Read lulogooli Matayo 22 Bible Online

Matayo 22 - lulogooli bible

Matayo 22

¹Yesu ya tivula na a va volera kandi mu tsing'ano, na a vola,

²Ubwami bwomigulu bu fwanana nomwami mulala wa kolera mwana wewe kiserero.

³Ya tuma avatu gwa veve va va lange ava li va lagwa kuudza mu kiserero: si venya kuudza.

⁴Kandi ya tuma avatugwa avandi, na a va volera Mu volere ava li va langwa, Henzi, mmali kulomba vyokulia vyange; tsing'ombe tsyange nevinolu vyange vi mali kwiitwa, na vyosi vi tegekeywi: muu dze mu kiserero.

⁵Navo va kola kihenyahenye, ni va tsia mulala mu mulimi gwigwe, nowundi mu vindu vyelikirannya vivye;

⁶na vandi va gumira avatugwa veve, ni va va kupidza kivi, ni va viita.

⁷Navutswa mwami ya vihirirwa; na a hila mahe gege kwononnya avalumindi yavo, na a samba lidala lyavo.

⁸Ya volera avatugwa veve, Kiserero ki mali ku lombwa, navutswa ava li ni va langwa si va dukani nakyo.

⁹Mu tsie ha tsipalapala tsi vuganira, navo vosi va mu li nyola, mu lange vadze mu kiserero.

¹⁰Avatugwa va samula ni va tsia mu tsipalapala, ni va vungidza halala vosi va va nyola, avadamano navalahi: ma kiserero kizula avageni.

¹¹Navutswa mwami lwa ya duka kulola avageni, ya nyola mundu ya vula kwivika ingubo yekiserero:

¹²na a mu volera, Mulina, wingira ndi hano nu u ta ve nengubo yekiserero? Naye ya kiring'ana.

¹³Hene yaho mwami ya volera ava tumekiri veve, Mu mu bohe mikono nevirenge, mu mu te mu kisundi kyekyova; ha la va nelilira nokudyedyeidza amino.

¹⁴Kigira vanyingi va langwa, navutswa vakekeke va tovoleywi.

¹⁵Hene yaho Vafarisayo va tsia, ni va volerana amakuva gokumutega ku makuva gege.

¹⁶Ni va tuma kuye avegidzwi vavo halala na Vaherodi, ni va vola, Mwegidzi, ku ku manya u veye mundu weligali, kandi wegidza inzira ya Nyasaye ligali si u veye nobutii bwavandi kali mulala: kandi si u henza ligondo lyavandu,

¹⁷U ku volere, u lola ndi? Nu bulahi kuha Kaisari ubushutu naho si bu li bulahi?

¹⁸Navutswa Yesu ya manya ububi bwavo, na a vola, Kigira ki mu ntega, Avagadi?

¹⁹Mu mmannye ifetha yobushutu. Ni va va mu letera ishilling.

²⁰Na a va volera, Kifwananyi yiki ni kya bwaha, ni ling'oda lya bwaha?

²¹Ni va mu volera, Ni vya Kaisari. Hene yaho ya va volera, Mu he Kaisari vindu vya Kaisari, na Nyasaye vindu vya Nyasaye.

²²Lwa va ga hulira, va genya; ni va mu leka ni va tsia.

²³Ku lidiku yilyo vadza kuye Avasadukayo, ava vola si ha li nokusimuguka: ni va mu teva,

²⁴ni va vola, Mwegidzi, Musa ya vola, Mundu na a kudza bugira avana, amwavo wewe yirannye mkali wewe, na a letere amwavo wewe avana.

²⁵Kwa li iwetu navamwavo vatanu na vaviri: wambiri ya leta mkali na a kudza bugira avana, ya leka mkali, amwavo wewe ya mirannya;

²⁶na ndi ka ndi wa kola vaviri, kandi wa kola vavaka, kali kuduka kuye wa kola vatanu na vaviri.

²⁷Inyima ya vosi mkali kandi ya kudza.

²⁸Mu lisimuguka a li va mkali wa u li ha, kigira vosi va li naye?

²⁹Yesu ya tivula na a va volera, Mu kosanga, kigira si mu manya mang'oda, kandi tsingulu tsya Nyasaye.

³⁰Kigira mu lisimuguka si va kwedza mba, kandi si va sererana, navutswa va veye kuli tsingelosi va Nyasaye mi gulu.

³¹Kandi mu makuva gelisi muguka lya vakudzi, mu ta soma ga Nyasaye a vola, na a vola,

³²Inze ni Nyasaye wa Ahrahamu, ni Nyasaye wa Isaka, ni Nyasaye wa Yakobo? Nyasaye si a li Nyasaye wavakudzi navutswa wa va veye mwoyo.

³³Viduma lwa vya hulira va genya migidzo gege.

³⁴Navutswa Avafarisayo lwa va hulira ya kiring'annya Vasadukayo va vunga halala.

³⁵Mulala kuvo mundu wa manya miima gyavo, ya mu teva na a mu genda, na a vola,

³⁶Mwegidzi, lilago linene ku ma lago gosi ni li ha?

³⁷Naye ya mu volera, U yanze Mwami Nyasaye wowo nomwoyo gugwo gwosi, neliva mwoyo lilyo lyosi, nobugeeri bubwo bwosi.

³⁸Yili ni lilago linene kandi lyambiri.

³⁹Lya kaviri li fwanana nalyo ni yili, U yanze mutende wowo kuli weyanza.

⁴⁰Ku malago yaga gaviri amalago gosi gedira ku, kandi vaprofeti.

⁴¹Avafarisayo lwa va vunga halala, Yesu ya va teva,

⁴²na a vola Mu lola ki ku makuva ga Kristoi A veye mwana wa bwaha? Ni va mu volera, Wa Daudi.

⁴³Naye ya va volera, Ga veye ndi, Daudi, mu Roho, a mu langa Mwami, na a vola

⁴⁴Mwami ya volera Mwami wange Wikale ku mkono mulungi gwange, Nduke kuvika vasigu vovo isi wevirenge vivyo?

⁴⁵Daudi na a va ni ya mu langa Mwami, a veye ndi mwana wewe?

⁴⁶Si ha li nomulala wa nyala kumutivulira likuva, kandi kutwula lidiku yilyo si ha li nomundu wa luvirira kumuteva kindu.