Read lulogooli Mika 3 Bible Online

Mika 3 - lulogooli bible

Mika 3

¹Mwinye ava veye mitwe gya Yakobo, na mwinye avamehanga mu inyumba ya Israeli: si ga dukanga mwinye kumanya likalaga?

²Mwinye avadunyiranga ubulahi, na mu yanza budamano; mwinye ava fuvulanga magodo gavo kutwula kuvo, nenyama yavo kutwula ku vigumba vyavo;

³kandi ava litsanga inyama yemibiri gya avandu vange, na ava nyenya magodo gavo, nokuvunannya vigumba vyavo, nokuvitemaga vidonye, kuli kuvivika mu inyingu, kuli inyama i veye mu sufuria.

⁴Inyinga yeyo va lanira Yahova, navutswa a la vula kuvativulira; yee, a la visa mmoni mwimwe va vule kumulola inyinga yeyo, kuli va koli budamano mu likola lyavo.

⁵Yahova a vola ndi ku avaprofeti avagotidzanga avandu vange; ava lumanga na amino gavo, nokukupa lwanga nokuvola, Mirembe; noku vosi a vula kuvika kindu mu minwa gyavo, va lomba bulwani kuye.

⁶Kigira yaga bu la va ubudiku ku mwinye, mu vule kunyola malola; na ki la va kisundi ku mwinye, mu vule kuva nobusegetiri; neliuva li lika ku vaprofeti yavo, lidiku yilyo li la va limwamu kuvo.

⁷Na valoli va la va isoni, na vasegetiri va la genya; yee, vosi va la kunika minwa gyavo; kigira si ha veye nelitivula lya Nyasaye.

⁸Navutswa ku inze, ligali nzizuye tsingulu tsya Roho wa Yahova, nelikalaga, nobunyali, kwilwadzira Yakobo mahyolo gege, na Israeli ubwoni bwibwe.

⁹Mwadza, mu hulire yaga, mwinye ava mu veye mitwe gyenyumba ya Yakobo, na mwinye avamehanga mu inyumba ya Israeli, avadunyiranga likalaga, nokukyaminya ubulungi.

¹⁰Vombakanga Zioni na masahi, na Yerusalemi nobudamano.

¹¹Ava veye mitwe gyalyo va kalaga kunyola vikukula, navasalisi valyo vegidzanga kunyola madanyi, navaprofeti valyo va ng'olanga kunyola ifetha: navutswa va yeka ku Yahova, ni va vola, Yahova si a veye hagati hetu? Ubudamano si bu la duka ku kwinye.

¹²Kunangwa Zioni li la limwa kigira mwinye, na Yerusalemi li la gwa vitumi, na kigulu kyenyumb ki la va kuli hadiguluku homulitu.