Read lulogooli Mika 7 Bible Online

Mika 7 - lulogooli bible

Mika 7

¹O bayaye ku inze kigira mbeye kuli lwa va mali kwagula makuyu genyinga yoluya, kuli mazabibu ga dolangwa mu inyima yelyagula: nekiganda si ki nyoleka kulia; nomwoyo gwange gwenyanga makuyu gokutanga kwenga.

²U veye mulungi u divi kutwula ku lirova, si ha veye nomulala u veye mulungi mu avandu: vosi va gonekanga ku tahidza masahi; sa mulala a himanga amwavo wewe nomuluvo.

³Amakono gavo ga gumiye vyobudamano va duke kubukola netsingulu; munene a tevanga, nomukalagi yetegeki kuvugula vikukula; nomunene a volanga ubukyamu bwa a veye nabwo mmwoyo gwigwe: ni ndiyo va navanga vindu yivi.

⁴Uyu mulahi kuvo a veye kuli lutavati; na u veye mulungi a veye mudamano kuoita lwevo lwa mafwa: lidiku lyavalindi vovo, kali lidiku lyelivanzwa lilyo, li duki; kalunu li la va ho ligenya lyavo.

⁵Mu ta suuvira avalina; mu ta suuvira mwimiriri; u linde minwa gyomunwa gugwo mukali u gonanga mu kiritu kikyo a vule kumanya.

⁶Kigira mwana a legannyanga dada wewe, nomukana a singiranga kuhing'ana na mama wewe, nomwiha a hing'ananga na navizala wewe; avasigu vomundu va veye yavo avenyumba yeye mwene.

⁷Navutswa mu makuva gange, nda henza Yahova; nda lindirira Nyasaye wobuhonhyi bwange: Nyasaye wange a la mbulira.

⁸U tidzominyira ku inze, O musigu wange: lwa ngwa, nda vuka kandi lwa nzikala mkisundi, Yahova a la va bulavu ku inze.

⁹Ndekudzira ku ubutima bwa Yahova, kigira nda mu kolera ubwoni, a luhe a mbere, nokunkolera likalaga: a Iz ndeta mu bulavu, nda lola ubulungi bwibwe.

¹⁰Hene yaho musigu wange a la lola inkuva yiyi, na a la kunikwa tsisoni uyu wa mbolera, Yahova Nyasaye wowo a veye haliha? Tsimoni tsyange tsi la mu lola; kalunu a la duvagwa kuli ubudohi bwokuli hasi.

¹¹Li veye lidiku lyokwombaka madigi gogo, mu lidiku lilyo lilaga li la hilwa ihale.

¹²Mu lidiku yilyo va ladza ku ive, kutwula Asuria namadala ga Egepeti, noku twula Egepeti kuduka ku Mugera, kandi kutwula ku inyanza yiyi kuduka ku inyanza yiyi, nokutwula ku kigulu yiki kuduka ku kigulu yiki.

¹³Halala na yaga kivala ki la va vutswa kigira yava ava menyanga mu kyo na kigira makuyu gelikola lyavo.

¹⁴U lihidze avandu vovo nempimbo yoyo, kyayo kyemiyandu gyigyo, yavo ava menyanga veng'ine, mu mulitu gu veye hagati ha Karimeli: vaye mu Bashan na Gileadi, kuli vaya mu madiku ga kale.

¹⁵Kuli ga li mu madiku gelitwula lilyo mu kivala kya Egepeti nda mu mannya vyokugenya.

¹⁶Vetsihiri va la lola, no kuva isoni ku bunyali bwavo bwosi; va la kunika minwa gyavo na makono gavo; amatu gavo ga la hana.

¹⁷Va la komba lugukyi kuli inzoka; kuli vimolanga vyelirova va la twula ha tsingo tsyavo ha lyevisa lyavo nelidegera, va la tsia ku Yahova Nyasaye wetu nokumutia, na va la lola ubutii kigira ive.

¹⁸Ni bwaha a veye Nyasaye kuli ive, u samehanga ubudamano, na u vitanga ku mahyolo gavatigala vemiyandu gyigye? Si ya vihirirwa madiku gosi, kigira a yanza tsimbabasi.

¹⁹A lirana nokukuvererera; a la duvagira ubudamano bwetu isi wevirenge; na u la syuva ubwoni bwavo bwosi mu luliva lweinyanza.

²⁰Na u la dukidzira Yakobo ageligali, na tsimbabasi u la dukidzira Abrahamu, vya wesuhira vaguga vetu kutwula madiku ga kale.