Read lulogooli Matayo 7 Bible Online

Matayo 7 - lulogooli bible

Matayo 7

¹Mu ta kalagira mba, na mwinye mu ta kalagirwa.

²Kigira likalagira lya mu kalagira, mu la kala girwa nalyo: na mugero gwa mu gera, nagwo mu la gererwa ku.

³Kandi kigira ki u henza lindu li veye mmoni yamwavo wowo, navutswa si u ganagana ku musala gu veye mmoni yoyo?

⁴Kinga u la nyala ndi kuvolera amwavo wowo, Amitu, leka nku twulidze lindu mmoni yoyo; na henza musala gu veye mmoni yoyo?

⁵Mugadi ive, u tange kutwulidza musala gu veye mmoni yoyo; kunangwa u la lola bulahi kutwulidza lindu mmoni yamwavo wowo.

⁶Nakyo kitakatifu mu ta ha tsimbwa, kandi mu ta sikisa tsilulu tsyenyu imbiri wetsimpidzi, gase tsi la tsi duvaga nevirenge, na tsi girunkane na tsi mu tandule.

⁷Mu saale, mu la hebwa; mwenye, mu la nyola; mwigulihidze, mu ligulirwa.

⁸Kigira ku vosi u saala a hebwanga; nowenya a nyolanga; nowigulihidza yigulirwa.

⁹Kinga ibwaha ku mwinye, mwana wewe na a msaaya ubukima a la muha ligina.

¹⁰Kinga na a saava isudzi a la muha inzoka?

¹¹Mwinye ava veye avadamano, ni mu manya kuha avana venyu vindu vilahi, nasindi Dada wenyu u veye migulu a la kira kuhaana vindu vilahi kuvo ava msaala?

¹²Ku vyosi vya mwenya avandu va mu kolere, mwinye mu va kolere ndiyo kandi: kigira yaga ga veye malago navaprofeti.

¹³Mwingire mkiliango ki veye king'erere: kigira inzira i tsitsa hokudividza ni mambalalu, nekiliango kyayo ki veye kigalamu na vanyingi vingiranga mu.

¹⁴Kiliango ki veye king'erere ki tsitsa mu liva mwoyo, nenzira yakyo i veye ing'erere, navo ava ki lola ni vakekeke.

¹⁵Mu gelihe ku vaprofeti vobubehi, vadza ku mwinye viviki tsingubo tsyamagondi, navutswa mmyoyo gyavo va veye visalang'ongo vyomulitu, vilulu.

¹⁶Mu la va manya ku makuyu gavo. Avandu va nyala kwagula mazabibu ku mafwa? Kinga vagula makuyu ku matagalu?

¹⁷Na ndiyo misala gyosi milahi gyamanga makuyu malahi; navutswa musala mudamano gwamanga makuyu mada mano.

¹⁸Musala mulahi si gu nyala kwama makuyu madamano, kandi musala mudamano si gu nyala kwama makuyu malahi.

¹⁹Ku misala gyosi ogu tama makuyu malahi gu temagwa, nokutebwa mmuliru.

²⁰Kunangwa ku makuyu gavo mu la va manya.

²¹Si va lingira vosi mbwami bwomigulu ava mbolera, Mwami, Mwami, navutswa uyu u kola ubulaliri bwa Dada u veye migulu.

²²Ku lidiku yilyo vanyingi va la mbolera, Mwami, Mwami, si kwa profeta ku lieta lilyo, kandi si kwa twulidza amademone ku lieta lilyo, kandi si kwa kola miyinzi minene minyingi ku lieta lilyo?

²³Hene yaho nda va volera, Si nda mu manya mba, mu twule ku inze, ava kola kirage.

²⁴Ku vosi u hulira amakuva gange yaga, na a ga kola, a la fwananywa nomundu mugeeri, wombaka inyumba yeye ku lwanda:

²⁵imbula ya kupa, na madzi gizulira, nembuudza ya huudza, vya kupa ku inyumba yeyo; navutswa si ya gwa mba: kigira ya handa ku lwanda.

²⁶Ku vosi u hulira amakuva gange yaga, na a vula kugakola, a la fwananywa nomundu musiru, wombaka inyumba yeye ku muyeke:

²⁷imbula ya kupa, na madzi gizulira, nembuudza ya huudza vya kupa ku inyumba yeyo; ya gwa: kandi ligwa lyayo lya li linene.

²⁸Yesu, lwa ya mala amakuva yaga, viduma vya genya megidzo gege:

²⁹kigira ya vegidza kuli mundu u veye netsingulu, si yegidza kuli avang'odi vavo.