Read lulogooli Matayo 10 Bible Online

Matayo 10 - lulogooli bible

Matayo 10

¹Ya langa avegidzwi veve likumi navaviri, na a va ha tsingulu ku roho midamano, kugyitwulidza, kandi kuhonnya ubudekeranu bwosi nobulwaye bwosi.

²Ameta gavatumwa likumi navaviri ni yaga: wambiri, Simoni u langwa Petro, na Andreya amwavo wewe; Yakobo mwana wa Zebedayo, na Yohana amwavo wewe;

³Filipu, na Bartlomeyo; Tomasi na Matayo msololi wobushutu, Yakobo wa Alfayo, na Tadayo;

⁴Simoni Mukanani, na Yuda Iskarioti, wa mzama.

⁵Yava likumi navaviri, Yesu ya tuma na a veganehidza, na a vola, Mu ta tsia ku inzira ye Tsihiri, kandi mu tingira mmadala kali lilala lya Vasamaria:

⁶navutswa mu tsie ku magondi aga goti genyumba ya Israeli.

⁷Lwa mu genda, mwilwadze, mu vole, Ubwami bwomigulu bu veye himbi.

⁸Honnyi avalwaye, mu simugukidze avakudzu, mu honnye avagere, mu twulidze amademone. Mu hebeywi vutswa, mu haane vutswa

⁹Mu ta vugula ithahabu, kinga ifetha, kinga mugasa mu misipi gyenyu;

¹⁰kandi mu ta vugula imuya yo lugenda, kinga amakoti gaviri, kinga vilatu, kinga impimbo: kigira muyinziri a dukana nevyokulia vivye.

¹¹Kandi ku madala gosi notudala twosi twa mu lingira mu, mu teve ni bwaha yimu u veye mudukanu nelimenya lyenyu, mu menye ho mu luhe mu twule kandi.

¹²Lwa mu lingira mu inyumba mu gi chelidze.

¹³Nayo ni i dukana nemirembe gyenyu, mu leke mirembe gyi menye kuyo: navutswa ni i ta dukana, mirembe gyenyu gyi mwiranire.

¹⁴Ku vosi u ta mwingiridza kandi u ta hulira amakuva genyu, lwa mu li twula munyumba yeyo kinga mu lidala yilyo, mweye ulugukyi lwevirenge vyenyu.

¹⁵Ligali mmu volera, Ubulahi bwekivala kya Sodoma nekya Gomora mu lidiku lyokukalaga bu la vita bwelidala yilyo.

¹⁶Henza, inze mmu tuma kuli magondi hagati hevisalang'ongo; mu ve nobugeeri kuli tsinzoka, nobuhooma kuli makuulu.

¹⁷Navutswa mu gelihe ku vandu: kigira va la mu hila mu viina, na mu masomero gavo va la mu kuya;

¹⁸kandi mu la hilwa imbiri wavanyampara navami kigira inze li ve lilolekidza kuvo noku Tsihiri.

¹⁹Navutswa lwa va li mu gumira, mu ta henda myoyo mba aga mu li tivula kinga aga mu li vola: kigira ku isaa yeyo mu la ka hebwe aga mu li vola.

²⁰Kigira si mu li mwinye mu vola, navutswa Roho wa Dada wenyu a vola mu mwinye.

²¹Namwavo a la twulidza amwavo yiitwe, na ise a la twulidza mwana wewe: navana va la twulira avivuli, va kola viitwe.

²²Avandu vosi va la mu dunyira kigira lieta lyange. Navutswa u dinya kuduka ku kiheri, uyu a la ka honnywe.

²³Navutswa lwa va mu dambidza mu lidala lilala, mwirukire mu lindi: kigira rnmu volera ligali, Si mu li malilidza amadala ga Israeli, Mwana wa Adamu a ladza.

²⁴Mwegidzwi si a nyala kuvita u mwegidzanga, kinga mtugwa si a nyala kuvita wa mtuga.

²⁵Ga duki mwegidzwi kuva kuli mwegidzi, nomtugwa kuva kuli wa mtuga. Ni va langa mwene inyumba Beelzebuli, nasindi avenyumba yeye

²⁶Kigira yaga mu ta va tia: kigira si ha veye nekya kunikwa, ki li vula kukunulwa; kinga kya viswa, ki li vula kumannywa.

²⁷Aga mmu volera mu kisundi, mu vole habulavu; naga mu huliranga mgutu galaha, mu gambire ku inyumba.

²⁸Kandi mu ta tia aviitanga mubiri mba, navu tswa si va nyala kwiita mwoyo: nu bulahi mu tie u nyala kudividza mwoyo kandi mubiri mu gehena.

²⁹Si ga gulangwa matondelidzi gaviri isenti indala? Navutswa kali lilala si li nyala kugwa hasi bugira Dada wenyu na a la li manya.

³⁰Navutswa amasugene goku mitwe gyenyu ga validzwa gosi.

³¹Kigira yaga mu ta tia mba: kigira mwinye mu vita matondelidzi manyingi.

³²Uyu u nzi yamira imbiri wavandu, inze kandi nda mwiyamira imbiri wa Dada wange u veye migulu.

³³Ku vosi uyu u li nyambakana imbiri wavandu, ndi mwambakanira imblri wa Dada wange u veye migulu.

³⁴Mu ta ganagana ndadza kuleta mirembe mu lirova: si ndadza kuleta mirembe, navutswa kuleta kivavi.

³⁵Kigira ntsitsa kwavukannya mu ndu na ise, nomkana na mama wewe, nomukali nanavizala wewe:

³⁶na vasigu vomundu va la va avenyumba yeye.

³⁷U yanzanga ise na mama wewe kuvita inze si a dukana ninze; kandi u yanzanga mwana muyai kinga mukana kuvita inze, si a dukana ninze.

³⁸Kandi uyu u vula kuginga musalaba gwigwe nokunonda inyima wange, si a dukana ninze.

³⁹Uyu u nyola liva mwoyo lilye a la li gotidza; noyu u gotidza liva mwoyo lilye kigira inze a la li nyola.

⁴⁰U bugirira mwinye a bugirira inze, u bugirira inze a bugirira wa ntuma.

⁴¹U bugirira muprofeti ku lieta lyomuprofeti a la nyola lidanyi lyomuprofeti: noyu u bugirira mulungi ku lieta lyomulungi a la nyola lidanyi lyomulungi.

⁴²Ku vosi u linwehidza mulala ku vakekeke yava kisanda kyamadzi makindu vutswa, ku lieta lyomwegidzwi, ligali mmu volera si a li nyala ligali kugotidza lidanyi lilye.