Read lulogooli Marko 12 Bible Online

Marko 12 - lulogooli bible

Marko 12

¹Ya tanga kuvavolera amakuva mu tsing'ano. Mundu ya simika mizabibu, na a lomba lwebo, na a yava lina lyokukamira mu mazabibu, ni yombaka kitaradza, na a ha avalimi va mu limire, na a tsia mu kivala kindi.

²Ku, inyinga yamazabibu, ya tuma mutugwa kutsia ku valimi, a vugule ku valimi mazabibu gemizabibu.

³Navo va mu gumira ni va mu duya, ni va mu kunga na a tsia vutswa.

⁴Kandi ya tuma mutugwa wundi kutsia ku valimi; uyu va mwaata ulugoma, ni va mu kola ubudamano.

⁵Kandi ya tuma wundi; na uyu va mwiita: kandi avandi vanyingi; avalala va va duya, navandi va viita.

⁶Ya tigala naye mulala, naye nu mwana wewe, muyanzi wewe: lwanyima ya mu tuma kuvo na a vola va la tia mwana.

⁷Navutswa valimi yavo va volerana, Uyu a veye mwene miyandu; gendi, ku mwiite, na miyandu gyosi gyi la va gyetu.

⁸Ku, va mu gumira, ni va mwiita, ni va mu twulidza mu mizabibu.

⁹Kigira yaga, mwene mizabibu a la kola ki? A ladza ni viite avalimi, na a la ha avandi mizabibu.

¹⁰Si mu somi kali ling'oda yili: Ligina lya vombaki va suye, Yili lyene lya kolwa mutwe gwo lwiga

¹¹Yaga ga twula ku Mwami. Ni ligenya mu tsimoni tsyetu?

¹²Ni venya kumugumira; navutswa va tia kiduma; kigira va manya ya vola lugano yilu kuvo: ku, va mu leka ni va tsia.

¹³Na va tuma kuye avalala ku Vafarisayo noku vanga Herodi va mu tege ku makuva gege.

¹⁴Lwa va duka kuye va mu volera, Mwegidzi, ku manya ive u veye weligali, kandi si u tidza mundu; kigira si u henza ligondo lyavandu, navutswa ligali wegidza inzira ya Nyasaye. Nu bulahi kutunga ubushutu ku Kaisari, naho si bu li bulahi?

¹⁵Ku haane, naho ku ta haana? Navutswa ya manya ubugadi bwavo, na a va volera, Kigira ki mu ngeridza? Mu ndetere ishilling, ngi lole.

¹⁶Va gi leta. Na a va volera, Kifwananyi yiki ni kya bwaha kandi ni ling'oda ya bwaha? Ni va mu volera, Vya Kaisari.

¹⁷Yesu ya va volera, Mu he Kaisari vindu vya Kaisari kandi mu he Nyasaye vindu vya Nyasaye. Ku, va mu genyera munonono.

¹⁸Vadza kuye Avasadukayo, ava vola, si ha li ne lisimuguka lya vakudzi, ni va mu teva, ni va vola

¹⁹Mwegidzi, Musa ya ku volera Amwavo womundu na a kudza na a leka mukali wewe, na a vula kuleka mwana, amwavo wewe yirannye mukali wewe, yivulire amwavo wewe avana.

²⁰Ha li avamwavo vatanu na vaviri vomundu mulala: wembiri ya leta mukali, na a kudza na a ta nyola mwana;

²¹kandi wa kola vaviri yirannya mukali, na a kudza, na a ta nyola mwana; kandi wa kola vavaka ya li ndiyo:

²²vosi vatanu na vaviri si va nyola avana mba. Nyima wa vosi mukali mwene ya kudza.

²³Mu lisimuguka lyavakudzi a la va mukali wa u li ha ku yava? Kigira vosi vatanu na vaviri va li naye.

²⁴Yesu ya va volera, Si mu goteywi, kigira si mu manya mang'oda, kinga tsingulu tsya Nyasaye?

²⁵Lwa va li simuguka mu vakudzi, si va serera, kandi si va sererewa mba; navutswa va fwana tsingelosi migulu.

²⁶Ku lisimuguka lyavakudzi; mu kikiri kusoma mu kitabu kya Musa, mu mulango gwa kasala, kuli wa Nyasaye ya volerana naye na a vola, Inze ni Nyasaye wa Abrahamu, na Nyasaye wa Isaka, na Nyasaye wa Yakobo?

²⁷Si a li Nyasaye wavakudzi, navutswa wa va veye mwoyo: mu goteywi ligali.

²⁸Mulala ku vang'odi yadza, na a va hulira va tevananga, na a manya u va tivuliye bulahi, na a mu teva, Ku malago, linene ku vita gosi ni li ha?

²⁹Yesu ya mu tivulira Li vita gandi gosi ni yili, Mu hulire Israeli; Mwami Nyasaye wetu, Mwami nu mulala:

³⁰u yanze Mwami Nyasaye wowo nomwoyo gugwo gwosi, neliva mwoyo lilyo lyosi, nobugeeri bubwo bwosi, netsingulu tsitsyo tsyosi.

³¹Li kola gaviri ni yili, U yanze mutende wowo kuli weyanza. Si ha li nelilago li vita yaga.

³²Ku, mung'odi ya mu volera, Ligali, Mwegidzi, u voye bulahi, a veye mulala; si ha li nowundi:

³³kandi kumuyanza nomwoyo gwosi, nobugeeri bwosi, netsingulu tsyosi, nokuyanza mutende wewe kuli yeyanze, li veye linene kuvita miluka gyosi gya sambwa ne vya salisirwa.

³⁴Yesu lwa ya lola ya tivula nobugeeri, ya mu volera, Si u veye ihale nobwami bwa Nyasaye mba. Si ha li nomundu kandi wa luvirira kumuteva liteva lindi.

³⁵Yesu lwa yegidza mu litempeli, ya tivula na a vola, Avang'odi va vola ndi, Kristo nu Mwana wa Daudi?

³⁶Daudi mwene ya vola na Roho Mtakatifu, Mwami ya volera Mwami wange, Wikala ha mkono mulungi gwange, Ndadza nduke kukola avasigu vovo va gwe kisako kyevirenge vivyo.

³⁷Daudi mwene ya mu gulika Mwami; a nyala ndi kuva mwana wewe? Vanyingi ku vandu va mu hulira nobuyanzi.

³⁸Mu migidzo gege ya vola, Mu gelihe avang'odi, ava yanza kugenda netsingubo tsintambi, nokuchelidzwa mu vitu,

³⁹nevisako vinene mu masomero, nevisako vilahi mu lilia:

⁴⁰yava ava lia tsinyumba tsyavakunzakali vekikali, kandi va saala lisaa la litambi no bugadi. Yavo va la nyola likalagirwa linene kuvita.

⁴¹Ni yikala himbi nenyumba yetsishilling, na a henza kiduma kuli wa kya tunga tsishilling: avanyingi avatugi va tunga tsishilling tsinyingi.

⁴²Mukunzakaliwekikali mudaka yadza na a tunga tsinkekeke tsiviri tsi kola isenti indala.

⁴³Ku, ya langa avegidzwi veve na a va volera, Ligali, mmu volera, Muku nzakali uyu u tungi vi viti vya vandi vosi va tungi.

⁴⁴Kigira yava vosi va tungi mu butugi bwavo: navutswa mu budaka bwibwe u tungi vyosi vya a vedza navyo, navyo vya a honera.