Read lulogooli Zekaria 6 Bible Online

Zekaria 6 - lulogooli bible

Zekaria 6

¹Na kandi nda ginga tsimoni tsyange, nokulola, na henza, magari gobulwani gane gadzanga kutwula hagati hevigulu viviri; na vigulu zana vya li vyomugasa.

²Ku ligari lyokutanga tsya li ku tsiparasi tsinzakanyu; noku ligari lya kaviri tsya li ku tsiparasi tsimwamu;

³noku ligari lya kavaka tsya li ku tsiparasi tsindavu; noku ligari lya kane tsya li ku tsiparasi tsisembe tsyetsingulu.

⁴Ma nda tivula ni mbolera ingelosi wa volerana ninze, Yaga ga veye kindu ki, munene wange?

⁵Ingelosi ya tivula nokumbolera, Yitsi tsi veye tsimbuudza tsine tsyomigulu, tsi twulanga mu lisingira imbiri wa Yahova, Mwami welirova lyosi.

⁶Na ligari li veye netsiparasi tsimwamu li tsia ku luvega lwekivala kya kasikasini; na lya li netsiparasi tsindavu li londerera inyima watsyo; na lyetsisembe lya tsia ku luvega lwekivala kya kusini.

⁷Na tsinzakanyu tsya twula kutsia, ni tsyenya kutsia tsi duke kugenda yiyi na yiyi mu lirova lyosi: naye ya tsi volera, Mu twule, mu tsie yiyi na yiyi mu lirova. Ma tsya tsia yiyi na yiyi mu lirova.

⁸Ma ya nyanira, nokuvolera inze, na a vola, Henza, tsi tsiye ku luvega lwekivala kya kasikasini tsi neminye mwoyo mu kivala kya kasikasini.

⁹Kandi likuva lya Yahova lya duka ku inze, kuvola,

¹⁰Vugula ku yavo avadikidzwa, livola li veye ava Helidai, na ava Tobija, na ava Jedaia; na udze lidiku zana, nokwingira mu inyumba ya Josia mwana wa Zefania, ha va duka kutwula Babuloni;

¹¹yee, vugula kuvo ifetha na ithahabu, na u lombe igudwa, u gi vike ku mutwe gwa Joshua mwana wa Jehozadaku, musalisi munene;

¹²mu voierane, na u vole, Yahova wa mahe a ku voleranga makuva yaga, na a vola, Henza, umundu u langwa lieta lilye Kisibu: a la sibuka ho bugono bwibwe; na a lombaka litempeli lya Yahova;

¹³yee, uyu a lombaka litempeli lya Yahova; kandi naye a la ginga ubukumi, na a likala nokwameha ku intebe yeye yobwami; na a la va musalisi ku intebe yeye; na livola lyemirembe li la va hagati havo vombi.

¹⁴Na tsitaji tsi la va ku Helem, noku Tobija, noku Jedaia, noku Hen mwana wa Zefania, kuva kwidzulitsa mu litempeli lya Yahova.

¹⁵Na yavo va veye ihali va ladza nokwombaka mu litempeli lya Yahova; na mu la manya ni Yahova wa mahe wa ntuma ku mwinye. Na yaga ga la kolwa ni mu va ni mu hulira ligali mwoyo gwa Yahova Nyasaye wenyu.