Read lulogooli Matayo 28 Bible Online

Matayo 28 - lulogooli bible

Matayo 28

¹Ku lisabato lwa lyenya kufwa lwa bwenya kukya kuduka ku lidiku lyokutanga iisidza, Maria Magdalene na Maria wundi vadza kulola kilindwa.

²Henza, lya li lidegera linene lyekivala; kigira ingelosi wo Mwami yika ni yadza na a gomagominya ligina, ni yikala ku.

³Ligondo lilye lya li kuli luheni, netsingubo tsitsye tsya li tsindavu kuli likonza:

⁴kigira ubutihidzi bwitwe avalindi va degera ni va gwa kuli avakudzu.

⁵Ingelosi ya tivula na a volera avakali, Mu ta tia mba, mwinye; kigira mmanya mwenya Yesu wa bambwa.

⁶Si a veye hano mba; kigira u simuguki, kuli wa ya vola. Hambi mu lole ho Mwami ya gona.

⁷Mu tsie bwa ngu mu volere avegidzwi veve, U simuguki mu vakudzi; kandi henza yimira imbiri wenyu kutsia Galilaya; mu la mu lola yo: henza mmali kumu volera.

⁸Ni va twula mu kilindwa nobutii nobuyanzi bunene, ni va nyagula kuvolera avegidzwi veve.

⁹Henza, lwa va tsia Yesu mwene ya vugana navo na a vola, Mu sa ngale. Ni vadza ni va gumira virenge vivye ni va mu sigamira.

¹⁰Yesu ya va volera, Mu ta tia mba: mu tsie mu volere avamitu vange va twule va tsie Galilaya, va la ndolera yo.

¹¹Navo lwa va li ni va genda ku inzira, henza, avalala ku vasikari va duka mu lidala, ni va volera avasalisi vanene amakuva gosi aga kolwa.

¹²Lwa va vugana halala navaku lundu ni va kola kyina, va ha avasikari tsishilling tsinyingi,

¹³ni va vola, Voli he, Avegidzwi veve vadza ubudiku ni va mwiva lwa kwa li kugona tsindolo.

¹⁴Amakuva yaga ni ga duka mu matu gomunyampara, ku la mu goonya, mwinye mu ta henda mwoyo mba.

¹⁵Va manya ni va vugula tsishilling, ni va kola kuli vegidzwa: namakuva yaga ga landa mu Vayuda kali kuduka lero.

¹⁶Kunangwa avegidzwi likumi na mulala va tsia Galilaya, kuduka mu kigulu kya Yesu ya va laga.

¹⁷Lwa va mu lola va mu sigamira; navutswa avalala va hayahayidza.

¹⁸Yesu yadza na a volerana navo, na a vola, Mbebeywi tsingulu tsyosi mu ligulu nomu lirova.

¹⁹Kigira yaga mu tsie kukola avegidzwi ku tsihiri tsyosi, mu va batidze mu lieta lya Dada, nomu lyo Mwana, nomu Iva Roho Mtakatifu:

²⁰mu vegidze kugumira vyosi vya nda mu laga: kandi, henza, inze mbeye haiala nemwinye madiku gosi, kali kuduka ku kiheri kyenyinga.