Read lulogooli Matayo 19 Bible Online

Matayo 19 - lulogooli bible

Matayo 19

¹Yesu lwa ya maliridza makuva yaga, ya twula Galilaya na a duka mu tsinzako tsye Ebuyuda engereka wa Yordani;

²viduma vinyingi vya mu londa, na a va honnyera yo.

³Avafarisayo va tsia kuye, ni va mu geridza, ni va mu volera, Nu bulahi mundu a kunge mkali wewe ku makuva gosi?

⁴Ya tivula na a vola, Si mwa soma uyu wa va lomba, ya tanga kuvalomba musatsa nomkali,

⁵na a vola, Kigira yaga mundu a la leka ise na mama wewe, na a hambane nomkali wewe navo vaviri va la gwa mubiri mulaia?

⁶Si va li vaviri kandi navutswa mubiri mulala. Kunangwa kya Nyasaye ya hambannya, mundu a ta kyavukannya mba.

⁷Va mu volera, Kigira ki Musa ya haana munwa kuha mkali ibaruwa yokwavukannya nokumukunga?

⁸Ya va volera, Kigira Musa ya mu ha munwa kukunga avakali venyu, nu budinyu bwemyoyo gye nyu: navutswa kutwula litanga si ga li ndiyo.

⁹Na inze mmu volera, Ku vosi u li kunga mkali wewe, kigira bu ta li ubuheyi, na a kwa wundi, a kola ubuheyi: kandi u kwa wa kungwa a kola ubuheyi.

¹⁰Avegidzwi veve va mu volera, Amakuva gomundu nomkali wewe ni ga va ndiyo, si bu li bulahi kukwa mukali.

¹¹Navutswa ya va volera, Si va li vosi va nyala kubugirira likuva yili, navutswa yava va hebangwa.

¹²Kigira va ve ho vitsiri vivulwa ndiyo kutwula munda mwa vamama: kandi va ve ho vitsiri vindi vyavandu va kola ndiyo: kandi va ve ho vitsiri vindi vekola ndiyo kigira ubwami bwomigulu. U veye netsingulu kulibugirira, a bugirire.

¹³Hene yaho ya leterwa avana vakekeke a vike makono gege kuvo, asaale. Navutswa avegidzwi va va gaya.

¹⁴Navutswa Yesu ya vola, Mu leke avana vakekeke vadze ku inze, mu ta va gaya mba: kigira ubwami bwomigulu bu veye bwa va li ndi.

¹⁵Ya vika makono gege kuvo, na a twula ho.

¹⁶Henza, muiala yadza kuye na a vola, Mwegidzi, nkola kindu ki kilahi nyole liva mwoyo li ta hera mba?

¹⁷Naye ya mu volera, Kigira ki u nteva ku agevilahi? Ha veye no Mulala mulahi. Navutswa ive nu wenya kwingira mu liva mwoyo, u gumire malago.

¹⁸Naye ya mu teva, Ga li ha? Yesu ya vola, U tiita mba, U ta heya mba, U tiba mba, U ta gina mba,

¹⁹Widzominye dada wowo na mama wowo; kandi, U yanze mutende wowo kuli weyanza.

²⁰Munyerere ya mu volera, Yivi vyosi mmali kugumira: kalunu ndaki ki?

²¹Yesu ya mu volera, Nu wenya kuva mudukiru, tsia u gulidze vyosi vya u veye navyo, u he avadaka, na ive u la va na akiba migulu: udze, u nonde.

²²Navutswa munyerere lwa ya hulira livola yili ya tsia nobuvereri; kigira ya li nobutugi bunyingi.

²³Yesu ya volera avegidzwi veve, Ligali mmu volera, Nu budinyu mutugi kwingira mu bwami bwomigulu.

²⁴Kandi mmu volera, Nu bwangu ing'amia kuvita muluhu gwesindani, kusira mutugi kwingira mu bwami bwa Nyasaye.

²⁵Avegidzwi lwa va ga hulira, va genya munonono ni va vola, Ibwaha a nyala kuhonnywa?

²⁶Yesu ya va henza na a va volera, Ku vandu si ki nyalika mba; navutswa ku Nyasaye vindu vyosi vi nyalika.

²⁷Petro ya tivula na a mu volera, Henza, kwinye ku leki vyosi kulonda ive; kunangwa kwinye ku li nyola ki?

²⁸Yesu ya va volera, Ligali mmu volera, mwinye mu nondi, mu lilombwa lihya, lwa Mwana wa Adamu a likala ku intebe yobukumi bwibwe, mwinye kandi mu likala ku tsintebe likumi na tsiviri, no ku kalagira tsihiri likumi na tsiviri tsya Israeli.

²⁹Ku vosi u leki tsinyumba, kinga avamwavo, kinga avabotso, kinga ise, kinga mama, kinga avana, kinga milimi, kigira lieta lyange, a la nyola vindu hali mia, kandi a la nyola liva mwoyo li ta hera mba.

³⁰Navutswa vanyingi kuvo va veye imbiri va la va avenyima; na venyima va la va avembiri.