Read lulogooli Matayo 17 Bible Online

Matayo 17 - lulogooli bible

Matayo 17

¹Lwa ga vita madiku gatanu nelilala Yesu ya vugula Petro na Yakobo na Yohana amwavo wewe, na a va hila mu kigulu kitambi veng'ine:

²na a girunkanywa ligo ndo imbiri wavo; mmoni mwimwe mwa ng'ereng'ana kuli liuva, netsi ngubo tsitsye tsya gwa tsindavu kuli ubulavu.

³Henza, va loleka kuvo Musa na Elija va volerana naye.

⁴Ma Petro ya tivula na a volera Yesu, Mwami, nu bulahi ku ve hano; nu u yanze ku la lomba hano vidioli vivaka; kilala kikyo, kindi kya Musa nekindi kya Elija.

⁵Lwa ya vola ndi, henza, lilesi lilavu lya va kinga, na mwoyo gu twula mu lilesi, ni gu vola, Uyu nu Mwana myanzi wange, wa nyanza; mu mu hulire.

⁶Avegidzwi lwa va gu hulira, va gwa mammama ni va tia muno.

⁷Yesu yadza na a va dira, na a vola, Singiri, mu ta tia mba.

⁸Va kunula tsimoni tsyavo, ni va vula kulola mundu navutswa Yesu yeng'ine.

⁹Lwa va sulunguta kutwula mu kigulu, Yesu ya veganehidza na a vola, Mu ta volera mundu kali mulala, kya mu loli, Mwana wa Adamu a luhe a simuguke mu vakudzi.

¹⁰Avegidzwi va mu teva, ni va vola, Kigira ki avang'odi va vola Elija a la tanga kuudza?

¹¹Na ya tivula na a vola, Ligali, Elija a la tanga kuudza, kandi a lirannya vyosi:

¹²navutswa mmu volera, Elija u mali kuudza, navo si va mu manya mba, navutswa va mu kolera vyosi kuli vya va yanza. Kandi ndiyo va la kupidza Mwana wa Adamu, kivi.

¹³Hene yaho avegidzwi va hulira a vola ku Yohana Mbatidzi.

¹⁴Lwa va duka ku kiduma, mundu yadza kuye na a mu sigamira na a vola,

¹⁵Mwami, u vererere mwana wange: kigira a veye nendulume, kandi a salira muno; kigira kanyingi a gwa mu muliru, na kanyingi mu madzi.

¹⁶Nda mu leta ku vegidzwi vovo, navutswa si va nyala kumuhonnya.

¹⁷Yesu ya tivula na a vola, Likula li ta li nelisuuvira nelyokuhinga, nda va na mwinye kuduka inyinga ki? Nda mu vererera kuduka inyinga ki? Mu mu lete hano ku inze.

¹⁸Yesu ya li gaya; nelidemone lya twula kuye: na muyai ya hona inyinga zana yeyo.

¹⁹Hene yaho avegidzwi vadza ku Yesu lwa ya li yeng'ine ni va vola, Kigira ki kwinye si kwa nyala kulikunga?

²⁰Na a va volera Kigira lisuuvira lyenyu ni likekeke. Kigira mmu volera, Ligali, ni mu ve nelisuuvira kuli bugutsa bwelisatsi, mu la volera kigulu yiki, Twula hano, wisunde hala; ki lisunda; kandi vindu vyosi vi la nyalika ku mwinye.

²¹Navutswa ku lugano yilu si li twula ni ga ta veye ne lisaala nokuhonga lilia.

²²Lwa va menya mu Galilaya Yesu ya va volera, Mwana wa Adamu a la zamwa mu makono gavandu;

²³va la mwiita, kandi ku lidiku lya gavaka a la simugukidzwa. Navo va verera muno.

²⁴Lwa va duka Kapernaume avasolola inusu yeshekeli vadza ku Petro ni va vola, Mwegidzi wenyu si a tunga inusu yeshekeli?

²⁵Ya vola, Yee, a la tunga. Lwa yingira mu inyumba, Yesu ya tanga kumuvolera, na a vola, U vola ki, Simoni? Avami velirova va solola ubushutu ni va kalira vaha vigedi? Ku avayai vavo naho avageni?

²⁶Kandi lwa ya vola, Avageni, Yesu ya mu volera Kigira yaga avayai vavo va vula kutunga.

²⁷Navutswa, gase ku la vikigitalidza, ive u tsie ku inyanza u limbike luyali u vugule isudzi i tanga kutwula; lwa u li kunula munwa gwayo u la lola ishekeli: vugula yiyo u tsie kutungira inze nive.