Read lulogooli Matayo 25 Bible Online

Matayo 25 - lulogooli bible

Matayo 25

¹Na ndiyo ubwami bwomigulu bu la wananywa navakana avagima likumi ava vugula tsitaya tsyavo ni va tsia kuvugana no woserereywi.

²Vatanu kuvo va li ava siru na vatanu kuvo va li avageeri.

³Kigira avasiru, lwa va hila tsitaya tsyavo, si va hila maguta halala natsyo:

⁴navutswa avageeri va hila maguta mu tsichupa tsyavo halala netsitaya tsyavo.

⁵Inyinga userereywi ya lindagira, tsindolo tsya va vuha ni va gona tsindolo vosi.

⁶Navutswa mu budiku hagati, lya li lilangeridzana, Henza, userereywi Mu twule kumwaganira.

⁷Hene yaho avakana avagima yava vosi va vuka ni va iomba tsitaya tsyavo.

⁸Na avasiru va volera avageeri, Mu ku he ku maguta genyu, kigira tsitaya tsyetu tsyenya kusima.

⁹Navutswa avageeri va tivula ni va va volera, Namusiya si ga la dukira kwinye na mwinye: nobulahi mu tsie kuvo ava gulanga maguta, mwegulire.

¹⁰Lwa va li ni va tsie kugula, userereywi yadza; navo vetegeki vingira naye mu kiserero: na kiliango kya hanwa.

¹¹Inyima va duka kandi avakana avagima vandi ni va vola, Mwami, Mwami, u kwigulire.

¹²Navutswa ya tivula na a vola, Ligali mmu volera, si mmu manya mba.

¹³Kunangwa mu linde, kigira si mu manya lidiku ne isaa.

¹⁴Kigira ga fwana kuli mundu u tsia mu kivala kindi, na a langa avatugwa veve, na a va ha vindu vivye ku vi linda.

¹⁵Ya ha mulala vigero vitanu, na wundi viviri, na wundi kilala; sa mulala va hebwa kuli tsi ngulu tsvavo; na a tsia ulugendo lwilwe.

¹⁶Nonoho wa hebwa vigero vitanu ya tsia na a kirannya, na a nyola vindi vitanu.

¹⁷Kandi ndiyo uyo wa hebwa viviri ya nyola vindi viviri.

¹⁸Navutswa uyo wa hebwa kilala ya tsia na a yava mu lirova, na a visa kigero kyomwami wewe

¹⁹Inyima wa madiku manyingi mwami wavatugwa yavo yadza na a va teva vindu vivye.

²⁰Uyo wa hebwa vigero vitanu yadza na a leta vigero vindi vitanu, na a vola, Mwami, wa mba vigero vitanu: henza, mmali kunyola vigero vindi vitanu

²¹Mwami wewe ya mu volera, U koli bulahi, mutugwa mulahi nomsuu viridzi: wa linda bulahi vindu vikekeke, nda ku vika ku vindu vinyingi; wingire mu buyanzi bwomwami wowo.

²²Kandi uyo wa hebwa vigero viviri yadza, na a vola, Mwami, wa mba vigero viviri: henza, mmali kunyola vigero vindi viviri.

²³Mwami wewe ya mu volera, U koli bulahi, mutugwa mulahi nomsuuviridzi: wa kola bulahi ku vindu vikekeke, nda ku vika ku vindu vinyingi; wingire mu buyanzi bwomwami wowo

²⁴Naye yadza wa hebwa kigero kilala, na a vola, Mwami, nda manya ive u veye mundu mululu, u gesanga ha u ta taga, u vungidza ha u ta salannya;

²⁵inze nda tia, ni ntsia ni mbisa kigero kikyo mu marova: henza, u veye ne kya li kikyo.

²⁶Navutswa mwami wewe ya tivula na a mu volera, Mutugwa mudamano nomugata, wa manya ngesa ha nta taga, na mbungidza ha nta salannya;

²⁷bwa li bulahi nkano wa ha avebengi tsishilling tsyange, kandi inyinga yeliduka lyange nkano nda nyola tsyange halala nevyambeti vyatsyo.

²⁸Kunangwa mu mnyage kigero, mu he wevigero likumi.

²⁹Kigira u veye navyo a la hebwa vindi, a la medwa: navutswa u ta veye navyo, a la nyagwa kali vya a veye navyo.

³⁰Kandi mutugwa u ta leta vyambeti, mu mu te mu kisundi kye kyova: ha la va nokulira nokudyedyeidza amino.

³¹Navutswa inyinga Mwana wa Adamu a lidza mu bukumi bwibwe, netsingelosi vosi halala naye, hene yaho a likala ku intebe yobukumi bwibwe.

³²Tsihiri tsyosi tsi la vuganywa imbiri wewe: naye a lahulanya tsindala ku tsindi kuli mwa yi yahulanya magondi netsimbuli;

³³namagondi a la vika ku mkono gwigwe mulungi, navutswa tsimbuli a la vika ku mkono mmosi.

³⁴Ma Mwami a la volera ava veye ku mkono mulungi, Mudze, avagasu va Dada wange, mu nyole miyandu gyo ubwami bwa mwa lomberwa kutwula inyinga yelirova lya lombwa:

³⁵kigira nda li nenzala, na mwinye mwa mba vyokulia; nda li nobuluhu, na mwinye mwa nwehidza; nda li mgeni, na mwinye mwa nkonya;

³⁶nda li kyahonyo, na mwinye mwa mbika; nda li mulwaye, na mwinye mwadza kundola; nda li muhambe, na mwinye mwadza kundola.

³⁷Hene yaho avalungi va la mu tivulira, va vola Mwami, kwa ku lola inyinga ki nenzala, kwa ku ha wa lia? Kinga kwa ku lola inyinga ki nobuluhu, kwa ku ha wa nwa?

³⁸Kandi kwa ku lola inyinga ki nu u veye mgeni, kwa ku konya? Kinga kwa ku lola kyahonyo inyinga ki, kwa ku vika?

³⁹Kandi kwa ku lola inyinga ki nu u veye mulwaye, kandi muhambe, kwadza kukulola?

⁴⁰Mwami a la tivula na a va volere, Ligali mmu volera, Kuli ga mwa kolera avamwavo vange yava vakekeke, ligali mwa kolera inze.

⁴¹Hene yaho a la volera ava li ku mkono mmosi, Twuli ku inze, mwi nye ava laameywi, mu tsie mu muliru gwemihiga nemihiga gwa lomberwa Setani netsingelosi veve.

⁴²Kigira nda li nenzala, si mwa mba vyokulia; nda li nobuluhu, si mwa mba madzi;

⁴³nda li mgeni, si mwa nkonya mba; nda li kyahonyo si mwa mbika mba; nda li mulwaye kandi muhambe, si mwadza kundola mba.

⁴⁴Hene yaho navo va la tivula, va vola, Mwami, inyinga ki kwa ku lola ne nzala, kinga nobuluhu, kinga mgeni, kinga kyahonyo, kinga mulwaye, kinga muhambe, kwa vula kukutumekira?

⁴⁵Hene yaho a la va tivulira, na a vola, Ligali mmu volera, Kuli ga mwa vula kukolera mulala ku vakekeke yava, mwa vula kunkolera.

⁴⁶Yava va la tsia mu kivi ki ta hera mba: navutswa avalungi va la tsia mu liva mwoyo li ta hera mba.