Read lulogooli Mika 5 Bible Online

Mika 5 - lulogooli bible

Mika 5

¹Mwami welirova lyosi. Kalunu u li vungidza viduma, O mukana weviduma; uyu u ku kumbiridza nelihe lilye: va la kuya mukalagi wa Israeli nempimbo ku lusaya lwilwe.

²Navutswa ive, Beth-lehemu Efaratha, u veye mukekeke mu tsielfu tsya Yuda, mulala a la twula ku ive a ladza ku inze u li duka kuva welyameha mu Israeli; litwula lilye ni lya kale, kutwula mihiga nemihiga.

³Kigira yaga a la va leka, kuduka inyinga yelivula lya uyu u lumangwa: inyinga yeyo ava tigala vavamwavo veve va lirana ku avana va Israeli.

⁴Na a la singira nokwaya kyayo kikye netsingulu tsya Yahova, nobunene bwelieta lya Yahova Nyasaye wewe: na va la menya; kigira kalunu a la va munene kuduka ku viheri vyelirova.

⁵Na mundu uyu a la va mirembe gyetu. Lwa Muasuria a lingira mu kivala kyetu, nokuduvaga mu tsinyumba tsyetu tsyobwami, hene yaho kulavukidza kuye avayi vatano na vaviri, navandu vanene vatano na vavaka.

⁶Navo va lononnya ki vala kya Asuria nekivavi, nekivala kya Nimirodi mu bwingiriru bwakyo: na a la kuhonnya ku Muasuria, lwa yingira mu kivala kyetu, lwa a duvaga mu tsinzako tsyetu.

⁷Na avatigala va Yakobo va la va hagati ha avandu vanyingi kuli lime li twulanga ku Yahova, kuli lunyirira ku bunyasi, vi ta lindiriranga umundu, kinga kulindirira avana vavandu.

⁸Va tigala va Yakobo va la va hagati hetsihiri, hagati ha avandu vanyingi, kuli king'ang'a mu tsinyama tsyombulimu, kuli king'ang'a kisoleli mu kyayo kyamagondi; lwa ki vitanga hagati, ki duvaganga nokutandula, na si ha veye na u nyala kuhonnya.

⁹Mukono gugwo gu gingwe igulu kuvita avadambidzi vovo, navasigu vovo vnsi va twulidzwe.

¹⁰Na ga la duka mu lidiku yilyo, Yahova a vola, nda twulidza tsiparasi tsitsyo tsi twuli hagati hoho, na magari gogo gobulwani nda ga dividza:

¹¹na nda twulidza madala gekivala kikyo, netsimpinga tsitsyo tsyosi nda tsi tsoma hasi.

¹²Nda twulidza ubukumu bu twule mmukono gugwo; na u la vula kuva na vangoleranga ku malesi:

¹³nda twulidza vifwananyi vivyo vyokuvadzwa na vitaradzi vivyo vi twule hagati hoho; na si u la sigamira miyinzi gyomu kono gugwo kandi mba;

¹⁴ndiha misambwa gyi twule hagati hoho; na madala gogo nda ga dividza.

¹⁵Na nda tungira kisalya mu livihirirwa nobutima ku tsihiri tsya vula kuhulira.