Read lulogooli Zefania 1 Bible Online

Zefania 1 - lulogooli bible

Zefania 1

¹Yili ni likuva lya Yahova lya duka ku Zefania mwana wa Kushi, mwana wa Gedalia, mwana wa Amaria, mwana wa Hezekia, mu madiku ga Josia mwana wa Amoni, mwami wa Yuda.

²Nda heridza ligali vindu vyosi vi twule mu lirova, Yahova a vola.

³Nda heridza avandu netsinyama; nda heridza manyonyi gombwerefu, netsisudzi tsi veye mu inyanza, na vyokwikigitalidza halala navadamano; nda twulidza umundu mu Iirova, Yahova a vola.

⁴Nda nyira mukono gwange ku Yuda noku vosi ava menyanga Yerusalemi; nda twulidza va tigala va Baal hano, nelieta lya Vakemari navasalisi;

⁵navo ava sigamira amahe gomigulu ku visegese vyetsinyumba; na yavo ava sigamiranga, avesuhiranga Yahova nokwisuha ku Malikam;

⁶na yavo avirana inyima ava leka kulonda Yahova; na yavo ava vula kulonda Yahova, kinga kumwenya.

⁷Kiring'ana lwo Mwami Nyasaye a veye nive; kigira lidiku lya Yahova li veye ahimbi: kigira Yahova u lombi kihaanwa, u takasi avageni veve va ya langa.

⁸Na ga la duka mu lidiku lyekihaanwa kya Yahova, inze nda kalagira avanene, na vayai vomwami, na vosi avevika tsingubo tsigeni.

⁹Kandi mu lidiku yilyo nda kalagira vosi ava sira mukingi, yavo avizulitsa inyumba yomwami wavo kirage nobugadi.

¹⁰Kandi mu li diku yilyo, Yahova a vola, li la va ho liyoga lyelilira mu kiribwa kyetsisudzi, nelisyoma mu lusoma lwa kaviri, nomuliviti mu vigulu.

¹¹Mu kupe tsikwili mwinye ava menyanga ha Makiteshi; kigira ava ndu vosi va Kanani va heri; vosi avemisigo gyefetha va twulidzeywi.

¹²Na ga la duka inyinga yeyo, nda mulika mu Yerusalemi netsimulina nda kalagira avandu ava gunza ku amaseke, ava volanga mu myoyo gyavo, Yahova si a la kola bulahi, kandi si a la kola budamano.

¹³Nobutugi bwavo bu la va vilanye, netsinyumba tsyavo tsi la va hatswa: yee, va lombaka tsinyumba navutswa si va la menya mutsyo mba; va la simika mizabibu, navutswa si va la nwa iwaini yagyo mba.

¹⁴Lidiku linene lya Yahova li veye himbi, li veye himbi lidzanga bwangu ligali, kali mwoyo gwelidiku lya Yahova; mundu wobunyali a liranga yo nobululu ligali.

¹⁵Lidiku yilyo li veye lidiku lyobutima, nelidiku lyekivi nelidambidza, lidiku lyelidividza nelyokukola hatswa, lidiku lyekisundi na lya malesi, lidiku lyamalesi nekisundi kinene,

¹⁶lidiku lyekisiliva nelitihidza, ku madala getsingaga, noku madigi getsingaga matambi.

¹⁷Na nda leta lidambidza ku avandu, va luhe va gende kuli avaboku, kigira va koli ubwoni ku Yahova; masahi gavo ga la tahidzwa kuli lugukyi, netsinyama tsyemibiri gyavo kuli isina.

¹⁸Ifetha yavo si i nyala kuvahonnya, kinga ithahabu yavo, mu lidiku lyobutima bwa Yahova; navutswa kivala kyosi ki la sambwa nomuliru gwelikendeka lilye: kigira a la heridza, yee, ha la va neliheridza lyokutihidza, ku vosi ava menyanga mu kivala yiki.