Read lulogooli Zekaria 3 Bible Online

Zekaria 3 - lulogooli bible

Zekaria 3

¹Naye ya mmannya Joshua musalisi munene a singiranga imbiri wa ingelosi wa Yahova, na Setani ya singira ha mukono mulungi gwigwe kuva muhangalidzi wewe.

²Na Yahova ya volera Setani, Yahova a ku gondokire, O Setani; yee, Yahova u tovoye Yerusalerni a gondokire ive: yiyi si i veye isese yaakanga ya twulidzwa ku muliru?

³Ma Joshua ya li ni yevika tsingubo tsindamano, na a singira imbiri wa ingelosi.

⁴Naye ya tivula na a volera ava li ni va singiye imbiri wewe, na a vola, Mu navule tsingubo tsindamano tsi veye kuye. Naye ya mu volera, Henza, ubudamano bubwo mmali kubutwulidza ku ive, na nda ku vika tsingubo tsyobuguli budinyu.

⁵Na nda vola, Va mu vike igudwa indahi ku mutwe gwigwe. Ma va vika igudwa indahi ku mutwe gwigwe, nokumuvika tsingubo; na ingelosi wa Yahova ya singira ahimbi naye.

⁶Kandi ingelosi wa Yahova ya lolekidzira Joshua, na a vola,

⁷Yahova wa mahe a vola ndi: Nu u va nu u genda mu tsinzira tsyange, nokulinda ubulindi bwange, hene yaho u la kalagira inyumba yange, nokulinda migidzi gyange, na nda ha ive ubwiyangu bwokwingira hagati ha yavo avasingiranga ahimbi.

⁸Hulira kalunu, O Joshua musalisi mu nene, ive na avakyo avikala imbiri wowo; kigira va li avandu ava li kyokumanyira: kigira, henza, nda leta mutumekiri wange u langwa Kisibu.

⁹Kigira, henza, ligina lya mbika imbiri wa Joshua; ku ligina lilala tsi veye ku tsimoni tsitano na tsiviri; henza, nda ng'ola bung'oli bwalyo, Yahova wa mahe a vola, na nda twulidza ubudamano bwekivala yikyo ku lidiku lilala.

¹⁰Mu lidiku yilyo mu la langa sa mulala mutende wewe isi womuzabibu, na isi womukuyu, Yahova wa mahe a vola.