Read lulogooli Nahum 3 Bible Online

Nahum 3 - lulogooli bible

Nahum 3

¹O bayaye ku lidala lya masahi lizuye ububehi na ubunuuli; vilanye si vi twula mba.

²Lilangerira lyetsinkova, na umuliviti gwetsingida tsyamagari; na ligenda lyetsiparasi, namagari gobulwani ga tumanga,

³na avasikari vetsiparasi va nina ku tsiparasi tsyavo na kivavi ki ng'ering'anga, na litimu li kupanga tsimpeni; na bunyingi bwa yavo aviitwa, na kitumi kinene ligali kyemibiri mikudzu, si ki veye nekiheri kyemibiri; vekigitalanga ku mibiri mikudzu gyavo;

⁴kigira ubunyingi bwevindu vyamalaya vya uyu wamalaya weligondo lilahi, wekikali munene mu vindu vyobukumu, u gulidzanga avetsihiri namalaya gege, na aviko a va gulidzanga nevyobu kumu bwibwe.

⁵Henza, mbeye ku ive, Yahova wa mahe a vola, nda navula kitweya kikyo imbiri wowo, na nda mannya avetsihiri kyahonyo kikyo, na nda mannya ubwami tsisoni tsitsyo.

⁶Na nda ta ku ive livihiriridza, nokukukola uguvihiri, nokukuvika mu lisinyikirwa.

⁷Na ga la duka, vosi ava ku lola, va la kwiruka, nokuvola, Nineve u gwiye ing'anye: ni bwaha u mu lilira? Ndenya haliha ava ku leminya mwoyo?

⁸U veye mulahi kuvita Noamon, lya li ho hagati hemigera, lya li na madzi kukumbiridza tsimbega tsyosi; volugaga lwilwe lwa li inyanza, na lidigi lilye lya li lyenyanza?

⁹Ethiopia na Egepeti vya li tsingulu tsitsye, natsyo tsya li bugira kigero; Putu na Lubim va li vakonyi vovo.

¹⁰Na vutswa lya hilwa, ihale, lya tsia mbutugwa; avana vadoto veve va duvulwa vidonye ha mitwe gyamahasi gosi; na va kola ikura ku avandu veve vobukumi, navandu veve avanene va bofwa neminyororo.

¹¹Kandi u la hambika; u la viswa; ive kandi u lenya impinga kigira vasigu.

¹²Tsimpinga tsitsyo tsyosi tsi la va kuli mikuyu gyi veye na makuyu gokutanga kwenga: ni gyi sung'uswa, gagulukiranga uyu u litsanga mmunwa gwigwe.

¹³Henza, avandu vovo hagati hoho va veye avakali; neviribwa vyekivala kikyo vi mali kwigulwa imbiri wa avasigu vovo: muliru gu sambi muluguyu gugwo.

¹⁴Daha madzi kigira likumbiridza lilyo; vike tsimpinga tsitsyo tsingulu; wingira mu budohi, u duvule lolongo, vika tsingulu ku kisambiru kyamatalali.

¹⁵Muliru gu la ku sambira yo; kivavi ki la ku kalaga; ki la ku lia kuli lilia lyobutsiriri; welombe mwene kuva avanyingi kuli ubutsiriri; welombe kuva avanyingi ku tsisigi.

¹⁶U mali kumeda avakirannyi vovo kuva vanyingi kuvita tsing'ereng'ani tsyomigulu: lutsiriri lwononnyanga, ma lu buluka kutsia.

¹⁷Avandu vovo ava vikwa itaji va gwiye kuli tsisigi, avanyampara vovo kuli viduma vyamadede, aga vunganga kutsinzebo mu lidiku lyobukihdu, navutswa liuva ni li tonga ga buluka, na ha ga li si ha manyakana mba.

¹⁸Avayi vovo va gona tsindola, O mwami wa Asuria; avanene vovo va sosa; navandu vovo va salani mu viguiu, si ha veye nu u nyala kuva vungidza halala.

¹⁹Lugoma lulwo lukutsunanga si lu nyala kuhonnywa; lugoma lulwo lu veye nobululu ligali: vosi ava huliranga makuva gogo va kong'onda makono ku ive; kigira ni bwaha wobudamano bubwo bwa vula kuvita kuye kazozo?