Read lulogooli Matayo 11 Bible Online

Matayo 11 - lulogooli bible

Matayo 11

¹Na ga duka lwa Yesu ya mala kweganehidza avegidzwi veve likumi navaviri, ya twula ho na a tsia kwegidza nokwilwadza mu madala gavo.

²Yohana lwa ya hulira mu inyumba yavahambe miyinzi gya Kristo ya tuma avegidzwi veve

³na a mu volera, Ive nive udzanga naho ku linde wundi?

⁴Yesu ya tivula na a va volera, Mu tsie kuvolera Yohana aga mu huliranga naga mu lolanga:

⁵vaboku va hebwa kulola, navaleema va genda, navagere va honnywa, navahana amatu va hulira navakudzu va simugukidzwa, navadaka vilwadzirwa ivangeli.

⁶Kandi ku vosi u vula kulola ku inze kyokwikigitala, a veye nobugasu.

⁷Lwa va tsia ku inzira yavo, Yesu ya tanga kuvolera viduma amakuva ga Yohana, Mwa tsia kulola ki mwigendanyama? Kidundu kya sung'uswa nembuudza?

⁸Navutswa mwa tsia kulola ki? Mundu wevika tsingubo tsinzesereru? Henza, avivika tsingubo tsinzesereru va veye mu tsinyumba tsyavami.

⁹Navutswa mwa tsia kulola ki? Muprofeti? Yee, mmu volera, kandi a vita muprofeti.

¹⁰Kigira uyu niye wa ng'oderwa amakuva yaga, Henza, ntuma mtumwa wange imbiri wowo, U la lomba inzira yoyo imbiri wowo.

¹¹Ligali, mmu volera, Kuvo avavakali vivula a kikiri kusingira u vita Yohana Mbatidzi: navutswa u veye mkekeke mu bwami bwomigulu a veye munene kuvita uyu.

¹²Kutwula ku madiku ga Yohana Mbatidzi kuduka lero ubwami bwomigulu bwingirangwa netsingulu, kandi avetsingulu va bu vugula netsingulu.

¹³Kigira avaprofeti vosi namalago va profeta va luha va duka ku Yohana.

¹⁴Kandi mwinye ni mwenya kubugirira, uyu niye Elija u lidza.

¹⁵U veye namatu gokuhulira, a hulire.

¹⁶Nda fwanannya naki likula yili? Li fwanana na vana vikala mvitu, ava langa avakye vavo

¹⁷ni va vola, Kwa li ku kumkupira lilere, si mwa li kukina; kwa li kwikuula, si mwa li kulira.

¹⁸Kigira Yohana yadza si ya lagira kandi si ya nwa, ni va vola, A veye nelidemone.

¹⁹Mwana wa Adamu yadza na a lagira na a nwa, ni va vola, Henza, muhuvali nohongera kunwa iwaini mulina wavasolola ubushutu navonil Kandi ubugeeri bu hebwa ubulungi nemiyinzi gyabwo.

²⁰Hene yaho ya tanga kulemba madala aga gya kolwa mu miyinzi gyigye minene minyingi, kigira si geganira.

²¹O bayaye, ive Korazin O bayaye, ive Betsaida kigira miyinzi gyetsingulu gya kolwa mu mwinye, gyi va gya kolwa mu Turo nomu Sidone, nkano veganira kale ni vivika magunia ni vikala mu ligoke.

²²Navutswa mmu volera, Bu la va bulahi ku Turo na Sidone mu lidiku lyelikalaga kuvita bwenyu.

²³Nive, Kapernaume, u lidzominywa ku duka igulu? U la tsia kuduka mu Kihadisi: kigira miyinzi gyetsingulu gya kolwa mu ive, gyi va gya kolwa mu Sodoma, nkano li ve ho kuduka lero.

²⁴Navutswa mmu volera bu la va bulahi ku kivala kya Sodoma mu lidiku lyelikalaga, kuvita bubwo.

²⁵Inyinga yeyo Yesu ya tivula na a vola, Nku santidza, Dada, Mwami weligulu nowelirova, kigira wa visa ku vageeri navahuliri, vindu yivi, nu u vi vuulira avana:

²⁶yee, Dada, kigira ndiyo ga yanzeka ku ive.

²⁷Dada wange u mbeye vindu vyosi: kandi si ha veye wa manya Mwana, navutswa Dada; kandi si ha veye wa manya Dada, navutswa Mwana, naye wo Mwana a yanza kumuvuulira.

²⁸Hambi ino mwinye mwosi ava nyankananga ku miyinzi midinyu nava minika, na inze nda mu sosidza.

²⁹Mu ginge inira yange, mwegire ku inze; kigira inze mbeye mhooma nomuhokya: mu la nyola lisosa mu myoyo gyenyu.

³⁰Kigira inira yange ni indahi, nomusigo gwange nu mwangu.