Read lulogooli Zekaria 8 Bible Online

Zekaria 8 - lulogooli bible

Zekaria 8

¹Kandi likuva lya Yahova wa mahe lya duka ku inze, kuvola,

²Yahova wa mahe a vola: Nkendekera Zioni, likendeka linene, mbe nelikendeka lyobutima bunene kuye.

³Yahova a vola: Mmali kwirana ku Zioni, na nda menya hagati ha Yerusalemi: na Yerusalemi li la langwa Lidala lya geligali; na Kigulu kya Yahova wa mahe, Kigulu kitakatifu.

⁴Yahova wa mahe a vola: Ku madiku gadzanga avasakulu na avakeere va la menya mu mahasi ge Yerusalemi, sa mulala a la va nomu digiru mmukono gwigwe kigira ubusa kulu bwibwe.

⁵Na mahasi gelidala zana ga lizula avayai na vakana ava kinanga ku mahasi galyo.

⁶Yahova wa mahe a vola. Ni li va ni li veye likuva lyokugenya imbiri wetsimoni tsyavo avatigala ku avandu yavo mmadiku yago, ga dukanga kuva likuva lyokugenya imbiri wange? Yahova wa mahe a vola.

⁷Yahova wa mahe a vola: Henza, nda honnya avandu vange va twule mu kivala kyoluvega lwevugwe, na kivala kyoluvega lwe madioli;

⁸nda va leta, na va la menya hagati ha Yerusalemi; va la va avandu vange, na inze nda va Nyasaye wavo, mu geligali nomu bulungi.

⁹Yahova wa mahe a vola: Amakono genyu ga ve netsingulu, mwinye ava huliranga mu madiku yaga makuva ga twulanga mu minwa gya avaprofeti ava li ho ku lidiku lyelitemwa muse gweinyumba ya Yahova wa mahe, nalyo ni litempeli li duke kwombakwa.

¹⁰Kigira imbiri wa madiku yago si ha li nomundu wa langirwa miyinzi; kandi si ha li netsinyama tsi langirwa miyinzi; kandi si ha li nemirembe ku uyu u twulanga kinga wingiranga, kigira mudambidzi: kigira inze nda tindira nnya avandu vosi sa mulala na wakye.

¹¹Navutswa kalunu si nda va ku yavo avatigala va avandu yava kuli nda li mu madiku gokutanga, Yahova wa mahe a vola.

¹²Kigira bu la va ho bugutsa bwemirembe; muzabibu gu la leta makuyu gagwo, na marova ga lama limedeka lyago, na ligulu li la leta lime lyalyo; nda ha vandu va tigala miyandu gyevindu yivi vyosi.

¹³Kandi ga la va kuli mwa li neli laamwa mu tsihiri, O inyumba ya Yuda nenyumba ya Israeli, ni ndiyo ndi mu honnya, na mu la va ubugasu. Mu ta tia mba, navutswa makono genyu ga ve netsingulu.

¹⁴Kigira Yahova wa mahe a vola: Kuli nda saavira kumukolera ubu damano, lwa vaguga venyu va mbi hiriridza, Yahova wa mahe a vola, na si ndeganira mba;

¹⁵ni ndiyo kandi kalunu nsaaviye kukolera Yeru salemi nenyumba ya Yuda ubulahi: mu ta tia mba.

¹⁶Yaga namakuva ga mu li kola: Mu volerane samulala nomutende wewe makuva geligali; mu kalage likalaga lyeligali nemirembe mu viribwa vyenyu;

¹⁷kandi a ta va ho mundu hagati henyu u saavira ubudamano mu mwoyo gwigwe ku mutende wewe; mu ta yanza lyesuha lyobubehi kali hakuzu: kigira vindu yivi vyosi vi veye vya ndunyira, Yahova a vola.

¹⁸Na likuva lya Yahova wa mahe lya duka ku inze, kuvola,

¹⁹Yahova wa mahe a vola: Lihonga lilia lyomueli gwe gyine nelihonga lilia mu mweli gwe gyitano, nomu mweli gwe gyitano na gyiviri, nomu mweli gwelikumi, ga la va ubuyanzi nobusangali bwenyumba ya Yuda, na malia gokuleminya mwoyo; kigira yaga mu yanza geligali nemire mbe.

²⁰Yahova wa mahe a vola: madiku ga la duka, avandu va ladza na vamenyanga mu madala manyi ngi;

²¹na va menyanga mu lidala lilala va la tsia mu lindi, nokuvola, Genda kutsie bwangu kusaale tsimbabasi tsya Yahova, no kwenya Yahova wa mahe: na inze kandi nda tsia.

²²Yee, avandu vanyingi na vetsihiri vetsingulu va ladza kwenya Yahova wa mahe mu Yerusalemi, nokusaala tsimbabasi tsya Yahova.

²³Yahova wa mahe a vola: Mu madiku yago ga la duka, avandu likumi va la gumira, mu vandu vetsinimi tsyosi tsyetsihiri, va la gumira ingubo ya uyu u veye Muyuda nokuvola, Ku la genda halala nive, kigira ku huliye kuli Nyasaye a veye halala na mwinye.