi imbiri wa Yahova kuva kihaanwa kyokuhungudzwa kigira avana va Israeli, Avalevi va kole ubutumiki bwa Yahova.

¹²Na Avalevi va la vika makono gavo ku mitwe gyetsigiriki: nive u la haana indala ku Yahova kuva kihaanwa kyobwoni na yindi kuva kihaanwa kyokusambwa, kulombera Avalevi kyokukunika ubwoni.

¹³Na u la vika Avalevi imbiri wa Haruni, na imbiri wa avana veve, nokuvahaana ku Yahova, kuva kihaanwa kyokuhungudzwa.

¹⁴Na ndiyo u la hulanya Avalevi kuvatwulidza mu avana va Israeli; na Avalevi va la va avange.

¹⁵Na inyima Avalevi va lingira kukola ubutumiki bwelihema lyokuvuganira mu: na ive u la va takasa, nokuvahaana kuva kihaanwa kyokuhungudzwa.

¹⁶Kiglra yava va haanwa ku inze kutwula mu avana va Israeli; mu bugono bwa vosi ava kunula inda, kali ava tanga kwivulwa ku vosi avana va Israeli, mba vuguye kuva avange.

¹⁷Kigira ava tanga kwivulwa vosi mu avana va Israeli va veye avange, ku avandu noku mitugu: ku lidiku lya nda kuya ava tanga kwivulwa vosi mu kivala kya Egepeti nda va takasa va ve avange mwene.

¹⁸Na mbuguye Avalevi mu bugono bwa ava tanga kwivulwa vosi mu avana va Israeli.

¹⁹Kandi Avalevi mmali kuhaana ku Haruni va ve kihaanwa kuye noku avana veve kutwula mu avana va Israeli, va kole ubutumiki bwa avana va Israeli mu lihema lyokuvuganira mu, kandi va ve kyokukunika ubwoni bwa avana va Israeli; ha vule kuva nobulwaye mu avana va Israeli, ku lyesunda lya avana va Israeli himbi hatakatifu.

²⁰Kunangwa Musa, na Haruni, na livugana lyosi lya avana va Israeli, va kolera Avalevi vindu yivi: kuli vyosi vya Yahova ya laga Musa ku Avalevi, avana va Israeli, va va kolera ndiyo.

²¹Na Avalevi vetakasa avene ku bwoni, na vogidza tsingubo tsyavo; na Haruni ya va haana imbiri wa Yahova kuva kihaanwa kyokuhungudzwa; na Haruni ya va lombera kyokukunika ubwoni kuvatakasa.

²²Na lwenyima Avalevi vingira kukola ubutumiki bwavo mu lihema lyokuvuganira mu imbiri wa Haruni, na imbiri wa avana veve: kuli Yahova ya laga Musa ku Avalevi, va va kolera ndiyo.

²³Na Yahova ya volera Musa, na a vola,

²⁴Yivi nivyo vi dukiranga Avalevi: kutwula ku avemihiga makumi gaviri na gyitano nokuvita, va lingira kutumika mu miyinzi gyelihema lyokuvuganira mu:

²⁵na kuduka ku mihiga makumi gatano va la leka kutumika mu miyinzi, va vule kutumika kandi,

²⁶navutswa va la tumika halala na avamwavo vavo mu lihema lyokuvuganira mu, kulinda lilaga, na va la vula kukola miyinzi. Ni ndiyo u la kolera Avalevi mu bulindi bwavo.