Read lulogooli Matayo 5 Bible Online

Matayo 5 - lulogooli bible

Matayo 5

¹Lwa ya lola viduma, yanegira mkigulu: lwa ya mala kwikala, avegidzwi veve vadza kuye:

²na a kunula munwa gwigwe na a vegidza, na a vola

³Va veye nobugasu ava li nobudaka mmwoyo: kigira ubwami bwomigulu nu bwavo.

⁴Va veye nobugasu ava veye neliverera: kigira va la leminnywa mmyoyo.

⁵Va veye nobugasu ava veye nobuhooma: kigira va la va nemiyandu gyelirova.

⁶Va veye nobugasu ava veye nenzala nobuluhu bwobulungi: kigira va ligutidzwa.

⁷Va veye nobugasu ava veye netsimbabasi: kigira va la verwa tsimbabasi.

⁸Va veye nobugasu ava veye nemyoyo milavu: kigira va la lola Nyasaye.

⁹Va veye nobugasu avaloombi ve mirembe kigira va la langwa avana va Nyasaye.

¹⁰Va veye nobugasu ava kupidzwa kivi kigira ubulungi: kigira ubwami bwomiguiu ni bwavo.

¹¹Mwinye mu veye nobugasu, lwa va li munyega nokumukupidza kivi nokumubehera amakuva madamano gosi kigira inze.

¹²Mu yanze, mu sangale ligali: kigira madanyi genyu ga veye manene migulu: kigira ni ndiyo va kupidza kivi avaprofeti ava li imbiri wenyu.

¹³Mwinye mu veye munyu gwelirova: navutswa munyu ni gu zangalala, gu la kolwa ndi kandi munyu? Si gu veye kindu kandi, navutswa gu tebwa kyova nokuduvagwa ne virenge vyavandu.

¹⁴Mwinye mu veye ubulavu bwelirova. Lidala li veye mkigulu si li nyala kuviswa mba.

¹⁵Kandi avandu si va hambidza itaya va gi kunike mu kihinda, navutswa va gi vika ku meza; ni i mulika ku vosi ava veye munyumba.

¹⁶Na ndiyo mwinye mu mulike imbiri wa vandu; va duke kulola miyinzi gyenyu milahi, vidzominye Dada wenyu womigulu.

¹⁷Mu ta ganagana ndadza kwononnya malago na vaprofeti: si ndadza kwononnya, navutswa kugadukidza.

¹⁸Kigira ligali mmu volera, Ku duka ku kiheri kyeligulu nelirova, induguta kinga nta kali indala yamalago si vi nyala ligali kugota, vi luhe vi kolwe vyosi.

¹⁹Ku vosi wononnya munwa mulala ku mikekeke yigyi, ni yegidza ndiyo avandu, a la ka langwe mkekeke ligali mbwami bwomigulu: navutswa ku vosi u bugirira nokwegidza, uyu a la ka langwe munene mbwami bwomigulu.

²⁰Kigira mmu volera, bulungi bwenyu ni bu vula kuvita ubulungi bwavang'odi nobwa Vafarisayo, si mu li nyala ligali kwingira mbwami bwomigulu.

²¹Mwa hulira avandu va kale va volerwa, U tiita mba; kandi ku vosi wiita yenya kukalagirwa:

²²navutswa inze mmu volera, ku vosi u vihirirwa amwavo wewe yenya kukalagirwa; kandi ku vosi u volera amwavo wewe, Thu, yenya kuyalwa; kandi ku vosi u mbolera, Kisiru ive, yenya kuduka mmuliru gwegehena.

²³Nu u lete kihaanwa kikyo ku bwrali, nu widzulitsa ho amwavo wowo a veye nelikuva ku ive,

²⁴u leke ho kihaanwa kikyo imbiri wobwali, u tange kutsia kuyanzana na mwavo wowo, kunangwa udze u lete kihaanwa kikyo.

²⁵U kole imbu lirani bwangu nomuhangalidzi wowo inyinga u veye halala naye ku inzira; gase a la ku hila ku mkalagi, nomka lagi a la ku vika mmakono gomusikari, na ive u la vikwa munyumba yavaha mbe.

²⁶Ligali nku volera, Si u twula yimo ligali, u luhe u maliridze isenti impereridzi.

²⁷Mwa hulira ga volwa, U ta heya mba:

²⁸navutswa inze mmu volera, ku vosi u henza mkali na a mkayirwa, u mali kuheya naye mmwoyo gwigwe.

²⁹Imoni yoyo yomukono mulungi ni i kwikigitalidza, u gi twulidze, u gi te: kigira nobulahi kindu kilala ku mubiri gugwo ki dive, nomubiri gugwo gwosi gu vule kutebwa mu gehena.

³⁰Mkono mulungi gugwo ni gu kwikigitalidza, u gu kalage, u gu te: kigira nobulahi kindu kilala ku mubiri gugwo ki dive, nomubiri gugwo gwosi gu vule kutsia mu gehena.

³¹Kandi ga volwa, ku vosi u li kunga mkali wewe, a mu he ibaruwa yokumkunga.

³²Navutswa mmu volera, ku vosi u kunga mkali wewe kigira bu ta li ubuheyi, a mu kola muheyi; kandi ku vosi u li mkwa wa kungwa a kola ubuheyi.

³³Kandi mwa hulira, ga volwa ku va li va kale, U tisuhira ububehi navutswa u la kolera Mwami aga wisuhira:

³⁴navutswa inze mmu volera mu tisuha ligali mba; kali ku ligulu, kigira ni kisako kya Nyasaye;

³⁵kali ku lirova, kigira na ha a vika virenge vivye; kali ku Yerusalemi ki gira ni lidala lyo Mwami munene.

³⁶U tisuha mba mutwi gugwo, kigira si u nyala kukola lisu lilala li ve lilavu kinga li ve limwamu.

³⁷Navutswa amakuva genyu ga ve, Yee, Yee; Auwa, Auwa: kandi ku gosi aga vita yaga ga twula ku mudamano.

³⁸Mwa hulira, ga volwa, imoni u vanza imoni, lino u vanza lino:

³⁹navutswa inze mmu volera, Mu ta hangalidzana nomudamano: navu tswa ku vosi u ku duya ku lusaya lwomukono mulungi u mgirunkanyire lundi.

⁴⁰Mundu ni yenya kutsia kukuyala a hile ijoho yoyo u mleke a hile kandi likoti.

⁴¹Ku vosi u ku niga u mhereke imaili indala, u mhereke tsiviri.

⁴²U ku sava, u mu he, kandi wenya klvete u ta mima mba.

⁴³Mwa hulira, ga volwa, U yanze mtende wowo, navutswa musigu wowo u mdunyire:

⁴⁴navutswa inze mmu volera, Mu yanze avasigu venyu, kandi mu saavire ava mu dambidza,

⁴⁵mu duke kuva avana va Dada wenyu u veye migulu: kigira a vaalidza liuva lilye ku vadamano navalahi, kandi a kupidza imbula ku valungi nava ta li avalungi.

⁴⁶Kigira ni mu yanza ava mu yanza, mu la nyola madanyi ki? Kali avasolola ubusutu si va kola ndiyo?

⁴⁷Kandi ni mu chelidza avamwavo venyu veng'ine, mu sirira ku li ha avandi? Kali Tsihiri si tsi kola ndiyo?

⁴⁸Mu veye avadukanu kuli Dada wenyu womigulu a veye mudukanu.