Read lulogooli Malaki 4 Bible Online

Malaki 4 - lulogooli bible

Malaki 4

¹Kigira, henza, lidiku lidzanga, lyaakanga kuli kisambiru; na vosi avoluyai, na vosi avakolanga miyinzi gyobudamano, va la va uluvuva; na lidiku lidzanga li la va samba, Yahova wa mahe a vola, kali li la vula kuvalekera kitinya kinga lusya.

²Navutswa ku mwinye avatidzanga lieta lyange liuva lyobulungi li la mu kyera nelyobuhonnyi mu tsimbaha tsyalyo; na mu la twula, nokugoma kuli vimoli vi honganga hango.

³Na mu la duvaga vadamano; kigira va la va ligoke isi wevirenge venyu mu lidiku lwa nda kola yaga, Yahova wa mahe a vola.

⁴Mwidzulitse lilaga lya Musa mutumekiri wange, lya nda mu lagira ha Horebu ku Avaisraeli vosi, li veye amegidzo na likalaga.

⁵Henza, nda tuma Elija muprofeti, yadze ku mwinye ni li kikiri ku duka lidiku linene lyokutihidza lya Yahova.

⁶Naye a la girunkannya myoyo gya vadada gyi yeke ku avana, na myoyo gya avana gyi yeke ku vadada vavo; gase ndadza ku kuya lirova nevilaamo.