Read lulogooli Zekaria 7 Bible Online

Zekaria 7 - lulogooli bible

Zekaria 7

¹Na ga duka mu muhiga gu kola gyine gyelyameha lyomwami Dario, likuva lya Yahova lya duka ku Zekaria ku lidiku lya kane lyomweli gwe gyitano na gyine, livola li veye mweli gu langwa Kiselevu.

²Inyinga yeyo yavo ava Bethli va tuma Sharezeru na Regemmeleku, halala na avandu vavo, va duke kusaava tsimbabasi tsya Yahova,

³nokuvolera avasalisi avenyumba ya Yahova wa mahe, na avaprofeti, kuvola Ga ndukira kulira ku mweli gwegyitano, nokwiyahuia ku avandu, kuli nda kola ku mihiga gya vita minyingi?

⁴Hene yaho likuva lya Yahova wa mahe lya duka ku inze, kuvola,

⁵U volere avandu vosi vekivala, na avasalisi, u va volere, Lwa mu honga lilia nokusyoma ku mweli gwa katano noku mweli gwa katano na kaviri, mu mihiga yigyi makumi gatano na gaviri mwa honga lilia ku inze, ku inze ligali?

⁶Na lwa mu litsanga nokunwa, si mu litsanga ku mwinye avene, nokunwa ku mwinye avene?

⁷Si ga mu dukira kuhulira makuva ga Yahova ya leta na makono ga avaprofeti vokutanga, inyinga avandu va menya mu Yerusalemi mu bugasu, nomu madala yago ga li kumbiridza, noluvega lwa Kusini na vivala vyekereremu vya li na vandu?

⁸Kandi likuva lya Yahova lya duka ku Zekaria, kuvola,

⁹Yahova wa mahe a vola yaga, na a vola, Kalaga likalaga lyeligali, na mu ve netsimbabasi nelivererera mundu sa mulala na avamwavo veve:

¹⁰mu ta dambidza mukunzakali, kinga mwana mbisandu, kinga umumenya, kinga mudaka; na mulala ku mwinye a vula kusaavira ubudamano mu mwoyo gwigwe ku amwavo wewe.

¹¹Navutswa va sula ku hulira, na vegirunkannya haluvega, va hannya amatu gavo, va vule ku hulira.

¹²Yee, va kola myoyo gyavo kuva kuli ligina lidinyu, gase va la hulira lilaga, na likuva lya Yahova wa mahe ya leta na Roho wewe na makono ga avaprofeti vokutanga: kigira yaga butima bunene bwa twula ku Yahova wa mahe.

¹³Kandi ga duka, lwa yanira, navo si va bugirira kuhulira mba; ni ndiyo yavo va lanira, na inze si ndi hulira mba, Yahova wa mahe a vola;

¹⁴navutswa nda va salannya nembuudza yekihudzudzi hagati hetsihiri tsyosi tsya va vula kumanya. Ni ndiyo kivala yikyo kya li hatswa inyima wavo, kya duka kuva bugira mundu kali mulala wa vita hagati hakyo kinga wirana: kigira va kola hatswa kivala kya yanzidzangwa ligali.