Read lulogooli Matayo 12 Bible Online

Matayo 12 - lulogooli bible

Matayo 12

¹Inyinga yeyo Yesu ya vita ku lidiku lyelisabato mu milimi; navegidzwi veve va li nenzala, va tanga kuvuunga viangala ni va lia.

²Navutswa Vafarisayo lwa va lola ndiyo, va mbolera, Henza, avegidzwi vovo va kola agomugyiru mu lidiku lyelisabato.

³Navutswa ya va volera, Si mwa soma kuli aga Daudi ya kola, lwa ya li nenzala, navakye veve;

⁴kuli yingira mu inyumba ya Nyasaye na a lagira milango gyokumanyira, nagyo nu mugyiru naye navakye veve kugyilagira, navutswa avasalisi veng'ine?

⁵Kinga si mwa soma mu malago, ku lidiku lyelisabato avasalisi mu litempeli vononya lisabato, va ta li nekindu kuvo?

⁶Navutswa mmu volera, Munene kuvita litempeli a veye hano.

⁷Navutswa mu va mwa manya amakuva yaga, Nyenya tsimbabasi, si nyenya kisyuviriru, nkano si mwa nyala kukyaya ava ta li nekindu kuvo.

⁸Kigira Mwana wa Adamu a veye Mwami welisabato.

⁹Ya twula ho ni yingira mu lisomero lyavo.

¹⁰Kandi henza, ya li mu mundu ya linomkono gwa leema. Va mteva ni va vola, Nobulahi kuhonnya ku lidiku lyelisabato? Va duke kumuyala.

¹¹Ya va volera, U li ha ku mwinye, u veye neligondi lilala, nalyo ni li gwa mbogo ku lidiku lyelisabato, a vule kuligumira nokuli twulidza mu?

¹²Nasindi mundu a veye bulahi kuvita ligondi Kigira yaga, nobulahi kukola bulahi ku lidiku lyelisabato.

¹³Hene yaho ya volera mundu, Nyira mkono gugwo. Naye ya nyira; nagwo gwa hona ni gu leng'ana nogundi.

¹⁴Navutswa Vafarisayo va twula ni va tsia kumkolera kyina va duke kumwiita.

¹⁵Yesu, lwa ya manya ndiyo, ya twula yo. Na vanyingi va mu londa; na a va honnya vosi,

¹⁶na a veganehidza va ta mbuula.

¹⁷Ga duke kukolwa agomprofeti Isaya ya vola, na a vola,

¹⁸Henza, Mtumwa wange wa nda tovola; Muyanzi wange wa mwoyo gwange gu yanza. Nda vika kuye Roho wange, Naye a lilwadzira Tsihiri bulungi.

¹⁹Si a li hangala kinga si a li kupa lwanga; Kandi mundu si a li hulira mwoyo gwigwe ku tsinzira.

²⁰Kidundu kya minika si a li ki vunannya, Kandi mwoki gu twula ku kitani, si a li gu siminya A luhe a duke kuleta likalaga kuguuta.

²¹Ku lieta lilye Tsihiri tsi la suuvira.

²²Hene yaho va mu letera welidemone lya gumira, mboku nedimbidi: na a mu honnya, nedimbidi ya luha na a vola na a lola.

²³Viduma vya genya vyosi, ni va vola, Uyu a nyala kuva mwana wa Daudi?

²⁴Navutswa Vafarisayo lwa va hulira, va vola, Mundu uyu si a kunga mademone navutswa netsingulu tsya Beelzebuli, munene wamademone.

²⁵Ya manya tsiganagani tsyavo na a va volera, Ubwami bwosi bwavukana ubwene, bwoneka; amadala gosi netsinyumba tsyosi tsyavukana tsyene si tsi la singira mba:

²⁶kandi Setani na a twulidza Setani, yavukana mwene; kunangwa ubwami bwibwe bu la singira ndi?

²⁷Inze ni mba ntwulidza amademone netsingulu tsya Beelzebuli, avana venyu va ga twulidza na bwaha? Kigira yaga va la va avakalagi venyu.

²⁸Navutswa inze ni ntwulidza amademone na Roho wa Nyasaye, kunangwa ubwami bwa Nyasaye bu duki ku mwinye.

²⁹Mundu a nyala ndi kwingira mu inyumba yowetsingulu kumunyaga vindu vivye, na a ta tangi kuboha wetsingulu? Kunangwa a la mu nyaga inyumba yeye.

³⁰Uyu u ta li halala ninze a hing'ana ninze; kandi u ta sannya ninze a salannya.

³¹Kigira yaga mmu volera, Avandu va la samefwa ubwoni bwosi namanyego, navutswa amanyego ga va nyega Roho si va li samefwa mba.

³²Ku vosi u la vola likuva ku Mwana wa Adamu, a la samefwa; navutswa ku vosi u li nyega Roho Mtakatifu, si a li samefwa mba, mu lirova lya kalunu, kinga mu lirova lidzanga.

³³Mu kole musala mulahi, namakuyu malahi; kinga mu kole musala mudamano namakuyu madamano: kigira musala gu manyekana namakuyu gagwo.

³⁴Mwinye lwivulo lwetsinzoka avadamano mu nyala ndi kuvola bulahi? Kigira aga veye mmwoyo munwa gu la vola.

³⁵Mundu mulahi ku vindu vilahi vyomwoyo a twulidza vindu vilahi: kandi mundu mudamano ku vindu vidamano a twulidza vindu vidamano.

³⁶Mmu volera, ama kuva gosi ga vutswa gavandu va vola, ga la validzwa mu lidiku lyokukalagira.

³⁷Kigira namakuva gogo u la nyola ubulungi, kandi namakuva gogo u la dividzwa.

³⁸Hene vaho avalala ku Vang'odi na Vafarisayo va mtivulira, ni va vola, Mwegidzi, kwinye kwenya kulola kilolekidzu ku ive.

³⁹Navutswa ya tivula na a va volera Likula lidamano nelyobuheyi lyenya kilolekidzu; navutswa si li hebwa kilolekidzu, navutswa kilolekidzu kyomprofeti Jona.

⁴⁰Kigira kuli Jona ya li mmunda mwesudzi inene amadiku gavaka; kandi Mwana wa Adamu a la va ndiyo amadiku gavaka mmwoyo gwelirova.

⁴¹Avandu va Nineve va la singira mkyina halala nelikula yili navo va la li kalagira: kigira veganira ku lilwadza lya Jona; navutswa henza, munene kuvita Jona a veye hano.

⁴²Mwami weki kali wekusini a la singira mkyina halala nelikula yili, naye a la li kalagira: kigira ya twula kunyasi kwelirova kuhulira ubugeeri bwa Solomoni; navutswa henza, munene kuvita Solomoni a veye hano.

⁴³Navutswa roho mudamano, lwa gu mali kutwula ku mundu, gu genda ha ga ta li ho amadzi, gwenya ho kusosera, gu vula kunyola.

⁴⁴Ma gu vola, Nzirane mu inyumba yange ya nda twula mu; lwa gu duka gu gi nyola ni i veye inzere ni yeyeywi ni i homeywi.

⁴⁵Kunangwa gu tsia kuleta roho gyitanu na gyiviri midamano kusira gwene, ni gyingira ni gyi menya mu: vya inyima vyomundu uyu ni vidamano kusira vye imbiri. Kandi vi la va ndiyo ku likula yili lidamano.

⁴⁶Lwa ya li na a volera ndi viduma, henza, mama wewe navamwavo veve va singira kyova, ni venya kuvolerana naye.

⁴⁷Mulala ya mbolera, Henza, mama nava mwavo vovo va singiye kyova venya kuvolerana nive.

⁴⁸Navutswa ya tivula na a volera uyu wa mbolera Mama wange ni bwaha? Navamitu vange ni bwaha?

⁴⁹Ya nyira mkono gwigwe ku vegidzwi veve na a vola, Henza, mama wange navamitu vange.

⁵⁰Kigira ku vosi u li kola ubulaliri bwa Dada wange u veye migulu niye amitu wange, nambotso wange, na mama wange.