Read lulogooli Mika 6 Bible Online

Mika 6 - lulogooli bible

Mika 6

¹Mu hulire kalunu ga Yahova a vola: Singira, u hing'ane imbiri wevigulu, no tugulu tu hulire mwoyo gugwo.

²Mu hulire mwinye vigulu, lihing'ana lya Yahova, na mwinye mise gyelirova gyi hindiranga; kigira Yahova a veye nelihing'ana na avandu veve, nelivanza ku Israeli.

³O avandu vange, mmu koleye ki? Mmu luhidzi mu kindu ki? Mu lolekidze ku inze.

⁴Kigira nda leta ive kwanegira kutwula mu kivala kya Egepeti, nda ku tungira u twule mu inyumba yobutugwa: na nda tuma mbiri wowo Musa, na Haruni, na Miriamu.

⁵O avandu vange, mwidzulitse kalunu ga Balaki mwami wa Moabu ya saavira, kandi ga Balaam mwana wa Beoru ya tivula: widzulitse kutwula Shitim kuduka Gilgali, mu duke kumanya likola lilungi lya Yahova.

⁶Nzisunde imbiri wa Yahova nekindu ki, nokwinama imbiri wa Nyasaye wa igulu? Nzisunde imbiri wewe nevihaanwa vyokusambwa, nevimoli vyomuhiga mulala?

⁷Yahova a la yanzidzwa netsieifu tsya magondi makole, kinga nemigera gyamaguta tsielfu likumi? Mbaane wokutanga kwivulwa wange kigira mahyolo gange, lwivulu lwomubiri gwange kigira bwoni bwomwoyo gwange?

⁸Uyu u vuuliranga ive, O mundu, aga veye malahi; na Yahova yenyanga kindu ki ku ive, ni ga ta li likola ubulungi, nokuyanza tsimbabasi, nokugenda nobuhooma halala na Nyasaye wowo?

⁹Mwoyo gwa Yahova gu langanga ku lidala, mundu wobugeeri a la lola lieta lilye: mu hulire impimbo, ni bwaha wa gi laga.

¹⁰Kuduka kalunu akiba yobudamano i kikiri mu inyumba ya vadamano, nekigero kva geha kyokuvihiriridza?

¹¹Nda va mulahi ni mbeye netsiratili tsindamano, na imuya yamagina gobugadi?

¹²Kigira avatugi va yaho vizuye kirage, na va menyanga mu va vehanga, na ululimi mminwa gyavo lu veye nobugadi.

¹³Kigira yaga nda ku kuya nelikuya lisaleridzanga; nku koli u gwe hatswa kigira ubwoni bubwo.

¹⁴U la lia, navutswa u la vula kwiguta, noluhongo lu la va muunda mumwo: na u la vikwa haluvega na si u la hona; na kya u ginga nda ki haana ki ve ku kivavi.

¹⁵U la taga, navutswa u la vula kugesa; u la mina mizeituni, navutswa si u levaka maguta gagyo; na lyagula lyemizabibu u la va nalyo, navutswa si u la nwa iwaini.

¹⁶Kigira amalago ga Omri nigo ga gumirwa, nelikola lyosi lyenyumba ya Ahabu, na mu gendanga mu makuva ga yava: nduke kukukola hatswa, na yavo ava menyanga mu kukunukirwa: na mu la ginga linyegwa lyavandu vange.