Read lulogooli Matayo 20 Bible Online

Matayo 20 - lulogooli bible

Matayo 20

¹Kigira ubwami bwomigulu bu fwanana nomundu mwene inyumba, wa twula mugamba tsuri kwenya avayinziri vekizabibu kikye.

²Lwa ya mala kulagana navayinziri ishilling lidiku lilala, ya va tuma mu kizabibu kikye.

³Kandi kuduka isaa yetsivaka ya tsia na a nyola avandi va singiye mu kitu va gunza vutswa.

⁴Kandi ya va volera, Mu tsie mu kizabibu, kandi ku vyosi ki veye kilahi nda mu ha. Navo va tsia mu kizabibu.

⁵Kandi kuduka isaa yetsitanu na indala, kandi kuduka isaa yetsitanu na tsine, ya kola ndiyo.

⁶Kandi kuduka isaa yelikumi na indala ya tsia na a nyola avandi va singiye; na a va teva, Kigira ki mu singira hano lidiku lyosi mu gunza vutswa?

⁷Navo va tivula, Kigira si ha li nomundu wa ku lagana naye. Ya va volera, Kandi mwinye mu tsie mu kizabibu.

⁸Mgolova mwene kizabibu ya volera mulindi wewe, Langa avayinziri u va tunge umutungu, u tange kutunga avenyima kuduka kuvo avembiri.

⁹Ava tsia isaa likumi na indala, lwa va duka va tungwa sa mulala ishilling.

¹⁰Avembiri lwa va duka, va ganagana Kwinye ku la daswa; navutswa yava kandi va tungwa sa mulala ishilling.

¹¹Lwa va tungwa va monya mwene inyumba,

¹²ni va vola, Yava avenyima va koli isaa indala yeng'ine, na ive u va leng'anya na kwinye ku koli miyinzi gyelidiku kandi ku loli mbasu munene.

¹³Navutswa ya tivula, na a volera mulala kuvo, Mulina, si nku kolera ubudamano: ive si u lagani ninze ishilling?

¹⁴Vugula kikyo, u tsie; nyanza kuha avenyima kuli nda ku ha.

¹⁵Si bu li bulahi inze nkole kuli wa nyanza ku vindu vyange? Naho imoni yoyo i veye indamano kigira inze mbeye mulahi.

¹⁶Ndi avenyima va la va avembiri, navo avembiri va la va avenyima.

¹⁷Yesu lwa yanegira na a tsia Yerusalemi ya hila avegidzwi likumi na vaviri ha vandu va ta li, na ku inzira ya va volera,

¹⁸Henza, kwanegira kutsia Yerusalemi; na Mwana wa Adamu a la zamwa ku vasalisi navang'odi; navo va la mu kalagira yiitwe,

¹⁹na va mu vike mu makono ge Tsihiri va duke kumukolera kihenyahenye nokumukuya nokumubamba: ku lidiku lya gavaka a la simugukidzwa.

²⁰Hene yaho yadza kuye mama wa vana va Zebedayo, navana veve, na a mu sigamira na a mu saava kindu kilala.

²¹Naye ya mu teva, Wenya ki? Ya mu volera, U haane munwa ku vana vange vaviri yava vikale, mulala ku mkono mulungi gugwo na wundi ku mkono mmosi gugwo, mu bwami bubwo.

²²Navutswa Yesu ya tivula na a vola, Si mu manya kya mu teva mba. Mwinye mu nyala kunwera ku kikombe kya nyenya kunwa ku? Navo va mu volera, Ku nyala.

²³Naye ya va volera, Kikombe kyange ligali mu la nwera ku: navutswa kwikala ku mkono mulungi gwange na ku mkono mmosi gwange, si ki li kyange kuhaana Navutswa ki veye kya yava ava Dada wange ya lombera.

²⁴Ava li likumi lwa va hulira va vihirirwa yava vombi.

²⁵Navutswa Yesu ya va langa vadze kuye, na a vola, Mwinye mu manya avami ve Tsihiri va va tuga, navanene vatsyo va veye netsingulu kuvo.

²⁶Mwinye si mu la va ndiyo: navutswa ku vosi wenya kuva munene ku mwinye a la va mtumekiri wenyu;

²⁷naye wenya kuva mwimiri ku mwinye a la va mtugwa wenyu:

²⁸kuli Mwana wa Adamu si yadza kutumekirwa, navutswa kutumekira, nokuhaana liva mwoyo lilye li ve litungira lya vanyingi.

²⁹Lwa va twula Yeriko kiduma kinene kya mu londa.

³⁰Henza, vaboku vaviri vikala ku luginga lwenzira, lwa va hulira Yesu a vitanga, va mwanira ni va vola, Mwami, mwana wa Daudi, u ku vererere.

³¹Na kiduma kya va gaya, va kiring'ane: navutswa va kira ligali kwanira, ni va vola, Mwami, mwana wa Daudi, u ku vererere.

³²Ma Yesu ya singira na a va langa, na a vola, Mwenya mmu kolere ndi?

³³Ni va mu volera, Mwami, kwenya tsimoni tsyetu tsigulike.

³⁴Yesu ya va vererera na a dira ku tsimoni tsyavo; nonoho va nyola lilola ni va mu londa.